តើអ្នកធ្លាប់ស្គាល់ គ្រីស្ទែណូ រ៉ូណាល់ដូ (Cristiano Ronaldo) ដែរទេ? ជាក់ស្តែងគាត់ជាកីឡាករ បាល់ទាត់ម្នាក់។ ប៉ុន្តែ​តើ​ការពិតអ្វីខ្លះ ដែលកីឡាករ រ៉ូណាល់ដូ មាន?

គ្រីស្ទែណូ រ៉ូណាល់ដូ​ នៅក្នុងការប្រកួតបាល់ទាត់ពានរង្វាន់អ៊ឺរ៉ូ ២០១២។

មនោរម្យព័ងអាំងហ្វូ សូមលើកយកនូវចំណុចការពិតខ្លះៗ របស់កីឡាករឆ្នើមរូបនេះ មកជម្រាបជូនដល់​ប្រិយមិត្ត​អ្នកអាន​ឲ្យបានជ្រាប។ ចំណុចទាំងនោះមានដូចជា៖

១. គាត់មិនទទួលទានគ្រឿងស្រវឹង ព្រោះវាធ្វើឲ្យគាត់នឹកឃើញដល់ជំងឺ ដែលសម្លាប់ឪពុករបស់គាត់។
២. គាត់មិនមានស្នាមសាក់រូបអ្វីមួយ នៅលើស្បែករបស់គាត់នោះទេ ដូច្នេះគាត់អាចបរិច្ចាគឈាម២ដង ក្នុងមួយឆ្នាំ ដើម្បី​ជួយសង្រ្គោះដល់អ្នកខ្វះខាតឈាម។
៣. មានដើមកំណើតមកពីគ្រួសារក្រីក្រម្នាក់ ហើយបាត់បង់ឪពុក តាំងពីរូបគាត់មានវ័យ ២០ឆ្នាំ។
៤. បរិច្ចាគចំនួនលុយដ៏ច្រើន ដល់សាលារបស់ប្រជាជនប៉ាឡេស្ទីន និងផ្តល់ឲ្យ ៣លានដុល្លា ដល់ប្រទេស ដែលមានភាព​ខ្វះខាត និងជួបគ្រោះធម្មជាតិនៅតំបន់អាហ្វ្រិក។
៥. បង់ថ្លៃព្យាបាលឲ្យកុម៉ាអាយុ៩ឆ្នាំម្នាក់ ដែលមានជំងឺមហារីក រហូតដល់ជាពីជម្ងឺឡើងវិញ។

កីឡាកររូបនេះ ក៏ធ្លាប់បានបញ្ចេញ ពាក្យពេចន៏ដ៏ល្បីល្បាញផងដែរ មានដូចជា៖

• «ខ្ញុំមានក្បាច់ជាច្រើន ដែលខ្ញុំប្រើប្រាស់ បើខ្ញុំចង់ធ្វើបានល្អ។ វាជាធម្មជាតិរបស់ខ្ញុំ ហើយនិងមានភាពងាយស្រួល។ ប៉ុន្តែ​ខ្ញុំប្រើប្រាស់តែមួយណា ដែលមានប្រយោជន៏សំរាប់ក្រុមទាំងមូលតែប៉ុណ្ណោះ។ អ្វីដែលខ្ញុំធ្វើខ្លួនឯងយល់ថាសំខាន់ លុះត្រា​តែក្រុមឈ្នះ នោះជាការសំខាន់បំផុត។»

• «ការទាត់បាល់ពិន័យ (free-kick) របស់ខ្ញុំមិនមានអ្វីសម្ងាត់ទេ! ខ្ញុំគ្រាន់តែមើលទៅសំណាញ់ទី ហើយនិយាយក្នុងចិត្តថា ទាត់​បាល់។»

• «ខ្ញុំមិនមែនជាមនុស្សឥតខ្ចោះបំផុតនោះទេ ប៉ុន្តែខ្ញុំតែងតែមានអារម្មណ៏ថា អ្វីៗនឹងបញ្ចប់ទៅដោយល្អប្រសើរ។ អ្វីដែល​សំខាន់ជាងនេះទៅទៀតនោះ ខ្ញុំត្រូវតែរៀន។ ការសិក្សា គ្មានព្រំដែន គ្មានទីបញ្ចប់ មិនថាអ្នកអាយុប៉ុន្មាននោះទេ។»

• «វាផ្តល់ឲ្យខ្ញុំ នូវអារម្មណ៏ រីករាយបំផុត នៅលើពិភពលោក។ ខ្ញុំគ្រាន់តែស្រលាញ់ការរកគ្រាប់បាល់បញ្ចូលទី មិនថាវា​ជា​គ្រាប់បាល់ធម្មតា ទាត់នៅជិតទី បាល់ពីចម្ងាយ ឬបណ្តើបាល់ ឆ្លងកាត់ខ្សែការពារជាច្រើននាក់នោះទេ ខ្ញុំគ្រាន់តែដឹងថា ខ្ញុំស្រលាញ់ការរកគ្រាប់បាល់បញ្ចូលទី គ្រប់មធ្យោបាយទាំងអស់៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៨ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ