ក្រុមអ្នកការទូតបរទេស ដែលមានទីស្នាក់ការនៅទីក្រុងព្យុងយ៉ាង ទំនងជាបានសម្រេចចិត្ត កាលពីថ្ងៃសៅរ៍ទី០៦​ខែមេសា​នេះ ថានឹងបន្តបេសកកម្មការទូតរបស់ខ្លួនទៅទៀត បើទោះជារបបកុម្មុយនីស បានស្នើអោយមានការជម្លៀសពួកគេចេញ យ៉ាងណាក៏ដោយ។

ព្យុះហយាត្រា បង្ហាញពីរថយន្ដបាញ់កាំជ្រួចម៊ីលស៊ីល របស់ប្រទេសកូរ៉េខាងជើង។

ចំណែកឯក្រុងវ៉ាស៊ីនតោនវិញ ក៏ទំនងជាចង់អោយស្ថានភាពស្ងប់ស្ងៀមដែរ ដោយបាន«លើកថ្ងៃ»នៃការសាកល្បង​កាំជ្រួចអន្តរទ្វីបបញ្ជាពីចម្ងាយ ដែលជាធម្មតា បានកំណត់ធ្វើក្នុងរដ្ឋកាលីហ្វ័នីរសប្ដាហ៍ក្រោយ ដោយសារតែភាពតានតឹង​ចេះតែកើនឡើង នៅក្នុងឧបទ្វីបកូរ៉េនេះ។ សូមអានអត្ថបទដែលទាក់ទងនឹងការ«លើកថ្ងៃ»នៃការសាកល្បងកាំជ្រួច របស់អាមេរិក ដោយចុចលើទីនេះ។

របបក្រុងព្យុងយ៉ាង ដែលបានតម្លើងកាំជ្រួចរយៈមធ្យម នៅតំបន់ឆ្នេរខាងកើតនៃប្រទេសរបស់ខ្លួន ត្រៀមចាំការវាយលុក​នោះ បានជូនដំណឹងកាលពីថ្ងៃសុក្រទី០៥ខែមេសាមុននេះ ថាខ្លួនមិនអាចធានាសុវត្ថិភាព អោយក្រុមអ្នកបំពេញ​បេសកកម្មការទូតបរទេស ប្រចាំនៅទីក្រុងព្យុងយ៉ាង បានតទៅទៀតទេ ចាប់ពីថ្ងៃទី១០ខែមេសានេះតទៅ។

យុទ្ធសាស្ត្រ «បង្អើល»?

ប៉ុន្តែរដ្ឋាភិបាលនៃប្រទេសជាច្រើន ដែលទទួលបានសេចក្ដីជូនដំណឹងនេះ ទំនងជាមិនមាននរណាម្នាក់ មានគម្រោង​ចង់​ជម្លៀសមន្ត្រីការទូតរបស់ខ្លួន ចេញពីទីក្រុងព្យុងយ៉ាង ក្នុងពេលភ្លាមៗនេះទេ។ ផ្ទុយទៅវិញ ប្រទេសមួយចំនួន បានគិតថា ការគាបសង្កត់របស់អាជ្ញាធរកូរ៉េខាងជើង ជាយុទ្ធសាស្ត្រមួយ ចង់អោយគេឃើញពីការព្រួយបារម្ភជាលក្ខណៈអន្តរជាតិ នៅក្នុងវិបត្តិឧបទ្វីបកូរ៉េ។

ប្រទេសអាឡឺម៉ង់បានប្រកាសនៅថ្ងៃសៅរ៍ថា ស្ថានទូតរបស់ខ្លួននៅទីក្រុងព្យុងយ៉ាង នឹងនៅតែមានដំណើរការធម្មតា។ នៅក្នុងសេចក្ដីប្រកាសព័ត៌មាន របស់ក្រសួងការបរទេសអាឡឺម៉ង់ បានបញ្ជាក់ថា «សុវត្ថិភាពរបស់ស្ថានទូត និងការ​ប្រឈមទល់នឹងគ្រោះថ្នាក់ ត្រូវបានវាយតម្លៃជាប់ជាប្រចាំ។ ប៉ុន្តែក្នុងដំណាក់កាលនេះ ស្ថានទូតអាចនៅធ្វើការបាន។»

រដ្ឋមន្ត្រីការបរទេសអាឡឺម៉ង់ បានបន្ថែមថា «និយាយពីអ្វីដែលជាសុវត្ថិភាព របស់ស្ថានទូតអាឡឺម៉ង់ យើងមានការ​ពិគ្រោះជាប់ជាប្រចាំ ជាពិសេសជាមួយដៃគូរបរទេសផ្សេងទៀត ដែលពួកគេមានស្ថានទូត នៅទីក្រុងព្យុងយ៉ាង​ដូចគ្នា​ដែរ»។

ចំណែកទីក្រុងឡុងដ៍ បានពន្យល់ពីការយល់ឃើញរបស់ខ្លួន តាមរយៈអ្នកនាំពាក្យក្រសួងការបរទេស ទាក់ទងនឹង​ការជូន​ដំណឹងរបស់កូរ៉េខាងជើងថា «យើងគិតថា ពួកគេធ្វើយ៉ាងនេះ ជា​របៀប​នៃការវាយលុកថ្មីមួយ ដែលនឹងដាក់កំហុសទៅ​អោយសហរដ្ឋអាមេរិក ថាជាការគម្រាមដ៏សំខាន់ សម្រាប់​មន្ត្រី​ទូត​ទាំង​នោះ»។

«មិនរវល់» នឹងសេចក្ដីជូនដំណឹងរបស់ទីក្រុងព្យុងយ៉ាង

ថ្នាក់ដឹកនាំបេសកកម្មការទូត នៃប្រទេសចំនួន៧នៅអ៊ឺរ៉ុប (អាឡឺម៉ង់ អង់គ្លេស ស៊ុយអ៊ែដ ប៉ូឡូញ រ៉ូម៉ានី ឆែក និងប៊ុលហ្គារី) បានជួបប្រជុំគ្នា កាលពីល្ងាចថ្ងៃសៅរ៍នៅទីក្រុងព្យុងយ៉ាង ដើម្បីជជែកពីស្ថានភាពចុងក្រោយ បន្ទាប់ពីសេចក្ដីជូនដំណឹង​របស់ទីក្រុងព្យុងយ៉ាង។

អ្នកនាំពាក្យនៃប្រទេសទាំងនោះ មួយចំនួនធំ បានបដិសេធមិនធ្វើអត្ថាធិប្បាយទេ ទាក់ទងនឹងកិច្ចប្រជុំនេះ តែបានសុំ​អោយអ្នកកាសែតរងចាំ កិច្ចប្រជុំស្ដីពីកូរ៉េខាងជើង ដែលនឹងប្រារព្ធធ្វើក្នុងទីក្រុងប៊្រុយស្សែល ប្រទេសប៊ែលហ្សិក នៅថ្ងៃ​ច័ន្ទខាងមុខ ដោយមានការចូលរួមពីសំណាក់ អគ្គរដ្ឋទូតទាំង២៧ប្រទេសនៃសហគមន៍អ៊ឺរ៉ុប។

រីឯប្រទេសកូរ៉េខាងត្បូងវិញ អ្នកទទួលខុសត្រូវក្នុងរដ្ឋាភិបាលមួយរូប ស្រង់ពាក្យសម្ដីដោយទីភ្នាក់ងាព័ត៌មានយ៉ុងហាប់ (Yonhap) បានថ្លែងថា អ្នកការទូតបរទេសប្រចាំនៅកូរ៉េខាងជើង ទំនងជា«មិនរវល់» នឹងសេចក្ដីជូនដំណឹង​របស់ទីក្រុង​ព្យុងយ៉ាងនោះទេ។ ក្នុងលក្ខខ័ណ្ឌមិនបញ្ចេញឈ្មោះ អ្នកទទួលខុសត្រូវនោះ បាននិយាយថា «រដ្ឋាភិបាលបរទេស​ភាគ​ច្រើន ចាត់ទុកថា សាររបស់កូរ៉េខាងជើង ជាមធ្យោបាយសម្រាប់បង្អើល ភាពតានតឹង​ដែលកើតមានក្នុងប្រទេសកូរ៉េ​ខាង​ជើង»។

ចិនថា ត្រូវដោះស្រាយតាមការជជែកគ្នា

ដោយឡែក អង្គការសហប្រជាជាតិ ក៏មិនបានត្រៀម ជម្លៀសមន្ត្រីរបស់ខ្លួន ចេញពីកូរ៉េខាងជើងនោះដែរ។ អ្នកនាំពាក្យ​របស់អង្គការពិភពលោកមួយនេះ លោក ម៉ាទីន ណេសៀគី (Martin Nesirky) បាននិយាយនៅទីក្រុងញ៉ូយកថា «មន្ត្រី​របស់អ.ស.ប. នឹងនៅធ្វើការងាររបស់ខ្លួន ដោយត្រឹមត្រូវ ក្នុងក្របខ័ណ្ឌមនុស្សធម៌ និងដើម្បីការអភិវឌ្ឍន៍ នៅលើផ្ទៃ​ប្រទេសកូរ៉េខាងជើង»។

នៅក្នុងកិច្ចពិភាក្សាតាមទូរស័ព្ទ ជាមួយនឹងអគ្គលេខាធិការនៃអ.ស.ប. លោក បាន គី-មូន (Ban Ki-moon) រដ្ឋមន្ត្រី​ការ-​បរទេសចិនថ្មី លោកវ័ន យី (Wan Yi) បានគូសបញ្ជាក់ពីសារសំខាន់ ដែលវិបត្តិនេះ ត្រូវដោះស្រាយតាមការជជែកគ្នា។ ក្នុងសេចក្ដីប្រកាសព័ត៌មានមួយរបស់អ.ស.ប. លោកបាន-គីមូន បានថ្លែងពន្យល់ពីសេចក្ដី«ទុកចិត្តរបស់លោក ដែល​រដ្ឋាភិបាលចិន នឹងខិតខំខ្នះខ្នែង ធ្វើអោយស្ថានការណ៍ អាចត្រឡប់មករកភាពស្ងប់ស្ងាត់វិញ»៕

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី០៧ ខែមេសា ឆ្នាំ២០១៣
ប្រភពយោង៖ AFP
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ