បន្ទាប់ពីមានពាក្យចរចាមអារ៉ាមជាច្រើន និងថ្មីៗកន្លងទៅក្រុមហ៊ុនបានប្រកាសចេញទូរស័ព្ទដៃបកបិទអេក្រង់២ ម៉ូដែល «ហិនណែស៊ី» (Hennessy flip-phone) រួចមកនោះ ពេលនេះក្រុមហ៊ុនស៊ាំស្ស៊ុង (Samsung) បានប្រកាសចេញ​ទូរស័ព្ទ​អេក្រង់២ ស៊េរីថ្មី១ទៀត ដែលមានឈ្មោះថា «ហ្គាឡាក់ស៊ី ហ្គោលដិន» (Galaxy Golden)។

ការបង្ហាញទូរស័ព្ទ «ហ្គាឡាក់ស៊ី ហ្គោលដិន» ជាផ្លូវការ។ (រូបថត androidcentral.com)

អេក្រង់ទាំង២ របស់ហ្គាឡាក់ស៊ី ហ្គោលដិន មានទំហំ ៣.៧អ៊ីញដូចគ្នា ប្រភេទ ស៊ុបព័រអាម៉ូឡេដ (Super AMOLEDs) និង​ជាប្រភេទទូរស័ព្ទដៃប្រើប្រាស់ប៊ូតុង។ ប៉ុន្តែតម្លៃរបស់វា ហាក់ដូចជាក្រែលបន្តិច ប្រហែលជាជាង ៧០០ដុល្លាសហរដ្ឋ​អាមេរិក។

ផលិតផលស៊ាំស្ស៊ុងស៊េរីថ្មីនេះ ដំណើរការដោយប្រព័ន្ធប្រតិបត្តិការ អេនដ្រយ ៤.២ ជីលីបីន (Android 4.2 Jelly Bean)។ វាមានម៉ាស៊ីន (CPU) ទំហំ ១.៧ជីហ្គាអែក ប្រភេទឌូខរ (dual-core) ខណៈដែលអេក្រង់ទាំង២ អាចបង្ហាញរូបភាពបាន​ទំហំធំបំផុត ៨០០ X ៤៨០ភិចស្យ៊ែល។

ហ្គាឡាក់ស៊ី ហ្គោលដិន មានកាមេរ៉ាទំហំ ៨ម៉េហ្គាភិចស្យ៊ែល និងកាមេរ៉ាមុខទំហំ ១.៩ម៉េហ្គាភិចស្យ៊ែល។ ក្រៅពីនោះ នៅ​មានមុខងារសំខាន់ៗមួយចំនួនទៀតដូចជា ៤ជី អិលធីអ៊ី (4G LTE), វិទ្យុ (FM radio) និងកម្មវិធី ស៊ាំស្ស៊ុង អេសហែល (Samsung S Health) ផងដែរ។ រីឯថ្មរបស់វាមានកំរិតថាមពល ១៨២០មីលីអំពែម៉ោង។

គួររំឮកថា បន្ទាប់ពីមានពាក្យចរចាមអារ៉ាមជាច្រើន ដែលថាក្រុមហ៊ុន អ័បផល (Apple) គ្រោងនឹងបញ្ចេញទូរស័ព្ទដៃ អាយហ្វូន៥អេស (iPhone 5S) និងអាយហ្វូន៥ស៊ី (IPhone 5C) រួចមក ក្រុមហ៊ុនស៊ាំស្ស៊ុង ដែលជាគូប្រជែងដ៏ធំរបស់​អ័បផលមួយនេះ ក៏ខំដុតដៃដុតជើង ក្នុងការផលិតទូរស័ព្ទស៊េរីថ្មី ដើម្បីត្រៀមប្រកួតប្រជែង លើទីផ្សារជាមួយនឹង​ក្រុមហ៊ុន​អ័បផល នៅពេលខាងមុខឆាប់ៗនេះផងដែរ។

ទោះជាយ៉ាងណា ទូរស័ព្ទដៃស៊ាំស្ស៊ុង ហ្គាឡាក់ស៊ី ហ្គោលដិននេះ ទើបតែប្រកាសចេញនៅក្នុងប្រទេស​កូរ៉េខាងត្បូង​តែ​ប៉ុណ្ណោះ។ ចំពោះការប្រកាសចេញជាផ្លូវការលក្ខណៈអន្តរជាតិក្រុមហ៊ុនពុំទាន់កំណត់កាលបរិច្ឆេតនៅឡើយទេ។ ប៉ុន្តែ​បើតាមអ្នកវិភាគ បានលើកឡើងថា ក្រុមហ៊ុនកូរ៉េមួយនេះ ត្រៀមនឹងប្រកាសនៅក្នុងព្រឹត្តិការណ៏ អាយអេហ្វអេ ២០១៣ (IFA 2013) នៅដើមខែកញ្ញាខាងមុខ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២២ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ