ចៅក្រមស៊ើបអង្កេត ស្វីស លាឈប់ទៀត ពីសាលាក្ដីខ្មែរក្រហម

ដំណឹងបានធ្លាក់មក នៅថ្ងៃច័ន្ទទី​១៩ មិនានេះ បានអោយដឹងថា លោក ឡូរ៉ង់ កាស្ពើអានសឺមេត ( Laurent Kasper-Ansermet ) បានដាក់ពាក្យសុំលាលែង ពីសាលាក្ដីខ្មែរក្រហម ។ នៅក្នុងសេចក្ដីប្រកាសមួយ របស់សាលាក្ដី បាននិយាយពី ពាក្យសុំលាលែងនេះ ហើយបានបញ្ជូនទៅ​អគ្គលេខាធិការដ្ឋាន ​នៃ​អង្គការសហប្រជាជាតិ ដែលនឹងចូលជាធរមាន ចាប់​ពី​ថ្ងៃទី៤ ខែ​ឧសភា ឆ្នាំ២០១២ ។ នេះជាដំណាក់កាល ថ្មីមួយទៀតដែល សាលាក្ដីកូនកាត់ រវាងប្រទេសកម្ពុជា និងអង្គការសហប្រជាជាតិ មួយនេះបានជួបប្រទះ បន្ទាប់ពីការលាឈប់ លើកមុនរបស់ ចៅក្រមស៊ើបអង្កេត ជាជនជាតិ អាឡឺម៉ង់ លោក​​ ​ស៊ីកហ្វ្រេត​ ប៊្លុង ( Siegfried Blunk ) កាល​ពី​ថ្ងៃ​ទី៣០ ខែ​វិច្ឆិកា ឆ្នាំ២០១១ កន្លងទៅ ។ រាល់ការលាឈប់ របស់ចៅក្រមស៊ើបអង្កេតអន្តរជាតិទាំងពីរ ត្រូវបានគេមើលឃើញ ពីវិសាលភាពប្រកបដោយមន្ទិល ក្នុងការរកយុត្តិធម៌​ អោយដល់ជនរងគ្រោះ ក្រោមរបបខ្មែរក្រហម។

«ភាពអសកម្មមួយ របស់ សាលាក្ដី»​ និង «សកម្មភាព ខុសច្បាប់»

កាសែតជាភាសារបរទេស នៅជុំវិញអ៊ឺរ៉ុប បានចុះផ្សាយព្រោងព្រាតអំពី សេចក្ដីប្រកាសនោះ ហើយបកស្រាយថា «ឧបសគ្គកំពុងតែមានភាពជោគជ័យ ទៅលើឆន្ទះការងាររបស់ ចៅក្រមស៊ើបអង្កេតអន្តរជាតិស្វីស​» ។ គេក៏បាននិយាយ ផងដែរ អំពីការឈ្លោះប្រកែក គ្នារវាង សហចៅក្រមស៊ើបអង្កេតអន្តរជាតិ រូបនេះ ជាមួយនឹង សហចៅក្រមស៊ើបអង្កេតជាតិ លោក យូ ប៊ុនឡុង ដែលបានឈានរហូតទៅដល់ ការដាក់ឱសានវាទ កាល​ពី​សប្តាហ៍​មុន។

នៅក្នុងសេចក្ដីប្រកាស របស់សាលាក្ដី បានលាតត្រដាងពី «ភាពអសកម្មដ៏ធំមួយ របស់ សាលាក្ដី» ហើយភាពអសកម្មនេះ នឹងត្រូវ ចេញផ្សាយជាសាធារណះ ក្នុងពេលខាងមុខ ។ លោក ឡូរ៉ង់ កាស្ពើអានសឺមេត បានបកស្រាយថា ផ្ទុយពីការស្វែងរក ការសំរុះសំរួលរវាង គាត់នឹង ចៅក្រម យូ ប៊ុនឡុង គាត់បែជាទទួលបានមកវិញ នូវការជំទាស់ តាមពាក្យសំដី ជាច្រើនដង និងពេលបន្ទាប់មកទៀត តាមលាយលក្ខណ៍អក្សរ​ចំនួន ២លើក ដែលបញ្ជាអោយលោក បញ្ឈប់នូវ «សកម្មភាព ខុសច្បាប់» នៃការស៊ើបអង្កេតទាំងឡាយ ។

ភាព ខុសច្បាប់ ដែលលោក សហចៅក្រមស៊ើបអង្កេតជាតិ លោក យូ ប៊ុនឡុង បាននិយាយនោះ ទំនងជាចង់យោលទៅលើ ភាពមិនពេញលក្ខណៈ នៃតំណែង សហចៅក្រមស៊ើបអង្កេតអន្តជាតិបំរុង របស់លោក ឡូរ៉ង់ កាស្ពើអានសឺមេត នេះឯង។

ឧត្តមក្រុមប្រឹក្សា​នៃ​អង្គចៅក្រម នៃប្រទេសកម្ពុជា បានបដិសេធ​មិន​ព្រម​តែងតាំងលោក ឡូរ៉ង់ កាស្ពើអានសឺមេត​ Laurent Kasper-Ansermet ជា​សហចៅក្រម​ស៊ើបអង្កេត​អន្តរជាតិពេញសិទ្ធិទេ ។​ នេះបើតាមការពន្យល់ របស់ស្ថាប័នកំពូលមួយនេះ កាលពីថ្ងៃ សៅរ៍ ទី២៨ ខែមករា ឆ្នាំ២០១២ កន្លងទៅ ។ ឧត្តមក្រុមប្រឹក្សា​នៃ​អង្គចៅក្រម នៃប្រទេសកម្ពុជា បានចោទប្រកាន់ លោក ឡូរ៉ង់ កាស្ពើអានសឺមេត ( Laurent Kasper-Ansermet ) ថាបាន​ចុះ​ផ្សាយ​ អត្ថបទ​ជា​ច្រើន​តាមរយៈ គេហទំព័រ ​Twitter​ របស់​ខ្លួន ​ទាក់ទង​នឹង​សាលាក្តី​ ក៏ដូចជា ​ការ​បញ្ចេញ​ទស្សនៈ​របស់​ខ្លួន តាមរយះសារ​ព័ត៌មាន ​ទៅ​លើ​​សហចៅក្រម​ស៊ើបអង្កេតជាតិ លោក ​យូ ប៊ុនឡេង ​និង​លោក ស៊ីកហ្វ្រេត​ ប៊្លុង ( Siegfried Blunk ) ជាដើម ដែលខុសទៅនឹងវិធានផ្ទៃក្នុង របស់សាលាក្ដី ។

តែលោក ឡូរ៉ង់ កាស្ពើអានសឺមេត ខ្លួនឯង បានច្រានចោល ការចោទប្រកាន់ទាំងនេះ ហើយបាននិយាយ ពីការរកលេស មិនសមហេតុផល របស់ភាគីកម្ពុជា ដើម្បីជាការរារាំង កុំអោយមានការស៊ើបអង្កេតឡើងវិញ ទៅលើសំណុំរឿង ០០៣ និង ០០៤​ ដែលក្នុងនោះ មានជាប់ពាក់ព័ន្ធជាមួយ ជនសង្ស័យ ជា​កម្មាភិបាល​ខ្មែរ​ក្រហម ​ថ្នាក់​កណ្តាល ចំនួន ៥នាក់ ។ វិទ្យុសំលេង​សហរដ្ឋអាមេរិក បានជួបជាមួយ ជន៣នាក់ ពីចំណោម ជនសង្ស័យ​ទាំង​នោះ ដែល​រួមមាន​លោក ​ស៊ូ ម៉េត -​ យឹម ទិត -​ ​មាស មុត - ​អោម អាន ​និង​ អ្នកស្រី​អ៊ឹម ចែម ។ របាយការណ៍របស់វិទ្យុដដែល​ បានបញ្ជាក់ ពីអ្វីដែល ជនសង្ស័យទាំងបី បានបដិសេធទាំងស្រុង ការចោទប្រកាន់ របស់ សហចៅក្រមស៊ើបអង្កេតអន្តជាតិ។

ទោះបីជាយ៉ាងណា ក៏ដោយ លោក ឡូរ៉ង់ កាស្ពើអានសឺមេត នឹងនៅកាន់តំណែងរបស់ខ្លួន រហូតដល់ថ្ងៃ ៤ ខែឧសភា ដើម្បីធ្វើការងារណា ដែលទាក់ទង នឹងសំនុំរឿងរដ្ឋប្បវេណី ។ អ្នកស្នងតំណែង ជាយថាហេតុរបស់គាត់ នឹងត្រូវប្រកាស អោយដឹងដោយ អង្គការសហប្រជាជាតិ ក្នុងពេលខាងមុខ ប៉ុន្តែអ្នកវិភាគទាំងឡាយ មិនមានសុទ្ទិដ្ឋិនិយមទេ ដោយសារតែ ពេលមុនហ្នឹង លោក ​ស៊ីកហ្វ្រេត​ ប៊្លុង អតីតសហចៅក្រម ស៊ើបអង្កេតអន្តរជាតិ បានលាឈប់ ពីសាលាក្ដីដូចគ្នានេះ ព្រមទាំងបានបរិហា ពីគំនាបរបស់ ទីក្រុងភ្នំពេញ ទៅលើឯករាជ្យភាពរបស់ចៅក្រម ៕

ដោយ ៖ សេក មនោរកុមារ​​ -​ ប៉ារីស ថ្ងៃទី ១៩ មិនា​ ២០១២
Crédit​ Photo : AFP