ភាពមិនចុះសម្រុងគ្នា រវាងគណៈបក្សប្រជាជនកម្ពុជា និងគណៈបក្សសង្រ្គោះជាតិ ដែលនឹងបណ្តាលឲ្យមានវិបត្តិ​ជាប់គាំង​ ខាងនយោបាយក្រោយការបោះឆ្នោត ទំនងជានឹងអាចដោះស្រាយរួច ហើយស្ថានភាពគ្រប់យ៉ាងនឹង​អាចប្រសើរ​ឡើង​វិញ។ នេះបើយោងលើសេចក្ដីប្រកាសព័ត៌មានចុងក្រោយ របស់គណបក្សសង្គ្រោះជាតិ ចេញផ្សាយនៅថ្ងៃទី៩ ខែសីហា ឆ្នាំ២០១៣។

មួកមានរូបសញ្ញាគណបក្សនយោបាយធំពីរ នៅប្រទេសកម្ពុជា។

សេចក្ដីប្រកាសព័ត៌មាន នៅថ្ងៃទី៩ ខែសីហាឆ្នាំ២០១៣ របស់គណៈបក្សសង្រ្គោះជាតិឲ្យដឹងថា តំណាងគណៈបក្ស​ប្រជាជនកម្ពុជា បីរូបរួមមានលោក ជាម យៀប លោក ព្រំ សុខា និងលោក អ៊ុក គឹមហាន បានជួបតំណាងគណបក្ស​សង្រ្គោះជាតិ​បីរូប រួមមានលោក សុន ឆ័យ លោក កុយ ប៊ុនរឿន និងលោក ញ៉ែម បុញ្ញឬទ្ធិ។

សេចក្ដីប្រកាសព័ត៌មានដដែលនេះ បានបង្ហាញសញ្ញាវិជ្ជមាន ដោយគណបក្សទាំងពីរបានឯកភាពគ្នា ពិនិត្យមើល​លទ្ធភាពជ្រើសរើសអង្គការមិនមែនរដ្ឋាភិបាល ដែលមានជំនាញ និងបទពិសោធន៍លើការងារបោះឆ្នោត ដើម្បីបំពេញ​ការងារ​ក្នុង​ក្រុមបច្ចេកទេស ដែលមានអង្គការសហប្រជាជាតិ អង្គការជាតិនិងអន្តរជាតិឯទៀត ជាអ្នកសង្កេតការណ៍។

ទន្ទឹមនឹងនេះលោក ស ខេង រដ្ឋមន្រ្តីក្រសួងមហាផ្ទៃ  និងជាមន្រ្តីជាន់ខ្ពស់របស់គណបក្សប្រជាជនកម្ពុជា បានថ្លែង​ប្រាប់​អ្នកសារព័ត៌នៅថ្ងៃដដែលនេះថា គ្រប់បញ្ហាអាចនឹងប្រសើរឡើង ព្រោះគណបក្សសង្រ្គោះជាតិ និងគណបកប្រជាជន​កម្ពុជា​បានយល់ព្រម ត្រលប់ចូលមកតុចរចារវិញហើយ។

លោក យឹម សុវណ្ណ មន្ត្រីអ្នកនាំពាក្យគណបក្សសង្រោះជាតិ បានថ្លែងប្រាប់ទស្សនាវដ្តីមនោរមព័ងអាំងហ្វូថា កិច្ចប្រជុំ​រវាងមន្រ្តីជាន់ខ្ពស់ របស់គណបក្សទាំងពីរបានសម្រេចឯកភាពគ្នាលើពីរចំណុច៖

១. គណៈប្រតិភូជាន់ខ្ពស់របស់គណបក្សទាំងពីរ នឹងចរចារបន្តថា តើមានសមាសភាពណាខ្លះដាក់បញ្ចូល ទៅក្នុង​គណៈកម្មការចម្រុះ។

២. គណបក្សទាំងពីរយល់ស្របថា អង្គការសហប្រជាជាតិជាអ្នកសង្កេតការណ៍ ក្នុងការស្រាវជ្រាវ និងតាមដាន​ពីភាព​មិនប្រក្រតី នៃដំណើរការបោះឆ្នោត។

សូមរម្លឹកថាការឯកភាពរបស់ភាគីទាំងពីរនៅពេលនេះ កើតមានឡើងក្រោយពីភាពមិនចុះសម្រុងគ្នា រវាងភាគីទាំងពីរ​ចំពោះតួនាទី របស់អង្គការសហប្រជាជាតិ នៅក្នុងគណកម្មការចម្រុះ កាលពីកិច្ចប្រជុំថ្ងៃទី៣ សីហា ឆ្នាំ២០១៣។ គណៈកម្មការចម្រុះ ដែលស្នើឲ្យបង្កើតដោយគណបក្សង្រោះជាតិ ដើម្បីធ្វើការស៊ើបអង្កេតរួមគ្នា ពីភាពមិនប្រក្រតី​ក្នុង​ដំណើរការបោះឆ្នោត។ ការឯកភាពគ្នានេះ ក៏បានកើតឡើងស្របពេល  នឹងលិខិតរបស់គ.ជ.បដែរ ដែលបាន​ចេញ​នៅថ្ងៃទី៩ ខែសីហា ឆ្នាំ២០១៣នេះ ស្នើឲ្យគណបក្សប្រជាជនកម្ពុជា និងគណបក្សសង្រ្គោះជាតិ ចូលរួមប្រជុំជាថ្មី។

លោក ប៉ា ងួនទៀង នាយកមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ បានថ្លែងថា គណកម្មការចម្រុះអាច​បង្កើត​បានឬអត់ គឺអាស្រ័យលើយន្តការដែលបានលើកឡើង គណបក្សទាំងពីរអាចទទួលបានឬអត់។ រីឯការដាក់បញ្ចូល​សមាសភាព របស់អង្គការសហប្រជាជាតិ ទៅក្នុងគណកម្មការច្រុះ លោកបានពន្យល់ថា ប្រសិនបើគណបក្សទាំងពីរ មិន​មានជំនឿចិត្តចំពោះគ្នា និងលើ គ.ជ.ប ហើយពួកគេចង់ឲ្យមានតម្លាភាព គេអាចរកជំនួយពីភាគីផ្សេងបាន ដូចជាអង្គការ​សហប្រជាជាតិជាដើម ហើយក៏មិនខុសច្បាប់ដែរ។

លោកប៉ា ងួនទៀង បន្ថែមថា រដ្ឋាភិបាលកម្ពុជាកន្លងមក ក៏ធ្លាប់ស្វែងរកជំនួយពីប្រទេសឥណ្ឌូនេស៊ី តុលាការយុត្តិធម៌​អន្តរជាតិ និងអង្គការសហប្រជាជាតិ ខណៈកម្ពុជាមានជម្លោះព្រំដែនជាមួយប្រទេសថៃ ហើយមិនអាចដោះស្រាយ​រួច​តាមយន្តការទេ្វភាគី៕

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី៩ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ