អង្គការលើកលែងទោសអន្តរជាតិ ប្រតិកម្មនឹងការសំលាប់ សកម្មជន ការពារព្រៃឈើ

Loading...
  • ដោយ: មនោរម្យ.អាំងហ្វូ
  • កែប្រែចុងក្រោយ: April 29, 2012
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ក្នុងការផ្សាយពត៌មានមួយ នៅលើគេហទំព័ររបស់អង្គការលើកលែងទោសអន្ដរជាតិ ចេញផ្សាយកាលពីថ្ងៃព្រហស្បតិ៍ទី២៦ ខែមេសាកន្លងទៅ បានលើកយកការប្រកាសពត៌មានរបស់អង្គការនេះ ដែលអំពាវនាវសុំអោយមានការស៊ើបអង្កេតមួយ ច្បាស់លាស់ ទៅលើករណីបាញ់សំលាប់សកម្មជនការពារព្រៃឈើនាំមុខជាងគេម្នាក់ ថ្មីៗនេះនៅខេត្តកោះកុងផ្នែកនារតីនៃ ប្រទេសកម្ពុជា។

លោក ឈុត វុទ្ធី ប្រធាន​អង្គការ​ការពារ​ធនធាន​ធម្មជាតិ (រូបថត: CCHR)

លោក ឈុត វុទ្ធី ប្រធានអង្គការក្នុងស្រុកមួយដើម្បី​ការពារ​ធនធាន​ធម្មជាតិ ត្រូវបានបាញ់សំលាប់ បន្ទាប់ពីលោកបានចុះ ទៅធ្វើអង្កេត​ ក្នុងតំបន់មួយដែលល្បីថាមានការកាប់បំផ្លាញព្រៃឈើដោយខុសច្បាប់ អមដោយអ្នកសារពត៌មានស្រ្តី ពីរនាក់ ផងនោះ។ គាត់ត្រូវបានគេស្គាល់ថា ជាអ្នកចេញមុខប្រឆាំង រាល់ការធ្វើអាជីវកម្មព្រៃឈើខុសច្បាប់ ហើយជាអ្នកគាំទ្រ នាំមុខគេម្នាក់ សំរាប់អ្នកទាមទារសិទ្ធដីធ្លី ផ្ទះសម្បែង ជាពិសេសនៅក្នុងបណ្ដាសកម្មជនការពារព្រៃឡង៍។

ពត៌មានរបស់អង្គការលើកលែងទោសអន្តរជាតិ​ បានបញ្ជាក់ថា ពីមុនមកលោក ឈុត វុទ្ធី ធ្លាប់ត្រូវបានគេគំរាមដល់អាយុ ជីវិត ដោយសារតែសកម្មភាពរបស់គាត់រូចមកហើយ។

លោក រូប័រ អាបុត្ត អ្នកជំនាញខាងប្រទេសកម្ពុជា ប្រចាំអង្គការលើកលែងទោសនេះ បានលើកឡើងថា​ «ហេតុការណ៍ដ៏គូរ អោយរន្ធត់នេះ បានដាក់សញ្ញាគំរាមដ៏សំខាន់មួយ​ ទៅដល់សកម្មជនការពារព្រៃឈើផ្សេងទៀត ដែលធ្លាប់ធ្វើការជាមួយ លោក ឈុត វុទ្ធី។ អ្នកទទួលខុសត្រូវទាំងឡាយ គួរត្រូវគេវែកមុខ ហើយការស៊ើបអង្កេតដ៏ច្បាស់លាស់មួយ គួរត្រូវបើកធ្វើ ដើម្បីរកអោយឃើញថា តើមានហេតុការណ៍អ្វីបានកើតឡើង។»

ទាក់ទងនឹងអ្នកសារពត៌មានស្រ្តីទាំងពីរនាក់​ មានម្នាក់ជាជនជាតិខ្មែរ និងម្នាក់ទៀតជាជនជាតិកាណាដា តំណាងអង្គការ លើកលែងទោសលោក រូប័រ អាបុត្ត បានធ្វើការក្រើនរលឹកទៅអាជ្ញាធរក្នុងស្រុកថា «ត្រូវធានាអោយបានពីសុវត្ថិភាព របស់ អ្នកសារពត៌មានទាំងពីររូប (...) ដែលប្រហែលជាសាក្សីរស់តែពីរនាក់គត់ នៅក្នុងព្រឹត្តិការណ៍បាញ់សម្លាប់នោះ ហើយអាច កំពុងប្រឈមមុខនឹងគ្រោះថា្នក់»។

គួរបញ្ចាក់ថាមកទល់នឹងថ្ងៃនេះ របាយការណ៍របស់ខាងកងរាជអាវុធហត្ថ បាននិយាយពីការឈ្លោះប្រកែកគ្នាមួយរវាង លោក ឈុត វុទ្ធី និងកំលាំងកងរាជអាវុធហត្ថ ដែលឈរជើងនៅក្នុងតំបន់នោះ ហើយបានផ្ទុះអាវុធសំលាប់លោក ឈុត វុទ្ធី មុននឹងមន្ត្រីកងរាជអាវុធហត្ថនោះសំលាប់ខ្លួនឯង។ តែរបាយការណ៍នេះ ត្រូវបានបដិសេធដោយមន្ត្រី​ស៊ើបអង្កេត​នៃ​អង្ក​ការ​សិទ្ធិមនុស្ស​ក្នុងស្រុកមួយឈ្មោះ អាដហុក ដោយបាននិយាយថា ជារឿងមិនសមហេតុមិនសមផល។ មន្ត្រីដដែល នោះក៏មិនជឿផងដែរទេ ពីរបាយការណ៍សសេរដោយអ្នកសារពត៌មានស្រ្តីទាំងពីរនាក់ ចុះផ្សាយក្នុងកាសែតប្រចាំថ្ងៃ The Cambodia Daily​​ ដោយថាការសសេរនោះ ​បានលាក់​អាថ៌កំបាំង​ជាច្រើន ឬជាការសសេរដែលរងសម្ពាធ៕

ដោយ ៖ មនោរម្យព័ងអាំងហ្វូ - ប៉ារីស ថ្ងៃទី ២៨ មេសា ២០១២
Crédit photo :cen.com.kh.
Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...