ព្រឹទ្ធសភាអាមេរិក បានច្រានចោលអត្ថបទវិសោធនកម្មទៅលើច្បាប់មួយ ដែលជាវិធានការដើម្បីធ្វើការត្រួតពិនិត្យ ទៅលើ​អ្នកកាន់អាវុធ​ជាតិ​ផ្ទុះ ក្នុងប្រទេស។ អត្ថបទនេះ ត្រូវបានស្នើសុំដោយរដ្ឋបាលរបស់លោកប្រធានាធិបតី បារ៉ាក់ អូបាម៉ា (Barack Obama) បន្ទាប់ពីព្រឹត្តិការណ៍បាញ់សម្លាប់នៅញ៉ូថោន (Newtown) កាលពីខែធ្នូរឆ្នាំ២០១២កន្លងមក។

លោកបារ៉ាក់ អូបាម៉ាថ្លែងនៅក្រោយពេល ច្បាប់ត្រួតពិនិត្យអាវុធត្រូវបានច្រានចោល។

កំណែទម្រង់ទៅលើច្បាប់គ្រប់គ្រងអាវុធជាតិផ្ទុះ ស្នើសុំដោយប្រធានាធិបតីបារ៉ាក់ អូបាម៉ា បានទទួលបរាជ័យ​យ៉ាង​ជូរចត់​មួយ ចាប់តាំងពីអត្ថបទនេះ បានដាក់ទៅអោយសភាជាន់ទាបពិភាក្សា នៅក្រោយព្រឹត្តិការណ៍បាញ់សម្លាប់នៅក្រុង​ញ៉ូថោន​ក្នុងរដ្ឋកូណេចទីខត (Connecticut)។ អត្ថបទវិសោធនកម្មទៅលើច្បាប់នេះ ត្រូវបានច្រានចោលដោយ វិធានមួយ​ក្នុងចំណោមវិធានទាំងឡាយ នៅព្រឹទ្ធសភាអាមេរិក។

ព្រឹទ្ធសមាជិកជាប់ឆ្នោតបួនរូប មកពីគណបក្សប្រជាធិបតេយ្យ បានរួមដៃជាមួយព្រឹទ្ធសមាជិកដទៃទៀត មកពី​គណបក្ស​សាធារណរដ្ឋ ហើយបានបោះឆ្នោតប្រឆាំងនឹងអត្ថបទច្បាប់នេះ។ ច្បាប់នេះបានបន្ថែមលក្ខខ័ណ្ឌមួយចំនួន ដើម្បីធ្វើការ​ត្រួតពិនិត្យភាពមានទោស ឬរោគចិត្ត ទៅលើនរណាម្នាក់ មុននឹងលក់អាវុធទៅអោយជននោះ បើទោះជាលក់នៅ​តាម​បណ្ដាញអាំងធើណែត ឬនៅតាមផ្សារណាត់ធំ ដែលរៀបចំឡើងដើម្បីលក់អាវុធម្ដងម្កាលក៏ដោយ។

នៅក្នុងច្បាប់ដែលកំពុងស្ថិតជាធរមាននោះ ការត្រួតពិនិត្យត្រូវបានបង្គាប់អោយធ្វើ តែនៅក្នុងហាងលក់អាវុធ​ធម្មតា​ប៉ុណ្ណោះ លើកលែងតែនៅក្នុងរដ្ឋមួយចំនួន ដែលបានបន្ថែមច្បាប់ចែកលក់អាវុធនេះ អោយមានលក្ខណៈតឹងតែង​ជាង។

ថ្ងៃនៃភាពខ្មាសអៀន សម្រាប់ទីក្រុងវ៉ាស៊ីនតោន

ការបដិសេធអត្ថបទវិសោធនកម្មលើច្បាប់នេះ បង្ហាញពីបរាជ័យនៃនយោបាយរបស់ប្រធានាធិបតី បារ៉ាក់ អូបាម៉ា ដែល​បានចំណាយដើមទុននយោបាយយ៉ាងច្រើន ទៅលើប្រធានបទនេះ។ តាំងពីខែមករាកន្លងមក លោកអូបាម៉ា បានធ្វើ​ដំណើរបីដង ទៅកាន់ទីកន្លែងកើតហេតុ និងធ្វើកិច្ចអន្តរាគមន៍ពីរដងពីសេតវិមាន ទាក់ទងនឹងប្រធានបទអាវុធជាតិផ្ទុះ ជាពិសេសដើម្បីផ្ដល់កម្លាំងចិត្តទៅអោយម្ដាយឪពុក ឬញាតិមិត្តនៃជនរងគ្រោះ ដែលបានត្រូវសម្លាប់ដោយ អាដាម ឡេនហ្សា (Adam Lanza) នៅថ្ងៃទី១៤ខែធ្នូរឆ្នាំ២០១២ នៅក្នុងសាលារៀនមួយក្នុងក្រុងញ៉ូថោន។

ក្នុងកិច្ចអន្តរាគមន៍ពីសេតវិមាន នៅថ្ងៃពុធទី១៧ខែមេសានេះ លោកបារ៉ាក់ អូបាម៉ា បានបរិហាពី«សម្លេងភាគតិច» នៃ​ព្រឹទ្ធសភា និងបានចោទប្រកាន់ ពីប្រព័ន្ធ«រារាំង»បោកប្រាស់មួយ ដែលបានធ្វើអោយបរាជ័យ នូវកំណែទម្រង់នេះ។ លោកប្រធានាធិបតី បាននិយាយថា វាជា«ថ្ងៃនៃភាពខ្មាសអៀន សម្រាប់ទីក្រុងវ៉ាស៊ីនតោន»៕

-------------------------------------------------
ដោយ៖ សេក មនោរកុមារ - ប៉ារីស ថ្ងៃទី១៧ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ