បក្ស​ប្រឆាំង​គម្រាម​ធ្វើ​បាតុកម្ម​ទ្រង់​ទ្រាយ​ធំ ដើម្បី​ប្រឆាំង​ការ​បោះ​ឆ្នោត​«បន្លំ»

គណបក្សសង្គ្រោះជាតិ ដែលជាគណបក្សប្រឆាំងក្នុងប្រទេសកម្ពុជា បានប្រកាសគម្រាមខ្លាំងឡើងៗ នៅថ្ងៃល្ងាចថ្ងៃ​អង្គារ​នេះ ថាខ្លួននឹងរៀបចំមហាបាតុកម្មទ្រង់ទ្រាយធំ មិនដែលធ្លាប់មានក្នុងប្រវត្តិសាស្ត្រនៃប្រទេស ប្រសិនបើការស៊ើបអង្កេត​ដ៏ចាំបាច់មួយ ទៅលើភាពមិនប្រក្រតីនៃការបោះឆ្នោតថ្ងៃទី២៨ខែកក្កដាកន្លងមក មិនមានរូបរាង ឬមិនផ្ដល់លទ្ធផល​គួរ​ឲ្យ​ទទួលយកបាននោះ។
Loading...
  • ដោយ: កេសរ កូល
  • កែប្រែចុងក្រោយ: August 06, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

គណបក្សសង្គ្រោះជាតិ ដែលជាគណបក្សប្រឆាំងក្នុងប្រទេសកម្ពុជា បានប្រកាសគម្រាមខ្លាំងឡើងៗ នៅថ្ងៃល្ងាចថ្ងៃ​អង្គារ​នេះ ថាខ្លួននឹងរៀបចំមហាបាតុកម្មទ្រង់ទ្រាយធំ មិនដែលធ្លាប់មានក្នុងប្រវត្តិសាស្ត្រនៃប្រទេស ប្រសិនបើការស៊ើបអង្កេត​ដ៏ចាំបាច់មួយ ទៅលើភាពមិនប្រក្រតីនៃការបោះឆ្នោតថ្ងៃទី២៨ខែកក្កដាកន្លងមក មិនមានរូបរាង ឬមិនផ្ដល់លទ្ធផល​គួរ​ឲ្យ​ទទួលយកបាននោះ។

លោក កឹម សុខា និងលោក សម រង្ស៊ី (ខាងស្ដាំ) ថ្លែងទៅកាន់អ្នកគាំទ្រនៅលើលានប្រជាធិបតេយ្យ ថ្ងៃទី០៦ខែសីហា​ឆ្នាំ​២០១៣។ (រូបថត គណបក្ស)

ប្រធានគណបក្សសង្គ្រោះជាតិ លោក សម រង្ស៊ី បានប្រកាសនៅចំពោះមុខបណ្ដាជន អ្នកគាំទ្រ​គណបក្ស​លោក ប្រមាណ​ជាជាងមួយម៉ឺននាក់ ជួបជុំគ្នាលើទីលានប្រជាធិបតេយ្យ នៅល្ងាចថ្ងៃអង្គារទី៦ខែសីហានេះថា មហាបាតុកម្មដ៏ធំ នឹងរៀបចំ​ឡើង នៅថ្ងៃខាងមុខ ប្រសិនបើគណៈកម្មាធិការជាតិរៀបចំការបោះឆ្នោត មិនយល់ព្រមធ្វើឲ្យបានពេញលេញ នូវការស៊ើប​អង្កេត ដោយគណៈកម្មាការចម្រុះឯករាជ្យមួយ ដែលគណបក្សរបស់លោក ទាមទារនោះ។ គណៈកម្មាការចម្រុះឯករាជ្យ ដែលត្រូវតែមានការចូលរួម និងអារកាត់ដោយអង្គការសហប្រជាជាតិ តែមិនមែននៅក្រោមយន្ដការរបស់ គ.ជ.ប សព្វថ្ងៃ​នេះទេ។

អំពាវនាវឲ្យមានអន្តរាគមន៍ ពីអង្គការសហរប្រជាជាតិ

មុននេះបន្តិច លោក សម រង្ស៊ី បានអះអាងរួចហើយ ថាគណបក្សសង្គ្រោះជាតិរបស់លោក នឹងច្រានចោលនូវលទ្ធផល ដែលប្រកាសដោយ គ.ជ.ប នៅថ្ងៃសៅរ៍ទី១០ខែសីហាខាងមុខ។ គណៈកម្មាធិការនេះ នឹងអះអាងពីលទ្ធផលនេះ សារជា​ថ្មីម្ដងទៀត នៅបួនថ្ងៃក្រោយមក ប្រសិនបើគ្មានការប្ដឹងជំទាស់ ឬការតវ៉ាណាមួយនោះទេ។ ប៉ុន្តែនៅក្នុងពាក្យ​បណ្ដឹង​មួយ​របស់គណបក្សប្រឆាំង បានសុំឲ្យស្ថាប័នជាតិររៀបចំការបោះឆ្នោតនេះ លើកថ្ងៃប្រកាសលទ្ធផល រហូតដល់ថ្ងៃ​ទី​៨​ខែ​កញ្ញាខាងមុខ។ កាលពីថ្ងៃច័ន្ទទី៥ខែសីហា លោក សម រង្ស៊ី បានប្រកាសទាមទារ ឲ្យមានកិច្ចអន្តរាគមន៍ ពីសំណាក់​អង្គការ​សហប្រជាជាតិ (អ.ស.ប) ដើម្បីជួយរកដំណោះស្រាយ នូវរាល់បញ្ហាដែលកើតមានក្នុងការបោះឆ្នោត ដែលលោកនិង​គណបក្ស​លោកគិតថា មានការលួចបន្លំ​ជាប្រព័​ន្ធមួយ។

លទ្ធផលបឋមដែលបានប្រកាសដោយគ.ជ.ប នៅយប់ថ្ងៃទី២៨ខែកក្កដា ដែលជាថ្ងៃបោះឆ្នោតនោះ មានភាពស៊ីសង្វាក់គ្នា​ទៅនឹងការប្រកាសរបស់គណបក្សប្រជាជនកម្ពុជា ដែលជាគណបក្សកាន់អំណាច ដោយបានអះអាង​ថា​ គណបក្ស​នេះ​ឈ្នះបាន៦៨កៅអី ទល់នឹងគណបក្សប្រឆាំង ៥៥កៅអី ដែលសរុបចំនួនកៅអីទាំងអស់ មាន១២៣កៅអី នៅក្នុងរដ្ឋសភា។ នាយករដ្ឋមន្ត្រីចាំផ្ទះ លោក ហ៊ុន សែន ដែលបានកាន់តំណែងជាប្រមុខរដ្ឋាភិបាលតាំងពី២៨ឆ្នាំមកនោះ បានប្រកាស ថា​លោកនឹងនៅក្នុងតំណែងនេះ ជាបន្តទៀតក្រោយការប្រកាសលទ្ធផលនៃការបោះឆ្នោត។

តែផ្ទុយទៅវិញ គណបក្សសង្គ្រោះជាតិ បានប្រកាសថាខ្លួនឈ្នះ៦៣កៅអី ទល់នឹងគណបក្សកាន់អំណាច៦០កៅអី។ ជ័យ​ជំនះនេះ ជម្រុញឲ្យគណបក្សប្រឆាំង មានភាពជឿជាក់យ៉ាងខ្លាំង ពីការគាំទ្ររបស់ប្រជារាស្ត្រម្ចាស់ឆ្នោត នៅក្នុង​អណត្តិ​នេះ បើប្រៀបធៀបនឹងអណត្តិមុន ដែលក្រុមខ្លួនទទួលបានតែ២៩កៅអីប៉ុណ្ណោះ។ លោក សម រង្ស៊ី បានបន្តថ្លែង​ទៅកាន់​អ្នកគាំទ្រទៀតថា «លើកនេះ យើងលែងភ័យហើយ យើងលែងខ្លាចការគម្រាមទៀតហើយ។ ហើយនឹងមាន​បាតុកម្ម​១០ដងធំជាងរាល់ដង នៅក្នុងថ្ងៃខាងមុខ។»

គណបក្សសង្គ្រោះជាតិ បានអះអាងថាបញ្ជីអ្នកបោះឆ្នោតត្រូវបានគេបន្លំ ហើយបានធ្វើឲ្យរាស្ត្រដែលអាចបោះឆ្នោតបាន ប្រមាណជាជាង១លាននាក់ មិនបានចេញទៅបោះឆ្នោត និងមានភាពមិនប្រក្រតីជាច្រើន បានកើតឡើងក្នុងថ្ងៃបោះឆ្នោត ថ្ងៃទី២៨ខែកក្កដានេះ។ ការលើកឡើងនេះ ក៏ត្រូវបានអះអាងដែរ ដោយអង្គការសង្គមស៊ីវិលជាច្រើន ដែលធ្វើការ​ឃ្លាំ​មើល​ការបោះឆ្នោតនេះ៕

ចង់ដឹងពីថ្ងៃបោះឆ្នោត ថាមានលក្ខណៈបែបណា សូមអានឡើងវិញ នូវព្រឹត្តិការណ៍នេះ ដោយចុចលើទីនេះ

--------------------------------------------------------
ដោយ ៖ កេសរកូល - ភ្នំពេញ ថ្ងៃទី ០៦ ខែសីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

 

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...