ចាប់ពីថ្ងៃទីបីខែមិថុនានេះទៅ ការផ្សាយជាខេមរភាសារបស់វិទ្យុបារាំងអន្តរជាតិ នឹងបង្កើនម៉ោងផ្សាយរបស់ខ្លួន រហូតដល់​១៤ម៉ោងក្នុងមួយថ្ងៃ ដែលកន្លងមកផ្សាយតែមួយម៉ោងប៉ុណ្ណោះ។

រូបថតចម្លងពីអេក្រង់របស់គេហទំព័រនៃវិទ្យុបារាំងអន្តរជាតិជាខេមរភាសា។

គេត្រូវនិយាយថា មហិច្ឆតារបស់វិទ្យុបារាំង មានទំហំធំធេងណាស់ ក្នុងការផ្ដល់ទៅឲ្យអ្នកស្ដាប់ជាជនជាតិកម្ពុជា សម្រាប់​រយៈពេល រហូតដល់ទៅ១៤ម៉ោងក្នុងមួយថ្ងៃ។ មុននឹងមកដល់ថ្ងៃនេះ វិទ្យុជាភាសាខ្មែរនេះ បានធ្វើការផ្សាយរបស់ខ្លួន​ក្នុង​រយៈពេលមួយម៉ោង តែជាមួយនឹងបុគ្គលិកជាអ្នកកាសែតប្រាំរូប នៅប្រទេសបារាំង ចេញផ្ទាល់ពីទីក្រុងប៉ារីស និងអ្នក​ឆ្លើយ​ឆ្លងព័ត៌មានមួយចំនួនទៀត នៅប្រទេសកម្ពុជាប៉ុណ្ណោះ។

ប៉ុន្តែចាប់ពីថ្ងៃទី០៣ខែមិថុនានេះទៅ នៅការិយាល័យនៅភ្នំពេញ នឹងមានបុគ្គលិកធ្វើការ កើនដល់ទៅ១៥នាក់ ដើម្បីធ្វើការ​ផ្សព្វផ្សាយឡើងដល់១៤ម៉ោង ជាមួយនឹងកម្មវិធីថ្មីៗជាច្រើនរបស់ខ្លួន។ បុគ្គលិកទាំងនោះ បានហ្វឹកហាត់ក្នុង​ការផ្សាយ​សាក​ល្បង ដែលមិនបានដាក់ជាសាធារណៈ តាំងពីច្រើនថ្ងៃមកហើយ។

ស្រង់សម្ដីដោយ គេហទំព័ររបស់វិទ្យុបារាំងនៅប៉ារីស នាយកការផ្សាយជាភាសាខ្មែរ លោក ហ្សង់ ហ្វ្រង់ស៊័រ តាន់ (Jean-François Tain) ជាជនជាតិបារាំង ដើមកំណើតខ្មែរ បានពន្យល់ថា «អ្នកកាសែតនៅប៉ារីស នឹងធ្វើអ្វីៗដែលទាក់ទង​នឹង​បទ​វិភាគ  ឬប្រវត្តិសាស្ត្រ ជាដើម។ តែនៅទីក្រុងភ្នំពេញ យើងនឹងផ្សាយពីព័ត៌មាន និងកម្មវិធីកំសាន្ដផ្សេងទៀតជាច្រើន។»

ការផ្សាយនឹងធ្វើពីម៉ោង ០៧ព្រឹក ដល់ម៉ោង០៩យប់ ម៉ោងនៅស្រុកខ្មែរ។ កម្មវិធីព័ត៌មាន នឹងបែងចែកជាបីពេល ម៉ោង៧​ទៅ​៨ព្រឹក ម៉ោង០១ទៅ០២រសៀល និងម៉ោង០៧ទៅ០៩យប់។

ជំនួយការនាយករបស់ស្ថានីយវិទ្យុបារាំងអន្តរជាតិ ផ្នែកភាសាបរទេស លោក ប៉ាទ្រីក ម៉ាតាំង (Patrice Martin) បានថ្លែង​បញ្ជាក់ តាមរយៈគេហទំព័ររបស់ស្ថានីយវិទ្យុនៅបារាំងដែរថា «យើងសម្រេចចិត្ត នឹងមិនចូលទៅប្រកួតប្រជែងជាមួយនឹង ប្រព័ន្ធផ្សព្វផ្សាយក្នុងស្រុក ឬនៅអន្តរជាតិនោះទេ។ ដូច្នេះម៉ោងផ្សាយព័ត៌មានរបស់យើង មានលក្ខណៈយឺតជាងគេបន្តិច។ យើងលើកតម្លៃរបស់យើង ជាពិសេសរូបភាពសម្រាប់វិទ្យុបារាំងអន្តរជាតិ ក្នុងនោះមានការស្ថិតនៅក្បែរ និងភាពយកជា​បាន​ការ។»

ដោយសារការិយាល័យថ្មីរបស់វិទ្យុបារាំង នៅទីក្រុងភ្នំពេញស្ថិតនៅជាន់ទី២១នៃអាគារកាណាឌីយ៉ាដ៏ខ្ពស់នោះ លោក​នាយកការផ្សាយ​ជា​ខេមរភាសា បាននិយាយដោយមោទនភាពថា «អាគារនេះប្រៀបបាននឹងរូបភាពរបស់យើង។ (...) ពី​ទីនេះ យើងមាន​សំណាងនឹងបានឃើញទីក្រុងភ្នំពេញទាំងមូល។ ជាពេលវេលាសម្រាប់យើង ដែលត្រូវចាប់អង្រួន​បេះដូង​របស់​ប្រជាជនកម្ពុជា ដែលមិនសូវនិយាយភាសាបារាំង តែចូលចិត្តរបៀបបារាំង៕»

---------------------------------------------------
ដោយ សេក មនោរកុមារ - ប៉ារីស​ ថ្ងៃទី០៣ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ