http://www.cen.com.kh/localnews/show_ ... 5ODg4MDJhMjFjNDQ1Njg4OTkx

កំពង់ឆ្នាំង: អ្នកក្រុងកំពង់ឆ្នាំងបានផ្អើលតៗគ្នា ថាមានព្រលឹងខ្មោច​ស្រី​ម្នាក់​ដែលស្លាប់ក្រោយ ពីឆ្លងទន្លេ រួច បានលងគេឯងពេញ​វត្ត​ទេពធីតា​រ៉ាម​ ហៅ ​វត្តយាយទេព ស្ថិតក្នុង​ភូមិ​ផ្សារឆ្នាំង សង្កាត់​ផ្សារឆ្នាំង ក្រុង​កំពង់ឆ្នាំង ។ ​មានការអះអាងថា ការលងស្រស់ៗនោះ មានទាំងកណ្តាលថ្ងៃចែសផង ។

​ ​លោកតា​អ៊ឹម ឃ​ន អាយុ​៦៨​ឆ្នាំ ជា​អ្នក​បូជាសព ប្រចាំ​នៅ​វត្ត ទេព្វធីតា​រ៉ាម គឺជា មនុស្សម្នាក់ដែលត្រូវខ្មោចស្រីនោះលង។លោកតាបានឲ្យដឹងថា ស្ត្រីដែល​ស្លាប់​នោះ​រស់នៅក្នុង​ស្រុកកំពង់លែង ។ មាន​អាយុ​ប្រហែល​២៧​ឆ្នាំ ។ នាង​សម្រាលកូន​ដំបូង ហើយ​ធ្លាក់ឈាមច្រើន ត្រូវ​បានក្រុមគ្រួសារ​បញ្ជូន​មកកាន់មន្ទីរពេទ្យតែ នាង​បាន​ស្លាប់​នៅតាម​ផ្លូវ​ក៏យក​មក​តម្កល់​និង​បូជា​នៅ​ក្នុង​វត្ត​ទេពធីតា ​រ៉ា​ម ​នេះទៅ ។ ​ប៉ុន្តែសព​ស្ត្រី​នេះ​មិន​បាន​ធ្វើបុណ្យ​តាម​ប្រពៃណី​ត្រឹមត្រូវទេ ហើយ​ការបូជាទៀត​ក៏​មិន​មាន​អាចារ្យ និង​ព្រះសង្ឃ​ឱ្យធម៌​ដែរ ពីព្រោះ​នៅ​ក្នុង​ពេល​បូជា​នោះលោកតា​អាចារ្យ​ជាប់រវល់ អត់​មាន​អ្នកណា​ទៅ​និមន្ត​ព្រះសង្ឃ ក៏​បូជា​ឆៅ​តែម្តង ។
​
​ ​លោកតាបានឱ្យដឹងទៀត ថា សព​ស្ត្រី​នេះ​បាន​យក​មក​តម្កល់ទុកនៅក្នុង​សាលា​ឆាន់​នៅ​យប់​ថ្ងៃទី​៩​ខែ កក្កដា​ ឆ្នាំ​២០១០ ។ លុះ​ព្រឹក​ឡើង​ថ្ងៃទី ១០ ​កក្កដា បាន​បូជា ។ ក្រោយ​ពី​បូជា​ហើយ នៅវេលា​ម៉ោង​១២​ថ្ងៃត្រង់ លោកតាបាន​ទៅរៀបចំ​ទុកដាក់​អីវ៉ាន់​នៅក្នុង​សាលា​ឆាន់ ដែល​ជា​កន្លែង​តម្កល់សព​ស្ត្រី​នោះ ស្រាប់តែ​ឮ​សំឡេង​ស្រែក​ថ្ងូចថ្ងូរថា​ ឈឺពោះ​ខ្លាំងណាស់ ។ នៅពេលដែលលោកតា​ដើរ​ចូល​ទៅរកមើលពុំ​ឃើញមាន​មនុស្សទេ ទើប​ដឹងថាគឺជា​ខ្មោចលងទាំងកណ្តាលថ្ងៃ ។​
​ ​លោកបាននិយាយទៀតថា នៅ​យប់​ថ្ងៃទី​១០​ កក្កដា មាន​បុរស​ម្នាក់​ឈ្មោះ សាំង ជា អាយុ​៤០​ឆ្នាំ ពេល​ជិះ​ម៉ូតូ​ឆ្លង កាត់​វត្ត​ក៏​ឮ​សំឡេង​មនុស្ស​ស្រី​ស្រែក​នៅក្នុង​សាលាឆាន់​ដូចគ្នានេះដែរ ។​

​ ​នារី​ម្នាក់​ឈ្មោះ​វ៉ែន សេង អាយុ ២២​ឆ្នាំ ដែល​មានផ្ទះ​នៅ​ក្បែរ​វត្តក៏ត្រូវបានជួបនឹង ហេតុការណ៍ខ្មោចស្រីនោះលងដែរ ។ នាងនិយាយថា នៅវេលា​ម៉ោង ៩​យប់​ថ្ងៃ​ទី​១១ ​ខែកក្កដា​ឆ្នាំ​២០១០ នាង បាន​ជិះ​ម៉ូតូ​ម្នាក់​ឯង​កាត់​ពីមុខ​សាលាឆាន់​នេះ ស្រាប់តែ​ឃើញមនុស្ស​ស្រី​ម្នាក់ស្លៀក​ស ពាក់ស​ហៅ​នាង​ឱ្យ​ឈប់ ហើយសួរថា ឃើញកូន​របស់​អញទេ ? ពួកគេ​យក​កូន​របស់​អ​ញទៅ​ណា​ហើយ​? ពេលនោះ​នាង​ឆ្លើយថា កូន​អីនាង​មិន ដឹង​ទេ ហើយ​បន្ទាប់មក​ស្ត្រី​ស្លៀក​ស ពាក់​ស​នោះ​បាន​និយាយ​មក​កាន់​នាងទៀត ថាម៉េច​មិន​បិទ​ភ្លើង​ម៉ូតូ ។ នាង​ឆ្លើយតប​ទៅ​វិញថា បិទ​ធ្វើ​អ្វី បិទ​មិន​ងងឹត ។ នាង​និយាយ​មិន​ទាន់​ផុត​ពី​មាត់​ផង ស្រាប់តែ​ភ្លើង​ម៉ូតូ​រលត់​ខ្លួនឯង ហើយ ក៏​ឆេះ​ឡើង​ឃើញ​ស្រី​នោះ​លូក​ដៃ​មកចាប់​នាង ហើយ​ភ្នែក​ហូរ​ចេញសុទ្ធតែឈាម ទើប​នាង​ដឹង​ថា​ខ្មោច លង ហើយ​នាង បានដាក់​លេខ​ម៉ូតូ​បើ​កបំ​បុក​ខ្មោច​ស្រី នោះ ប៉ុន្តែ​នៅពេល​បុក​ទៅ​បែរ ជា​ត្រូវចំ​គល់​ស្វាយ​ទៅវិញបណ្តាល​ឱ្យ​នាងរងរបួស​រលាត់​ដៃ រលាត់​ជើង​និង​ខូចម៉ូតូ​ផ្អើល​ដល់​ព្រះសង្ឃ យាយជី និង​ប្រជាពលរដ្ឋ​នៅក្បែរៗ​នោះ​រត់​មកជួយ ។​

​ ​ព្រះ​តេជគុណ ម៉ន់ ចំរើន បាន មាន​សង្ឃដីកា​ប្រាប់​អ្នកកាសែត​ថា ករណី​ខ្មោចលង​នៅក្នុង​វត្ត​យាយ​ទេពនេះ ពិតជា​មាន​មែន លោក​ក៏​ត្រូវ​ខ្មោច ស្ត្រី​នោះ​លង​ដែរ ។ ចៅអធិការ​វត្ត​អង្គ នេះ​បាន​បញ្ជាក់ថា មាន​យប់​មួយ​នោះ ព្រះអង្គ​បាន​ឮ​សំឡេង​មនុស្ស​ស្រី​ស្រែក ឱ្យជួយ​នៅ​ខាង​ក្នុង​សាលាឆាន់ តែ​នៅពេល​ដែល​ព្រះអង្គ​និមន្ត​ទៅ​បើកភ្លើង ហើយ​ចូល​ទៅ​មើល អត់​មាន​ឃើញមនុស្ស​ទេ ។
​ ​អ្នក​ក្រុងកំពង់ឆ្នាំង ពិសេស​អ្នក​ដែលរស់នៅ​ក្បែរ​វត្ត​ទេពធីតា​រ៉ាម កំពុងតែ​ស្រៀវ ឆ្អឹងខ្នងរឿងខ្មោចលង ។ មាន​អ្នកខ្លះ​បាន​បន្ទោស​ថា នេះ​មក​ពី​បូជា​មិន​ព្រម​រកអាចារ្យ និង​និមន្ត​ព្រះសង្ឃ​សូត្រធម៌ ត្រឹមត្រូវ ៕