ទីបំផុតទៅ ដំណាក់កាលដែលឈានទៅដល់ ការបង្កើតគណៈកម្មការចម្រុះ បានចេញជារូបរាងបណ្ដើរៗហើយ។ យើងនឹងចាំ​មើលតទៅទៀត ថាតើគណៈកម្មការនេះ នឹងមានសមសភាពបែបណា ហើយនឹងកំណត់អាយុកាល និងធ្វើការងារ​របស់​ខ្លួន​បានយ៉ាងដូចម្ដេច។

គណៈកម្មធិការជាតិរៀបចំការបោះឆ្នោត (គ.ជ.ប) បានចេញលិខិតនៅល្ងាចថ្ងៃទី០២ខែសីហានេះ ដើម្បីអញ្ជើញឲ្យ​តំណាង គណបក្សប្រជាជនកម្ពុជា និងគណបក្ស​សង្គ្រោះជាតិ មកទីស្នាក់ការនៅថ្ងៃទី០៣ខែសីហា ស្អែកឡើង វេលា​ម៉ោង០៩ព្រឹក ដើម្បីរៀបចំគណៈកម្មការចម្រុះមួយ ធ្វើការស៊ើបអង្កេត និងធ្វើរបាយការណ៍ អំពីភាពមិនប្រក្រតី នៃការ​បោះឆ្នោតជ្រើសរើស​តំណាងរាស្ត្រ និតិកាលទីប្រាំកាលពីថ្ងៃទី២៨ខែកក្កដានេះ។

ក្នុងន័យនេះ គ.ជ.ប ទំនងជាបានទទួលស្គាល់ថា មានភាពមិនប្រក្រតីបានកើតឡើង នៅក្នុងអំឡុងពេលនៃការបោះឆ្នោត កន្លងមក។ នៅក្នុងលទ្ធផលបឋម គណបក្សធំពីរ បានប្រកាសទាមទារជ័យជំនះដាក់គ្នាទៅវិញទៅមក។ គណបក្ស​ប្រជាជនកម្ពុជារបស់លោក នាយករដ្ឋមន្ត្រី ហ៊ុន សែន បានប្រកាសថាខ្លួនឈ្នះកៅអីបាន ៦៨អសនៈ ខណៈដែល​គណបក្សសង្គ្រោះជាតិបានតែ៥៥អសនៈ។ ប៉ុន្តែខាងគណបក្សសង្គ្រោះជាតិវិញ បាននិយាយថាខ្លួនឈ្នះបាន ៦៣កៅអី លើគណបក្សកាន់អំណាចដែលទទួលបានតែ៦០កៅអីប៉ុណ្ណោះ។

បន្ទាប់ពីការបោះឆ្នោតបានមួយថ្ងៃ គណបក្សសង្គ្រោះជាតិ ក៏បានប្រកាសបដិសេធមិន ទទួលស្គាល់ផងដែរ នូវលទ្ធផល​បឋមរបស់ គ.ជ.ប ដែលផ្ដល់តួលេខដូចទៅនឹង ការប្រកាសរបស់គណបក្សប្រជាជន ហើយទាមទារឲ្យបង្កើតនូវ​គណៈកម្មការចម្រុះមួយ ដែលមានសមាសភាពមកពីគណបក្សធំទាំងពីរ គជប អង្គការសង្គមស៊ីវិលជាតិ និងអន្តរជាតិ​នោះផង។ ប៉ុន្តែគណបក្ស​នេះ មិនបាន​បដិសេធបេក្ខភាពតំណាងរាស្ត្រ ដែលខ្លួនទទួលបានអសនៈនៅរដ្ឋសភានោះទេ។

ប៉ុន្តែខាងគណបក្សប្រជាជន ទំនងជាចង់ឲ្យមានយន្ដការជាតិ ច្រើនជាងគណៈកម្មការមួយ ដែលមានសមសភាព​ចូល​រួមពី​អន្តរជាតិមកចូលអន្តរគមន៍។

សូមភ្ជាប់នូវលិខិតរបស់គជប ចុះថ្ងៃទី០២ខែសីហា ដូចតទៅ៖

----------------------------------------------------
ដោយ សេក មនោរកុមារ - ប៉ារីស​ ថ្ងៃទី០២ ខែសីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ