ទស្សនាវដ្ដីមនោរម្យ.អាំងហ្វូ សូមលើកយកមហា​ភេវរកម្ម​ទាំងប្រាំ ដែលបានវាយប្រហារសហរដ្ឋអាមេរិក ខ្លាំង​ជាងគេ នៅក្នុង​រយៈ​ពេល​២០​ឆ្នាំចុងក្រោយ មកជម្រាបជូនដូចតទៅ៖

- អារីហ្សូណា ថ្ងៃទី០៩ ខែតុលា ឆ្នាំ១៩៩៥៖ ក្រុមមួយដែលអះអាងថា ជា«កូនប្រុសរបស់ជេស្តាប៉ូ (Gestapo)» បាន​ចេញមកទទួលខុសត្រូវ ចំពោះអំពើរភេវរកម្មនេះ ដែលបង្កឡើងទៅលើរថភ្លើង ដែលរត់​ភ្ជាប់ពីក្រុង មីអាមី (Miami) ទៅកាន់ក្រុង ​ឡូស អេនជឺឡេស (Los Angeles)។ ការវាយប្រហារ ដែលបានធ្វើមនុស្ស​ម្នាក់ស្លាប់ និង​៨០នាក់ផ្សេងទៀត​រងរបួសនេះ មានលក្ខណៈប្រហាក់ប្រហែល ទៅនឹងការវាយសម្រុកមួយ របស់កង​កម្លាំង​ប្រដាប់​អាវុធអា​មេរិក ទៅ​លើគ្រឹស្ថាន​សាសនា​មួយ នៅក្រុង វ៉ាកូ (Waco) រដ្ឋតិចសាស់ ក្នុងឆ្នាំ១៩៩៣ ដែល​បាន​សម្លាប់​​មនុស្ស​​អ្នក​ជឿ​សាសនា​នៅទីនោះ  (ក្រុងវ៉ាកូ) ចំនួន ៨០នាក់។

កំណត់ត្រា​ពីរសន្លឹក ចុះហត្ថាលេខាដោយ «កូនប្រុសរបស់ជេស្តាប៉ូ» ត្រូវបានរកឃើញ។ សាក្សីជាច្រើន ដែល​ត្រូវ​បាន​សាកសួរ​ដោយកាសែត វ៉ាស៊ីនតោន ប៉ុស្ដ៍ (Washington Post) បានឲ្យដឹងថា កំណត់ត្រាមួយ ពីក្នុង​ចំណោម​​កំណត់ត្រា​ទាំងនោះ ជាកំណាព្យមួយបទ ដែលនិយាយពីបុព្វហេតុ ប្រឆាំងរដ្ឋអំណាច​សហព័ន្ធ​អាមេរិក ហើយមាន​ទម្រង់​​​ដូច ឬមាន​ទាក់ទង​​ទៅនឹង​សំនុំរឿង​នៅក្រុង វ៉ាកូ។

- អូក្លាអូម៉ាស៊ីធី ថ្ងៃទី១៩ ខែមេសា ឆ្នាំ ១៩៩៥៖ ភេវរកម្មមួយ ដែលបណ្ដាលមកពីរថយន្ដចតចោល បានបំផ្ទុះ​អាគារ​សហព័ន្ធ នៅក្រុង អូក្លាអូម៉ាស៊ីធី ធ្វើអោយមនុស្ស១៦៨នាក់ស្លាប់ និងច្រើនជាង៥០០នាក់រងរបួស។ អ្នក​ទទួល​ខុសត្រូវ ឈ្មោះ ទីម៉ូធី ម៉ាកវ៉ីជ៍ (Timothy McVeigh) ជាសមាជិកមួយរូប នៃកងកម្លាំងប្រដាប់​អាវុធ​ខុស​ច្បាប់ ស្និត​នឹងក្រុមស្ដាំនិយមជ្រុល ដែលបានកកើតជារូបរាង​ឡើង នៅឆ្នាំ១៩៨០ ដើម្បីប្រឆាំងនឹង ការហាម​ឃាត់ មិន​ឲ្យ​ប្រើប្រាស់​អាវុធជាតិផ្ទុះ។

អំពើភេវរកម្មនេះ បានបង្កអោយមានវិនាសកម្មខ្លាំងជាងគេ ក្នុងប្រវត្តិសាស្ត្ររបស់​សហរដ្ឋអាមេរិក រហូតមក​ទល់​​នឹង​​ភេវរកម្ម ​ថ្ងៃទី១១កញ្ញាឆ្នាំ២០០១។ ជនបង្កត្រូវបានរកឃើញថាមានទោស និងទទួលការកាត់ទោស​ប្រហារ​​ជីវិត នៅឆ្នាំ​២០០១ ដោយ​សាលក្រមតុលាការ នៅឆ្នាំ១៩៩៧។

- អាត្លង់តា ថ្ងៃទី២៧ខែកក្កដា ឆ្នាំ១៩៩៦៖ គ្រាប់បែកមួយគ្រាប់ បានបំផ្ទុះខ្លួននៅក្នុងឧទ្យាន សេនតឺនែរ (Centenair) ខណៈល្បែងអូឡាំពិក កំពុងត្រូវបានធ្វើនៅទីនោះ ហើយបានបង្កអោយមនុស្សពីរនាក់ស្លាប់ និង​១១នាក់​ផ្សេង​ទៀត​រងរបួស។ អ្នកបង្កឈ្មោះ អេរិក រ៉ូប៊ែរ រ៉ូដូលហ្វ៍​ (Eric Robert Rudolph) ស្និតនឹងកង​កម្លាំង​ប្រដាប់​អាវុធ​ខុសច្បាប់ និង​ចលនាសាសនានិយមជ្រុលមួយ ដែលមិនពេញចិត្តនឹងរដ្ឋាភិបាលសហព័ន្ធ។ ជន​នេះ​ត្រូវបានចាប់ខ្លួន ប៉ុន្មានឆ្នាំ​ក្រោយ​មក ដោយបានតាំងខ្លួនជា អ្នកកាន់សាសនាកាតូលីក តាមបែបពួក​រ៉ូម៉ាំង (ជនជាតិអ៊ីតាលីជំនាន់ចក្រភពរ៉ូម) ដើម្បីបុព្វហេតុមួយ៖ នោះ គឺធ្វើ​សង្គ្រាមបិតបញ្ចប់ការសម្លាប់ជីវិត ដោយការ​«រំលូត​​កូន»។

- វលត្រេដសេនធើរ ថ្ងៃទី២៦ ខែកុម្ភៈ ឆ្នាំ១៩៩៣៖ អំពើភេវរកម្ម ប្រឆាំងនឹងអាគារភ្លោះ វលត្រេដសេនធើរ (World Trade Center ) នៅទីក្រុងញ៉ូយកនេះ បានធ្វើអោយមនុស្ស៦នាក់ស្លាប់ និងជាង១០០០នាក់របួស។ គ្រាប់​​បែក​មួយគ្រាប់ ត្រូវបានបង្កៃ ក្នុងចំណតរថយន្ដក្រោមដី ហើយបានបំផ្ទុះខ្លួន ធ្វើអោយបាក់ដីប្រមាណជា ៣០ម៉ែត្រ​​ជុំវិញ ជម្រៅ​ប្រមាណ​ជា៦០ម៉ែត្រ និងធ្វើឲ្យមានអគ្គិភ័យឆាបឆេះឡើង។ ភេវរករនិយមអ៊ីស្លាម​បួន​នាក់ ត្រូវបាន​​ចាប់​ខ្លួន និងកាត់អោយ​ជាប់​ទោសក្នុងពន្ធនាគារ ចំនួន២៤០ឆ្នាំ នៅខែឧសភាឆ្នាំ១៩៩៤។

ភេវរកម្ម​នេះ ត្រូវបានរកឃើញ​ដូចគ្នា ថាត្រូវទទួលខុសត្រូវ​ ដោយ​មេចលនា​និយម​អ៊ីស្លាមម្នាក់ នៅប្រទេស​អេហ្សីប ឈ្មោះ អូម៉ា អាដែល រ៉ាម៉ាន (Omar Abdel Rahmane)។ ជននេះ ត្រូវបានចាប់ខ្លួន និងដាក់ទោស ឲ្យ​ជាប់​ពន្ធនាគារ អស់​មួយជីវិត ដោយ​ប្រព័ន្ធយុត្តិធម៌អាមេរិក នៅឆ្នាំ១៩៩៦។

- ទីក្រុងញ៉ូយក វ៉ាស៊ីនតោន និងភីតស្បើន ថ្ងៃទី ១១ខែកញ្ញា ឆ្នាំ២០០១៖ យន្ដហោះចំនួនបួនគ្រឿង ត្រូវ​បាន​បង្ហោះ អោយទៅបុក វលត្រេដ សេនធើរ កណ្ដាលទីក្រុងញ៉ូយក នៅម៉ោង៨និង៤៦នាទី និងមួយទៀត នៅ​ម៉ោង​០៩​​និង០៣នាទី - យន្តហោះទីបី បានទៅបុកមន្ទីប៉ង់តាហ្គោន នៅម៉ោង០៩និង៣៧នាទី និងយន្តហោះ​ទី​បួន មាន​បំណង ​ទៅបុកសេតវិមាន​នៅម៉ោង ១០និង០៣នាទី។ តែយន្ដហោះចុងក្រោយ ត្រូវបានអ្នកបើក​យន្ដហោះ បញ្ជៀសទៅបំបោកខ្លួន នៅផ្នែកអាគ្នេយ៍​នៃ​ទីក្រុងភីតស្បើន (Pittsburgh) វិញ។ តុល្យភាពទាំងអស់ ​និង​ចុង​ក្រោយ ពីវិនាសកម្មបង្កដោយ​យន្ដហោះទាំងបួន បានធ្វើ​អោយមនុស្ស ២៩៧៦នាក់ស្លាប់ និងរាប់ពាន់​នាក់​ផ្សេង​ទៀត រងរបួស។

ភេវរជន១៩នាក់ ត្រូវបានកំណត់អត្តសញ្ញាណ នៅក្នុងព្រឹត្តិការណ៍នេះ។ បណ្ដាញភេវរនិយមអាល់កៃដា (Al Qaida) និងមេចលនានេះ អូសាម៉ា​ប៊ែនឡាដេន (Oussama Ben Laden) បាន​ប្រកាសទទួល​ស្គាល់ ថាជា​អំពើ​របស់​​ខ្លួន នៅមួយឆ្នាំក្រោយមក។ ជនម្នាក់​ឈ្មោះ ខាអីដ ឆេក មហាមេដ (Khalid Cheikh Mohammed) ដែល​ត្រូវ​​បាន​​ស្គាល់ថា ជាអ្នកទទួល​រៀបចំភេវរកម្មនេះ ត្រូវគេចាប់ខ្លួនបាន​នៅឆ្នាំ​២០០៣ ក្នុងប្រទេសប៉ាគីស្ថាន៕