ព្យុងយ៉ាងថា ការមកដល់នៃនាវាផ្ទុកយន្ដហោះចម្បាំងអាមេរិក ជា«ការបង្កហេតុ»ធ្ងន់ធ្ងរ
នាវាផ្ទុកយន្ដហោះចម្បាំងរបស់សហរដ្ឋអាមេរិក នឹងចូលរួមក្នុងថ្ងៃខាងមុខ នៅក្នុងសមយុទ្ធរួមគ្នារវាងសហរដ្ឋអាមេរិក និងកូរ៉េខាងត្បូង។ ប៉ុន្តែសកម្មភាពនេះ ត្រូវបានថ្កោលទោសដោយទីក្រុងព្យុងយ៉ាង។
ក្រុមនាវា និងនាវាផ្ទុកយន្ដហោះចម្បាំងអាមេរិក នីមីត។
កូរ៉េខាងជើងបានបរិហារនៅថ្ងៃអាទិត្យនេះ ថាជាការបង្កហេតុដ៏ធ្ងន់ធ្ងរមួយ នៅបន្ទាប់ពីការមកដល់ឈូងសមុទ្រនៃប្រទេសកូរ៉េខាងត្បូង នូវក្រុមនាវារបស់អាមេរិក ដែលនាំមុខដោយនាវាផ្ទុកយន្ដហោះចម្បាំង នីមីត (Nimitz) ក្នុងបំណងមកធ្វើសមយុទ្ធរួមគ្នា។ ក្រុមនាវាទាំងនោះ រួមមាននាវាចាប់កាំជ្រួច និងនាវាល្បាត ដែលមានផ្ទុកយន្ដហោះចម្បាំង ចំនួន៦៤គ្រឿង។
សមយុទ្ធយោធានេះ បានធ្វើតាមការគ្រោងទុក តែចំពេលដែលស្ថានភាពនៅលើឧបទ្វីបកូរ៉េ នៅកំពុងតឹងតែងនៅឡើយ និងក្រោយតែពីរសប្ដាហ៍ប៉ុណ្ណោះ បន្ទាប់ពីសមយុទ្ធលើកមុន ដែលបានបង្កអោយមានការខឹងសម្បារយ៉ាងខ្លាំងរួចហើយ ពីសំណាក់ទីក្រុងព្យុងយ៉ាង។
គណកម្មាធិការកូរ៉េខាងជើង សម្រាប់ការបង្រួបបង្រួមកូរ៉េដោយអហឹង្សា ទទួលបន្ទុកការងារឧបទ្វីបកូរ៉េ បានបរិហារថា ជាការបង្កហេតុយោធា ដ៏ធ្ងន់ធ្ងរ ជម្រុញអោយមានភាពតានតឹងកាន់តែខ្លាំង។
ភាពតានតឹងលាប់មកវិញ !
«ការហ្វឹកហាត់ទាំងនេះ មានរួមទាំងការប្រើប្រាស់អាវុធធុនធ្ងន់ និងទំនើប ព្រមទាំងនាវាផ្ទុកយន្ដហោះចម្បាំងនុយក្លេអ៊ែរផង នឹងបង្កើតឲ្យមានការគាស់កកាយបន្លំភ្នែកមួយឡើង និងបង្ហាញអោយឃើញថា បំណងរបស់ពួកគេដើម្បីឈ្លានពានយើង បានចូលដល់ដំណាក់កាលមួយ ដែលគ្មានការទទួលខុសត្រូវ» គណកម្មាធិការនោះ បានបញ្ជាក់ឡើង។ ប្រទេសកូរ៉េខាងត្បូង និងសហរដ្ឋអាមេរិក បានធ្វើរួមគ្នារួមម្ដងហើយ កាលពីថ្ងៃទី៣០ខែមេសា នូវសមយុទ្ធដ៏ធំសម្បើម ដែលបានប្រមូលកងទ័ពកូរ៉េខាងត្បូង ក្នុងរយៈពេលពីរខែ និងកងទ័ពអាមេរិកប្រមាណជាមួយភាគបួននៃកងទ័ពទាំង២៨៥០០នាក់ ដែលមានវត្តមានស្រាប់នៅលើទឹកដីកូរ៉េខាងត្បូង។
ទីក្រុងព្យុងយ៉ាងបានថ្កោលទោស ការហ្វឹកហាត់ប្រចាំឆ្នាំនេះ ថាវាប្រហាក់ប្រហែលនឹងការឈ្លានពាន ទៅលើទឹកដីរបស់ខ្លួនដោយប្រទេសកូរ៉េខាងត្បូង និងមានការគាំទ្រពីសហរដ្ឋអាមេរិក។
ឧបទ្វីបកូរ៉េ បានស្គាល់នូវភាពតានតឹងម្ដងហើយម្ដងទៀត ជាពិសេសនៅក្រោយការបាញ់សាកល្បងរបស់កូរ៉េខាងជើង កាលពីខែធ្នូឆ្នាំទៅម៉ិញ នូវកាំជ្រួចរយៈមធ្យម ដែលកូរ៉េខាងត្បូងបានចាត់ទុកថា ជាកាំជ្រួចបញ្ជាពីចម្ងាយ និងការសាកល្បងកាំជ្រួចនុយក្លេអ៊ែរលើកទីបីរ របស់ប្រទេសកុម្មុយនីស៕
-------------------------------------------------
ដោយ ៖ កេសរកូល - ភ្នំពេញ ថ្ងៃទី១២ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ