បន្ទាប់ពីជំនួបពីរថ្ងៃ នៃកិច្ចចរចារដ៏ចង្អៀត ប្រទេសមហាអំណាចឧស្សាហកម្មទាំង៨ បានរកឃើញនូវចំនុចរួមគ្នាមួយ​ចំនួន ក្នុងនោះការយល់ស្របក្នុងការប្រឆាំងការកាត់បន្ថយពន្ធ បដិសេធប្រាក់ថ្នូរ ក្នុងករណីទាមទារដោយពួកភេវជន​ចាប់​ជម្រិត និងការព្រមព្រៀងរួមមួយចំនួន ទាក់ទងនឹងវិបត្តិនៅប្រទេសស៊ីរី។

មេដឹកនាំទាំងដប់រូប នៃជំនួបហ្សេ៨។

នៅក្នុងទឹកដីនៃប្រទេសអៀរឡង់ខាងជើង ប្រទេសមហាអំណាចខាងផ្នែកឧស្សាហកម្មទាំង៨ រួមមាន អាឡឺម៉ង់ កាណាដា អាមេរិក បារាំង អ៊ីតាលី ជប៉ុន អង់គ្លេស និងរ៉ូស្សី បានជួបប្រជុំគ្នាក្នុងរយៈពេលពីរថ្ងៃ ហើយនៅទីបំផុតបានចេញ​សេចក្ដី​ប្រកាសរួមគ្នា នៅលើចំនុចបីធំៗ ដែលកើតមាននៅលើពិភពលោក។ ក្នុងជំនួបនោះ ក៏មានវត្តមានមេដឹកនាំ​សហគមន៍​​អ៊ឺរ៉ុប ដូចជា​ប្រធានក្រុមប្រឹក្សាអ៊ឺរ៉ុប លោក ហែម៉ាន់ វ៉ាន រ៉ុមពីរ (Herman Van Rompuy) និងប្រធានគណៈ​កម្មាធិការ​អ៊ឺរ៉ុប លោក ជូហ្សេ ម៉ានូអែល ប៉ារូស្សូ (José Manuel Barroso) នោះ បានមកចូលរួមដែរ។

កាត់បន្ថយពន្ធ

នៅក្នុងសេចក្ដីប្រកាសពត៌មាន ចេញផ្សាយនៅថ្ងៃល្ងាចអង្គារ ជំនួបហ្សេ៨ បានត្រៀមចេញផ្សាយ នៅតាមប្រទេសជា​សមាជិក​នៃជំនួបនេះរៀងៗខ្លួន នូវគម្រោងសកម្មភាពថ្នាក់ជាតិ ដើម្បីជាព័ត៌មានដាក់ឲ្យដឹង ទាក់ទងនឹងក្រុមហ៊ុន​សហគ្រាសទាំង​ឡាយណា ដែលត្រូវប៉ះពាល់ ជាពិសេសក្រុមហ៊ុនសហគ្រាសធំៗ។

និយាយឲ្យស៊ីជម្រៅ ហ្សេ៨ មិនមានបំណងចង់វាយប្រហារលើ សហគ្រាសខ្នាតធំៗ ប៉ុន្មាននោះទេ ព្រោះការកម្រិតច្បាប់​ទម្លាប់តាមរបៀបប្រទេសអង់គ្លេសនេះ នឹងធ្វើឲ្យគ្មានប្រសិទ្ធិភាព ក្នុងសកម្មភាពប្រយុទ្ធប្រឆាំង នឹងការរត់គេចពន្ធ របស់​ពួកអ្នកមានប្រាក់គ្រាក់ៗមួយចំនួន។

បដិសេធប្រាក់ថ្នូរ

មេដឹកនាំប្រទេសទាំង៨ បានសន្យាបដិសេធ មិនចំណាយប្រាក់ថ្នូរសូម្បីមួយសេនឡើយ នៅក្នុងករណីចាប់ជម្រិតរបស់​ភេវរជន ទៅលើជនជាតិនៃប្រទេសផងខ្លួននោះ ហើយបានអំពាវនាវឲ្យក្រុមហ៊ុនសហគ្រាសទាំងឡាយ ឲ្យទទួលយក​គោលការណ៍នេះ។

សេចក្ដីប្រកាសព័ត៌មាន បានសរសេរថា «យើងច្រានចោល ដោយគ្មានគិតគូរអ្វីឡើយ នូវរាល់ការចំណាយនៃប្រាក់ថ្នូរ ទៅឲ្យពួកភេវរជន ហើយយើងអំពាវនាវទៅប្រទេសពាក់ព័ន្ធ និងបណ្ដាសហគ្រាស ក្នុងពិភពលោកអោយទទួលយក​គោលការណ៍នេះ»។

ប្រទេសមហាអំណាចឧស្សាហកម្មទាំងប្រាំបី បានបន្ថែមទៀតថា នឹងសហការបញ្ជូនអ្នកជំនាញការ ហើយនឹងជួយគ្នាទៅ​វិញទៅមក នៅក្នុងដំណោះស្រាយ ទាក់ទងនឹងបញ្ហា«ចាប់ជម្រិត»។

រៀបចំសន្និសិតស្ដីពីវិបត្តិនៅស៊ីរី

បន្ទាប់ពីជំនួបអស់រយៈពេលពីរថ្ងៃនេះមក បណ្ដាមេដឹកនាំបានប្រសូតនូវកិច្ចព្រមព្រៀងមួយ ដើម្បីបង្រួមបញ្ហានៅស៊ីរី ដោយបានអំពាវនាវឲ្យរៀបចំ ក្នុងពេលដ៏ខ្លីតាមតែអាចធ្វើបាន នូវសន្និសិតសន្តិភាពមួយ។ ប៉ុន្តែការព្រមព្រៀងនេះ មិន​បាននិយាយដល់ចម្ងល់សំខាន់ៗទាំងឡាយ ដើម្បីឈានទៅដោះស្រាយជម្លោះនោះទេ។

អវត្តមាននៃភាពលំអិតទាំងនេះ បានឆ្លុះបញ្ចាំងពីភាពខ្វែងគំនិតរវាងគ្នាយ៉ាងខ្លាំង រវាងបណ្ដាប្រទេសលោកខាងលិច ដែល​គាំទ្រក្រុមប្រឆាំងស៊ីរី និងទីក្រុងម៉ូស្គូ ដែលជាសម្ព័ន្ធមិត្តគាំទ្រចាក់ទឹកមិនលេច របស់ក្រុងដាម៉ាស។ គ្រាន់តែជំនួប​នោះ​បានបញ្ចប់ ប្រធានាធិបតីរ៉ូស្សី លោក វ្លាឌីមៀរ ពូទីន (Vladimir Poutine) បានថ្លែងសារជាថ្មី ពីលទ្ធភាពក្នុងការបញ្ជូនអាវុធ​បន្ថែមទៀត ទៅឲ្យ​របបស៊ីរីសព្វថ្ងៃ ដែលការថ្លែងនេះ មើលទំនងជាការឆ្លើយតបភ្លាមៗមួយ ពីអ្វីដែលអ្នកសារព័ត៌មាន​សង្កេតឃើញថា វាគ្រាន់តែជាស្នាមញញឹមដែលមានតែសម្បកក្រៅប៉ុណ្ណោះ ពីក្នុងជំនួបកំពូល៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១៨ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ