យន្ដហោះប៊ូអ៊ីញ (Boeing) របស់ក្រុមហ៊ុនអាកាសចរណ៍ ឡាញអន អ៊ែរ (Lion Air) ដែលដឹកមនុស្សច្រើនជាង ១៣០នាក់ បានចុះចតខុសផ្លូវ នៅព្រលានយន្ដហោះ នៃកោះបាលី ប្រទេសឥណ្ឌូនេស៊ី ហើយបានធ្លាក់ចុះទៅក្នុងទឹកសមុទ្រ តែ​មិន​បានធ្វើអោយមាន ជនរងគ្រោះទេ។

យន្ដហោះ ប៊ូអីញ ៧៣៧ ក្រោយពេលធ្លាក់ក្នុងសមុទ្រ។

ប្រធាននាយកដ្ឋានដឹកជញ្ជូនតាមផ្លូវអាកាស នៃក្រសួងដឹកជញ្ជូនប្រទេសឥណ្ឌូនេស៊ី លោកហារី បាកទី (Herry Bhakti) បានថ្លែងប្រាប់អ្នកសារព័ត៌មានថា «អ្នកដំណើរទាំងអស់ នៅលើយន្ដហោះ ប៊ូអ៊ីញ ៧៣៧ (Boeing 737) នៃក្រុមហ៊ុន​អាកាសចរណ៍ ឡាយអន អ៊ែរ ដែលមានសេវាកម្មថោក បានរួចរស់មានជីវិតទាំងអស់»។

យន្ដហោះ ដែលដឹកអ្នកដំណើរ«ជាង១៣០នាក់» បានចុះចតខុសផ្លូវ នៃព្រលានយន្ដហោះអន្តរជាតិ នៃកោះបាលី មុន​នឹង​បានធ្លាក់ទៅក្នុងសមុទ្រ ដែលនៅក្បែរនោះ។ យន្តហោះ បានខូតខាតជាទម្ងន់។ លោកហារី បាកទី មិនអាចបញ្ជាក់បានទេ ពីអ្នកដំណើរដែលរងរបួស នៅក្នុងគ្រោះថ្នាក់នេះ។ អ្នកសារព័ត៌មានរបស់ ទីភ្នាក់ងារសារព័ត៌មានបារាំង អាអេហ្វប៉េ បាន​ឃើញអ្នកដំណើរ៧នាក់ ដែលទំនងជាជនជាតិឥណ្ឌូនេស៊ីទាំងអស់ បានមកដល់មន្ទីរពេទ្យ តាមរថយន្ដសង្គ្រោះ។ អ្នក​ដំណើរទាំងនេះ បានរងរបួសស្រាល នៅត្រង់ក្បាល និងនៅលើអវយវៈ។

ក្រុមហ៊ុនហាមឃាត់ មិនអោយហោះនៅអ៊ឺរ៉ុប និងអាមេរិក

សូមបញ្ជាក់ថា កោះបាលី ជាទិសដៅទេសចរណ៍ ដ៏ធំមួយសម្រាប់អ្នកទេសចរណ៍បរទេស រាប់លាននាក់ ក្នុងមួយឆ្នាំៗ។ ក្រុមហ៊ុនអាកាសចរណ៍ ឡាញអន អ៊ែរ ជាក្រុមហ៊ុនអាកាសចរណ៍ឯកជនធំជាងគេ នៅឥណ្ឌូនេស៊ី។ ក្នុងប៉ុន្មានឆ្នាំចុង​ក្រោយនេះ ក្រុមហ៊ុនបានស្គាល់នូវចំណូលកើនឡើង យ៉ាងខ្លាំង ដោយសារតែប្រទេសឥណ្ឌូនេស៊ី ផ្គុំឡើងពីប្រជុំកោះជាង ១៧ ៥០០កោះ និងស្ថានភាពសេដ្ឋកិច្ចដ៏ល្អរបស់ប្រទេស បានកើនឡើង ៦%ក្នុងមួយឆ្នាំ។

ក្រុមហ៊ុន ឡាញអន អ៊ែរ នេះ ទើបនឹងបញ្ជាទិញយន្ដហោះ ដ៏ធំសម្បើមមួយនៅក្នុងប្រវត្តិអាកាសចរណ៍ពិភពលោក នូវ​យន្ដហោះអ៊ែប៊ូស ប្រភេទ អា៣២០ (Airbus A320) ចំនួន២៣៤គ្រឿង ក្នុងទឹកប្រាក់១៨,៤ពាន់លានអ៊ឺរ៉ូ (ប្រមាណជា ២៤,១ពាន់លានដុល្លា)។ កាលពីឆ្នាំ២០១១ ក្រុមហ៊ុននេះក៏បានបញ្ជាទិញយន្ដហោះ ប៊ូអ៊ីញ ធុន ៧៣៧ ចំនួន២៣០​គ្រឿង​ដែរ នៅក្នុងទឹកប្រាក់ ២១.៧ពាន់លានដុល្លា (ប្រមាណជា ១៧ពាន់លានអ៊ឺរ៉ូ)។

អ្នកជំនាញបានបារម្ភថា ការវិវត្តន៍លឿនខ្លាំងទៅមុខបែបនេះ នឹងទាក់ទងយ៉ាងខ្លាំងខានមិនបាន ទៅបញ្ហាផ្នែកបច្ចេក​ទេស និងសុវត្ថិភាព។ ក្រុមហ៊ុនដែលទើបមានអាយុ ១៣ឆ្នាំនេះ ត្រូវបានហាមឃាត់ មិនអោយធ្វើការហោះហើរ ក្នុងលំហ​មេឃ​នៅអ៊ឺរ៉ុប និងនៅសហរដ្ឋអាមេរិកទេ។

អ្នកជំនាញមួយចំនួនទៀត ក៏បាននិយាយដែរថា កង្វះអ្នកបើកបរយន្ដហោះ ប្រកបដោយបទពិសោធន៍ខ្ពស់ នៅឥណ្ឌូនេស៊ី ក៏ជាបញ្ហាមួយដ៏សំខាន់ដែរ ដើម្បីបញ្ជាយានយន្ដប្រកបដោយសុវត្ថិភាព៕

------------------------------------------------
ដោយ ៖ កេសរកូល - ភ្នំពេញ ថ្ងៃទី១៣ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ