ក្រុមហ៊ុន «MCM Construction» ដែលចូលរួមសាងសង់ស្ពាននោះ បានអះអាង នៅលើទំព័រហ្វេសប៊ុករបស់ខ្លួនថា យ៉ាងហោចណាស់ មនុស្សម្នាក់ បានស្លាប់បាត់បង់ជីវិត និងច្រើននាក់ផ្សេងទៀត បានរងរបួស។ ក្រុមហ៊ុននេះ ជាក្រុមហ៊ុនមួយ ពីក្នុងចំណោមក្រុមហ៊ុនពីរ «MCM Construction» និង«FIGG Bridge Design» ដែលបានរួមគ្នា សាងសង់ស្ពាន សម្រាប់អ្នកថ្មើរជើង ដែលភ្ជាប់ទៅកាន់ផ្លូវចូល នៃសាកលវិទ្យាល័យអន្តរជាតិ ផ្លរីដា (FIU) នៃក្រុងមីអាមី។

បើតាមរូបភាពវីដេអូ ដែលត្រូវបានផ្សាយ នៅតាមកញ្ចក់ទូរទស្សន៍ និងនៅលើបណ្ដាញសង្គម គេឃើញរថយន្ដជាច្រើនគ្រឿង ត្រូវបានបំណែកបេតុងរបស់ស្ពាន ធ្លាក់សង្កត់ពីលើ។ រថយន្ដស្ទូចដ៏ធំមួយ រួមជាមួយនឹងរថយន្ដជួយសង្គ្រោះជាច្រើន ត្រូវបានបញ្ជូនទៅដល់កន្លែង ដើម្បីលើកបំណែកបេតុង និងជួយសង្គ្រោះជនរងគ្រោះ។

THE FIU BRIDGE COLLAPSED OH MY GOD pic.twitter.com/JO7jfx5AoN

— Gabriela Collazo (@GabrielaRose12) 15 mars 2018

ស្ពាននេះ ដែលបំណែករបស់វា ទើបត្រូវបានយកមកផ្គុំ កាលពីថ្ងៃសៅរ៍មុននេះ ជាគម្រោងមួយ របស់សាកលវិទ្យាល័យ «FIU» ដើម្បីបញ្ជៀសគ្រោះថ្នាក់ សម្រាប់និស្សិតរបស់ខ្លួន ដែលត្រូវធ្វើដំណើរ ចេញចូលរវាងអន្តេវាសិកដ្ឋាន និងសាកលវិទ្យាល័យ។ នៅក្នុងសេចក្ដីប្រកាសព័ត៌មានមួយ ដែលបានចេញផ្សាយភ្លាមៗ សាកលវិទ្យាល័យ «FIU» បានសំដែងក្ដី«រន្ធត់ និងក្ដុកក្ដួល» ចំពោះហេតុការណ៍​ខាងលើ។

បើតាមសារព័ត៌មាន «Miami Herald» ដែលបានអត្ថាធិប្បាយយ៉ាងច្រើន ពីស្ពានខាងលើ កាលពីចុងសប្ដាហ៍មុន បានឲ្យដឹងថា សំណង់មួយនេះ មានទំងន់៩៥០តោន និងត្រូវដាក់ឲ្យប្រើប្រាស់ នៅឆ្នាំ២០១៩។

សាកលវិទ្យាល័យ បានចំណាយប្រមាណជា ៩,៣ លានដុល្លារ ដើម្បីសម្រេចបានស្ពានមួយ ប្រវែង១០០ម៉ែត្រ ដែលមានលក្ខណៈល្អស្អាត និងទំនើប។ ថវិការបស់សាកលវិទ្យាល័យ មិនបានរាប់បញ្ចូលផងទេ នូវថវិកាបដិភាគ ដែលផ្ដល់ដោយ ក្រសួងដឹកជញ្ជូនសាធារណៈ ដែលមានប្រមាណ ជា១១លានដុល្លារ បន្ថែមទៀត៕

This is the scene at @FIU after bridge collapse. Police moving media away “just in case the rest falls down.” @MiamiHerald pic.twitter.com/wqurS5IZTQ

— Monique O. Madan (@MoniqueOMadan) 15 mars 2018