គ្រូបង្វឹកក្រុមបាយឺន ម៉ូនិជ (Bayern Munich) លោក ប៉ិប ហ្គាឌីអូឡា (Pep Guardiola) សង្ឃឹមថា គ្រប់ក្រសែភ្នែកអ្នក​ស្នេហាវិស័យបាល់ទាត់ទាំងអស់ នឹងសម្លឹងមកមើលក្រុមគាត់ នៅក្នុងការប្រកួតនៅយប់ថ្ងៃសុក្រ ខណៈដែលក្របខ័ណ្ឌ បូដេសលីកា (Bundesliga) របស់អាឡឺម៉ង់ នឹងចាប់ផ្តើម។

លោក ប៉ិប ហ្គាឌីអូឡា គ្រូបង្វឹករបស់ក្រុមបាល់ទាត់ បាយឺន ម៉ូនិជ។ (soccerreport.com)

បុរសសញ្ជាតិអេស្ប៉ាញ វ័យ៤២ឆ្នាំ កំពុងតែរៀបចំក្រុមរបស់លោក ដើម្បីប្រកួតបើកឆាកក្នុងក្របខ័ណ្ឌបូដេសលីកា លើក​ដំបូងរបស់ខ្លួន ខណៈដែលត្រូវប៉ះជាមួយក្រុម បូរ៉ាស្សៀ ម៉ុងឆេងហ្គាឡាបាច់ (Borussia Monchengladbach) ហើយលោក​នឹងក្លាយជាទីចាប់អារម្មណ៏ខ្លាំងបំផុតមួយ សម្រាប់ប្រិយមិត្តនិយមបាល់ទាត់ជុំវិញពិភពលោក។

បាយឺន ម៉ូនិជ ជាក្រុមមហាជោគជ័យមួយ កាលពីរដូវកាលមុន ដោយបានឈ្នះពានរង្វាន់៣ ក្នុងមួយរដូវកាល៖ ឆែមពាន​លីក (Champions League), បូដេសលីកា និងពានរង្វាន់ ឌីអេហ្វប៊ី ប៉ូកាល់ (DFB-Pokal) ដែលកំឡុងពេលនោះ ស្ថិតក្រោម​ការដឹកនាំរបស់លោកគ្រូបង្វឹកចាស់ ជឺប ហៃណ័កស៏ (Jupp Heynckes)។ ទោះជាយ៉ាងណា លោកហ្គាឌីអូឡា សង្ឃឹម​ថា គាត់នឹងធ្វើឲ្យបានល្អបំផុតដូចគ្នា នៅក្នុងកីឡាដ្ឋាន អាឡាន អារ៉េណា (Allianz Arena)។

អតីតគ្រូបង្វឹកឆ្នើម ក្រុមបាសេឡូណារូបនេះ បាននិយាយថា៖ «ខ្ញុំមិនមែនជាគ្រូបង្វឹកល្អបំផុតនៅលើពិភពលោកនោះទេ ប៉ុន្តែខ្ញុំជាគ្រូបង្វឹក ដែលបានដឹកនាំក្រុមល្អបំផុតនៅលើពិភពលោក។ យើងលេងបានល្អជាយូរណាស់មកហើយ ប៉ុន្តែ​គ្រូ​បង្វឹកត្រូវពឹងផ្អែកទៅលើកីឡាករ។ ដូច្នេះវាមិនសំខាន់ថា ខ្ញុំល្អប៉ុណ្ណានោះទេ។»

គាត់បន្តថា៖ «ខ្ញុំគ្រាន់តែជួយណែនាំបន្តិចបន្តួច ដល់កីឡាកររបស់ខ្ញុំ និងជួយគាំទ្រពួកគេ គ្រប់ការប្រកួតទាំងអស់។ នោះ​ជាគោលដៅរបស់ខ្ញុំ ដែលខ្ញុំត្រូវតែធ្វើឲ្យបានល្អ។ បញ្ហាសំខាន់ ធ្វើយ៉ាងណាឲ្យកីឡាករទាំងអស់ក្នុងក្រុម ទទួលយក និង​អនុវត្តន៏នូវការណែនាំរបស់ខ្ញុំ ហើយវាពិតជាសំខាន់ខ្លាំងណាស់ នៅពេលដែលកីឡាករក្នុងក្រុមមានការជឿជាក់លើខ្ញុំ។»

លោកហ្គាឌីអូឡា ក៏បានព្យាយាមដឹកនាំក្រុមថ្មីរបស់គាត់ ឲ្យមានទម្រង់លេង ដូចទៅនឹងអ្វីដែលគាត់ចង់បាន។ ទោះបី​ជា​ដឹងថា បើក្រុមលេងមិនបានល្អ គាត់នឹងត្រូវរងការរិះគន់ក៏ដោយ ក៏ គ្រូបង្វឹករូបនេះនៅតែចង់ធ្វើ ហើយគាត់នឹងធានាខុស​ត្រូវគ្រប់យ៉ាងចំពោះលទ្ធផល។

គាត់បានបន្ថែមថា៖ «តាមពិតទៅខ្ញុំបានដឹងច្បាស់ តាំងពីមុនពេលខ្ញុំមកកាន់ទីនេះម្លេះ ថាខ្ញុំមកកាន់ទីនេះ ចាំបាច់ត្រូវ​តែ​ដឹកនាំក្រុមឲ្យឈ្នះដាច់ខាត។ បើយើងចាញ់ វានឹងក្លាយជាកំហុសរបស់ខ្ញុំ។ ទោះជាយ៉ាងណា ខ្ញុំនឹងទទួលយក​នូវការ​រិះគន់គ្រប់បែបយ៉ាង៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៩ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ