ច្រើនជាង១០០នាក់បានបាត់បង់ជីវិត នៅក្នងអគ្គិភ័យដ៏ខ្លាំងមួយ ដែលបានឆាបឆេះ កសិដ្ឋានចិញ្ចឹមនិងជាមន្ទីរសតឃាត​សត្វស្លាបមួយកន្លែង នៅព្រឹកថ្ងៃច័ន្ទទី០៣ខែមិថុនានេះ ផ្នែកខាងឦសាននៃប្រទេសចិន។ វិនាសកម្មនេះ បានក្លាយជា​គ្រោះថ្នាក់​ខ្លាំងជាងគេ ក្នុងរយៈពេល១២ឆ្នាំចុងក្រោយនេះ នៅក្នុងវិស័យឧស្សាហកម្មនៃប្រទេសចិន។

អ្នករបួស ដែលត្រូវបានគេដឹកមកជួយសង្គ្រោះ។

មួយភាគធំ នៃរោងសតឃាតសត្វស្លាបបាវយ័ន (Baoyuan) ក្នុងខេត្តជីលីង (Jilin) ផ្នែកឦសាននៃប្រទេសចិន  ត្រូវបាន​ព្រះអគ្គិដុតឆេះបំផ្លាញ ហើយកម្មកបម្រើការនៅក្នុងនោះ ប្រមាណជា ៣០០នាក់ បានជាប់គាំងនៅក្នុងអាគារ ខណៈពេល​អគ្គិភ័យបានឆាបឆេះឡើង។ ហេតុការណ៍បានកើតឡើង នៅម៉ោងប្រមាណជា០៦ព្រឹក ថ្ងៃច័ន្ទទី០៣ខែមិថុនានេះ។

ក្រុមអ្នកជួយសង្គ្រោះបានរកឃើញសាកសពជាច្រើន ដែលសុទ្ធសឹងជាអ្នកធ្វើការ នៅក្នុងអាគារនោះ។ ការិយាល័យ​ព័ត៌មាននៃខេត្តជីលីង បានប្រាប់ឲ្យដឹងថា មនុស្ស១១២នាក់បានស្លាប់ បន្ទាប់ពីតុល្យភាពដំបូងថា មនុស្សស្លាប់៤៣នាក់។

ភ្នាក់ងារសារព័ត៌មានចិន ស៊ីនហួបានរាយការណ៍ថា ភ្លើងបានចាប់ផ្ដើមរាលដាល ដោយមកពីការផ្ទុះបីដងផ្ទួនគ្នា ទំនងជា​មកពីបញ្ហាខ្សែរចរន្ដអគ្គិសនី។ មិនមានចាប់ខ្លួនអ្នកទទួលខុសត្រូវណាម្នាក់នៅឡើយទេ ក្នុងរឿងនេះ តែអាជ្ញាធរចិន​បាន​ប្រកាសថា ការស៊ើបអង្កេតមួយត្រូវបានបើកធ្វើឡើង។

ក្រុមហ៊ុនគ្រប់គ្រងកសិដ្ឋានសត្វស្លាបនេះ ជាសហគ្រាសដ៏ធំមួយ ដែលបង្កើតឡើងក្នុងឆ្នាំ២០០៩ ហើយមានបុគ្គលិក​ធ្វើការយ៉ាងហោចណាស់ ៣០០០នាក់ និងផលិតសាច់សត្វប្រមាណជា ៦៧០០០តោន ក្នុងមួយឆ្នាំ៕

ខាងក្រោមនេះ ជារូបភាព​និងវីដេអូ ស្ដីពីគ្រោះថ្នាក់នេះ៖

---------------------------------------------------
ដោយ សេក មនោរកុមារ - ប៉ារីស​ ថ្ងៃទី០៣ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ