កម្ពុជា៖ កំដៅឡើងរវាងរដ្ឋាភិបាល និងវិទ្យុអាមេរិក ផ្សាយជាខេមរភាសា
វិទ្យុអាស៊ីសេរី និងវិទ្យុសម្លេងសហរដ្ឋអាមេរិក ដែលរដ្ឋាភិបាលកម្ពុជា បានហៅទៅដាស់តឿន កាលពីថ្ងៃ០៩តុលាកន្លងមក នៅតែប្រកាន់ជំហរយ៉ាងរឹងមាំ ក្នុងការផ្សាយរបស់ខ្លួន ដែលផ្ទុយ ទៅនឹងអ្វីដែលខាងអាជ្ញាធរចង់បាន។
នៅថ្ងៃបន្ទាប់ ដែលទីស្ដីការគណរដ្ឋមន្ត្រី រួមជាមួយនឹងក្រសួងយុត្តិធម៌ ក្រសួងការបរទេស និងក្រសួងពត៌មានរបស់ ប្រទេសកម្ពុជា បានកោះហៅតំណាងរបស់វិទ្យុទាំងពីរ អោយទៅចូលរួមក្នុងកិច្ចប្រជុំបិទទ្វាមួយនោះ វិទ្យុដែលគាំទ្រថវិការ ដោយសហរដ្ឋអាមេរិករ ទាំងពីរនេះ បានឆ្លើយតបបកមកវិញយ៉ាងខ្លាំងៗ តាមរយះសេចក្ដីប្រកាសរៀងៗខ្លួន និងជាបន្ដ បន្ទាប់។ នេះជាការផ្សាយអោយដឹងរបស់កាសែតភ្នំពេញប៉ុស្ដ៍ កាលពីថ្ងៃទី១១តុលានេះ។ កាសែតបានលើកយក សេចក្ដី ប្រកាសរបស់វិទ្យុអាស៊ីសេរី ដែលមានជាអាថ៌ថា៖ «កិច្ចប្រជុំគ្មានអ្វីទេ ក្រៅពីជាកិច្ចខិតខំប្រឹងប្រែងយ៉ាងច្បាស់ក្រឡែក ក្នុងការរារាំងកុំឲ្យមានការរាយការណ៍មិនលម្អៀង អំពីរដ្ឋាភិបាល។ វិទ្យុអាស៊ីសេរី នឹងបន្តរាយការណ៍រឿងរ៉ាវទាំងអស់ ដែលជាចំណាប់អារម្មណ៍ និងជាក្តីកង្វល់របស់សាធារណជនដោយត្រឹមត្រូវ និងមិនលម្អៀង។» វិទ្យុដែលគាំទ្រថវិការដោយ សភា របស់អាមេរិកមួយនេះ បានបន្ដថា៖ «រដ្ឋាភិបាលកម្ពុជា ពិតជាមិនយល់ពីគោលការណ៍ សេរីភាពសារព័ត៌មាន ឬតួនាទីសំខាន់នៃ ប្រព័ន្ធផ្សព្វផ្សាយឯករាជ្យនោះទេ ហើយគិតថា ខ្លួនអាចបំភិតបំភ័យវិទ្យុអាស៊ីសេរី ហើយកំណត់អ្វីដែលវិទ្យុយើងអាចឬមិនអាចរាយការណ៍នោះ។ យើងគាំទ្ររបាយការណ៍ និងអ្នកយកព័ត៌មានរបស់យើង។»
ចំណែកឯលោក គ្រីស ដឺឆើរ (Chris Decherd) ប្រធានវិទ្យុសំឡេងសហរដ្ឋអាមេរិកជាភាសាខ្មែរ បានលើកបញ្ជាក់ថា៖ «វិទ្យុសំឡេងអាមេរិកជាភាសាខ្មែរ នឹងបន្តផ្សព្វផ្សាយ និងរាយការណ៍ដោយ មិនលម្អៀងនិងមានលក្ខណៈវិជ្ជាជីវៈ ដែលយើងបានធ្វើរួចហើយ ក្នុងរយៈពេលជាង ៥ ទសវត្សរ៍កន្លងមកនេះ ដោយផ្តល់ព័ត៌មានទាន់ពេលវេលា និងត្រឹមត្រូវដល់ប្រជាជនកម្ពុជា១៤លាននាក់។ » លោកសង្កត់ធ្ងន់យ៉ាងដូច្នេះថា «ប្រជាជនកម្ពុជា សមនឹងទទួលបាន ព័ត៌មានដែលមានគុណភាព និងដែលពួកគេអាចជឿជាក់បាន។»
ក្នុងការផ្សាយបទវិភាគមួយ របស់វិទ្យុសម្លេងសហរដ្ឋអាមេរិក កាលពីថ្ងៃទី ១៣តុលានេះ បានរៀបរាប់ពីសារអេឡិកត្រូនិក របស់អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា លោក សន ម៉ាកឃីនថត ដែលមានវត្តមាន ក្នុងកិច្ចប្រជុំនោះដែរ ថាដោយហេតុ កិច្ចប្រជុំមានលក្ខណៈបិទទ្វារ លោកមិនអាចបញ្ចេញខ្លឹមសារនៃកិច្ចប្រជុំនេះបានទេ ប៉ុន្តែជំហររបស់សហរដ្ឋអាមេរិក «គាំទ្រសេរីភាពបញ្ចេញមតិ» និង«សិទ្ឋិទទួលព័ត៌មាន» តាមរយៈប្រព័ន្ឋផ្សព្វផ្សាយរបស់វិទ្យុអាស៊ី សេរី និងសំឡេងសហរដ្ឋអាមេរិក។
កាសែតភ្នំពេញប៉ុស្ដ៍ដដែល បានលើកសំដីរបស់ អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន ដែលបានវាយតំលៃ ពីកិច្ចប្រជុំនេះ ថាមាន«លក្ខណៈមិត្តភាព» និងបាននិយាយនៅជុំវិញតែបញ្ហា«វិជ្ជាជីវៈ»។ លោក បន្តថា៖ «អ្វីដែលបានកើតឡើង យើងមិនបានធ្វើសេចក្តីវិនិច្ឆ័យទេ យើងគ្រាន់តែរំឭកពួកគេ ឲ្យងាកមើលសេចក្តីរាយការណ៍ ឬបេសកកម្ម របស់ខ្លួន។ យើងមិនចោទពួកគេទេ»។ នៅពេលសួរអំពីសេចក្តីប្រកាសពត៌មានរបស់វិទ្យុអាស៊ីសេរី លោកថា៖ «វាមិនមែនជាសញ្ញានៃការបំភិតបំភ័យទេ។ វាជាសញ្ញា ដែលត្រូវគោរពកម្ពុជា ជារដ្ឋអធិបតេយ្យ... ហើយការដែលគេនិយាយរៀបរាប់ពីកិច្ចប្រជុំនេះ គឺជាការបំភ័នមួយ ជាការបង្វែរសាច់រឿង និងគ្មានវិជ្ជាជីវៈ។»
អ្នកវិភាគជាច្រើន បានបកស្រាយពីពាក្យដែលលោក ផៃ ស៊ីផាន បានប្រើក្នុងនាម «រដ្ឋអធិបតេយ្យ» ដើម្បីពន្យល់ពីកម្មវត្ថុ ចង់ដាស់តឿនទៅវិទ្យុទាំងពី អោយគោរពវិជ្ជាជីវៈរបស់អ្នកសារពត៌មាន ថាជារឿងពីរផ្ទុយគ្នាស្រឡះ (រវាង អធិបតេយ្យភាព របស់រដ្ឋ និង វិជ្ជាជីវៈ) ។ សូមបញ្ជាក់ថា វិទ្យុទាំងពីរបានរាយការណ៍ ធ្វើបទយកការណ៍ និងបទវិភាគកន្លងមក ដោយបាន សង្កត់ធ្ងន់នៅលើ ប្រធានបទដ៏រសើបជាច្រើននៅក្នុងប្រទេសកម្ពុជា ដូចជា បញ្ហាដីធ្លី ព្រំដែន អយុត្តិធម៌សង្គម និងការ បំផ្លាញធនធានធម្មជាតិ ដែលរឿងទាំងនេះ វាមិនបានធ្វើអោយ រដ្ឋាភិបាលកម្ពុជាសប្បាយចិត្តប៉ុន្មានឡើយ។ ការជជែក វែកញែករវាង រដ្ឋាភិបាលខ្មែរ និងវិទ្យុអាមេរិកនៅពេលនេះ បានកើតឡើងចំពេលដែលប្រទេសកម្ពុជា កំពុងត្រៀមរៀបចំ ចាំទទួលដំណើរ ទស្សនកិច្ចជាផ្លូវការ របស់ប្រធានាធីបតីអាមេរិក ក្នុងខែវិច្ឆិការខាងមុខ៕
-----------------------------------------------------
ដោយ ៖ កេសរកូល - ភ្នំពេញ ថ្ងៃទី១២ ខែតុលា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ