ខ្សែបម្រើប្រយុទ្ធ គ្រីស្ទែណូ រ៉ូណាល់ដូ (Cristiano Ronaldo) បាននិយាយថា គាត់មានបំណងចង់ត្រឡប់ទៅក្រុម ម៉ែនឆេស្ទើ យូណៃធីត (Manchester United) ជាថ្មីម្តងទៀត នាពេលអនាគត។

គ្រីស្ទែណូ រ៉ូណាល់ដូ​ នៅក្នុងការប្រកួតបាល់ទាត់ពានរង្វាន់អ៊ឺរ៉ូ ២០១២។

តារាឆ្នើមអន្តរជាតិរបស់ប្រទេសព័រទុយហ្គាល់ បានក្លាយជាវីរបុរស នៅកីឡាដ្ឋាន អូលត្រាហ្វដ (Old Trafford) កំឡុង​ពេល ៦រដូវកាល ដែលគាត់បាននៅជាមួយក្លឹប។ ហើយគាត់ត្រូវបានលក់ទៅកាន់ក្រុម រៀលម៉ាឌ្រីដ (Real Madrid) ក្នុង​តម្លៃឯកត្តកម្មពិភពលោក ៨០លានផោន កាលពីរដូវក្តៅឆ្នាំ២០០៩។

កាសែតអង់គ្លេស Daily Star Sunday បានរាយកាណ៏ថា រ៉ូណាល់ដូ បានប្រាប់ដល់សមាជិកជាន់ខ្ពស់របស់ក្រុម បីសាច​ក្រហម ថាគាត់កំពុងតែពិចារណា ដើម្បីរកមធ្យោយបាយត្រឡប់មកកាន់ក្រុម ម្ចាស់ជើងឯក ព្រីមែលីក (Premier League) វិញ។

កាសែតមួយនេះ ក៏បានបង្ហាញទៀតថា គ្រូបង្វឹកក្រុម ម៉ែនឆេស្ទើ យូណៃធីត សឺអាឡិច ហ្វឺកឺសិន (Sir Alex Ferguson) កំពុងតែព្យាយាម ក្នុងការនាំយកកីឡាករវ័យ ២៨ឆ្នាំ ត្រឡប់មកជួយក្រុម ហើយគាត់ហ៊ានឲ្យតម្លៃ ៦៥លានផោន និង​ប្រាក់ឈ្នួលបន្ថែមទៀត សំរាប់កីឡាកររូបនេះ។

ក្រុមបាល់ទាត់បារាំង ប៉ារីស ហ្សិន ជឺម៉ិន (Paris Saint-Germain) ក៏បានបង្ហាញពីការចាប់អារម្មណ៏ ខ្លាំងណាស់ដែរ នៅ​តាមទំព័រកាសែតនានា។ ក្រុមទាំង២ អាចនឹងមានឱកាសនាំយកកីឡាករឆ្នើម ចេញពីទឹកដីប្រទេសអេស្ប៉ាញ​បាន​នៅ​រដូវក្តៅ ខណៈដែលកិច្ចសន្យារបស់គាត់នៅសល់រយះពេលត្រឹមតែ ១២ខែ ទៀតតែប៉ុណ្ណោះ។

រ៉ូណាល់ដូ បានឈ្នះពានរង្វាន់ព្រីមែលីកចំនួន ៣លើក និងឆែមពានលីក (Champions League) ១លើក កំឡុងពេលគាត់​លេងឲ្យក្រុម ម៉ែនញូ។ ប៉ុន្តែគាត់បានលើកពានរង្វាន់ ឡា លីហ្គា (La Liga) របស់អេស្ប៉ាញ បានតែ ១លើកប៉ុណ្ណោះ បន្ទាប់​ពីចំណាយពេល ៤រដូវកាលលេងឲ្យក្រុម រៀលម៉ាឌ្រីដ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៦ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ