ខ្សែប្រយុទ្ធក្រុមរៀលម៉ាឌ្រីដ (Real Madrid) ហ្គុនស្ស៊ាឡូ ហៃហ្គូន (Gonzalo Higuain) ត្រូវបានគេរំពឹងថា នឹងធ្វើការផ្ទេរ មក ក្រុមអាសិណល (Arsenal) ជាផ្លូវការនៅថ្ងៃសុក្រស្អែកនេះ បន្ទាប់ពីក្រុមទាំង២ បានចចារត្រូវរូវគ្នាអស់រួចមក។ នេះបើតាម ឳពុករបស់គាត់ ហើយជាភ្នាក់ងាររបស់គាត់ផងនោះ បានបង្ហើបប្រាប់ឲ្យដឹង។

ហ្គុនស្ស៊ាឡូ ហៃហ្គូន កីឡាករខ្សែប្រយុទ្ធរបស់ក្រុមរៀល ម៉ាឌ្រីដ។ (រូបថត Cordon Press)

កីឡាករអន្តរជាតិអាស្សង់ទីនរូបនេះ បានទាក់ទងទៅនឹងការផ្ទេរមកក្រុមកាំភ្លើងធំអាសិណលនេះ ជាង១ខែមកហើយ ប៉ុន្តែ​ពុំទាន់មានការព្រមព្រាងណាមួយកើតឡើងនោះទេ។ ហើយក៏មានពាក្យចចាមអារ៉ាមមួយចំនួន បានលើកឡើងថា ការព្រម​ព្រៀងអាចនឹងមិនកើតឡើង ព្រោះតែក្រុមទាំង២ ស្ថិតនៅជំហរខុសគ្នា ឬឆ្ងាយពីគ្នា។

ប៉ុន្តែពេលនេះ កាំភ្លើងធំអាសិណល បានយល់ព្រមក្នុងតម្លៃប្រមាណ ២២លានផោន (៣៣.៥៧លានដុល្លាសហរដ្ឋអាមេរិក) សម្រាប់កីឡាករវ័យ ២៥ឆ្នាំរូបនេះ ជាមួយនឹងក្រុមរៀលម៉ាឌ្រីដ។

ឪពុករបស់ហ្គុនស្ស៊ាឡូ ហៃហ្គូន លោកជឺច ហៃហ្គូន (Jorge Higuain) បាននិយាយថា៖ «យើងមិនធ្វើការចចារជាមួយ​ក្លឹប​ណា ដោយគ្មានការអនុញ្ញាត ពីម្ចាស់ក្លឹបនោះទេ។ ពេលនេះ យើងបានទទួលការអនុញ្ញាតពីក្រុមរៀលម៉ាឌ្រីដ ហើយ​សង្ឃឹមថា យើងនឹងឃើញកូនប្រុសរបស់ខ្ញុំ ទៅលេងឲ្យក្រុមព្រីមែលីក (Premier League) ក្នុងពេលឆាប់ៗខាងមុខនេះ។»

ការទិញខ្សែប្រយុទ្ធហ្គុនស្ស៊ាឡូនេះ អាចជាផ្លូវដ៏ល្អបំផុតមួយសម្រាប់ក្រុមអាសិណល ដើម្បីដោះស្រាយពីបញ្ហាខ្សែប្រយុទ្ធ បន្ទាប់ពីរដូវកាលមុនក្រុមមួយនេះ តំបន់ប្រយុទ្ធនៅមានកំរិតនៅឡើយ ធ្វើឲ្យរកគ្រាប់ពុំសូវបាន។

កីឡាករអាស្សង់ទីនរូបនេះ បានចូលលេងឲ្យក្រុមអធិរាជសរៀលម៉ាឌ្រីដ ជាង២ឆ្នាំហើយ ប៉ុន្តែកាលពីរដូវកាលមុន គាត់ពុំ​សូវបានបង្ហាញខ្លួនចូលលេងប៉ុន្មានទេ ព្រោះកីឡាករបារាំងការីម បិនស្ស៊ីម៉ា (Karim Benzema) ជាប់ជាជម្រើស១១នាក់​ដំបូងច្រើនជាង ក្រោមការដឹកនាំរបស់លោកជូសេ ម៉ូរីញ៉ូ (Jose Mourinho)។

អតីតខ្សែប្រយុទ្ធក្រុមរីវើផ្លេត (River Plate) រូបនេះ ចូលលេងឲ្យរៀលម៉ាឌ្រីដ បាន១៩ប្រកួត កាលពីរដូវកាលមុន ប៉ុន្តែ​គាត់​អាចទាត់បញ្ចូលទីបាន ១៦គ្រាប់ នៅក្នុងក្របខ័ណ្ឌឡាលីកា (La Liga) អេស្ប៉ាញ។

ដូច្នេះថ្វីជើងហៃហ្គូន ពិតជាមិនធម្មតានោះឡើយ ខណៈដែលអាសិណល មានមហិច្ចតាចង់លើកពានព្រីមែលីក នារដូវ​កាលថ្មីទៀតនោះ កីឡាកររូបនេះនឹងក្លាយខ្សែប្រយុទ្ធដ៏មានឥទ្ធិពលមួយរូប នារដូវកាល ២០១៣-២០១៤៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៤ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ