អង្គការសហប្រជាជាតិ បានប្រកាសនៅថ្ងៃពុធទី១៨ខែកញ្ញានេះ ទៅដល់ម្ចាស់ជំនួយទាំងឡាយ ស្ដីពីប្រាក់ដែលអង្គការ​នេះបានខ្ចី ដើម្បីបើកប្រាក់ខែឲ្យបុគ្គលិករបស់សាលាក្ដីមួយ ដែលទទួលបន្ទុកកាត់ក្ដីមេដឹកនាំខ្មែរក្រហម ជាប់ចោទពីបទ​ប្រល័យពូជសាសន៍នៅកម្ពុជា។

លោក ឡាស អ័លសេន អ្នកនាំពាក្យ របស់ការិយាល័យអង្គការសហប្រជាជាតិប្រចាំនៅកម្ពុជា។ (រូបថត សាលាក្ដី)

រាជធានីភ្នំពេញ - បើតាមអ្នកនាំពាក្យ របស់ការិយាល័យអង្គការសហប្រជាជាតិប្រចាំនៅកម្ពុជា លោក ឡាស អ័លសេន (Lars Olsen) ប្រាក់កម្ចីដែលបានយល់ព្រមទៅឲ្យកញ្ចប់ថវិការជាតិ នៃសាលាក្ដីវិសមញ្ញ ជាប្រាក់កម្ចីដែលត្រូវតែសងវិញ ហើយប្រាក់​នេះ​មានទិសដៅ ដើម្បីយកទៅបើកប្រាក់ខែ ដែលបានជំពាក់បុគ្គលិកជាតិទាំងប៉ុន្មានរបស់សាលាក្ដី។

លោក ឡាស អ័លសេន បានពន្យល់ក្នុងសេចក្ដីប្រកាសព័ត៌មានមួយថា «អង្គការសហប្រជាជាតិ បន្តធ្វើការជាមួយនឹង​ម្ចាស់ជំនួយ​សំខាន់ៗ​ទាំងឡាយ ដើម្បីផ្ដល់ហិរញ្ញាវត្ថុក្នុងការបើកប្រាក់ខែទៅដល់បុគ្គលិកជាតិ ដែលនៅមិនទាន់បាន​បើក​សម្រាប់ឆ្នាំ២០១៣​នេះ។ (...)  យើងសង្ឃឹមថា បុគ្គលិកជាតិខ្មែរទាំងអស់របស់សាលាក្ដី នឹងអាចចូលធ្វើការ​វិញដូច​ធម្មតា។»

បុគ្គលិកជាតិ ប្រមាណជាជាង ១០០នាក់ បានធ្វើកូដកម្មតាំងពីដើមខែកញ្ញានេះមក បន្ទាប់ពីការអាក់ខាន​មិនបានទទួល​ប្រាក់ខែរបស់ពួកគេ តាំងពីច្រើនខែមកហើយ។

លោកបានរំលឹកយ៉ាងដូច្នេះទៀតថា «អង្គការសហប្រជាជាតិ សូមបញ្ជាក់ថា ដំណោះស្រាយតែមួយគត់ ដែលមាន​លក្ខណៈយូរអង្វែង សម្រាប់បញ្ហាហិរញ្ញវត្ថុរបស់ក្រុមបុគ្គលិក គឺតម្រូវឲ្យរដ្ឋាភិបាលកម្ពុជាគោរពកតព្វកិច្ចរបស់ខ្លួន ដែលត្រូវបើកប្រាក់ខែឲ្យបុគ្គលិកទាំងនេះ»។

សាលាក្ដីវិសមញ្ញាកូនកាត់ដែលកើតពីកិច្ចព្រមព្រៀងរវាងរដ្ឋាភិបាលកម្ពុជា និងអង្គការសហប្រជាជាតិនេះ ត្រូវបានបង្កើត​ឡើងនៅឆ្នាំ២០០៣ ដើម្បីទទួលបន្ទុកកាត់ទោស អ្នកទទួលខុសត្រូវជាន់ខ្ពស់ នៃរបបកម្ពុជាប្រជាធិបតេយ្យខ្មែរក្រហម ជាប់ចោទពីបទប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាម។

អ្នកនាំពាក្យរបស់អង្គការកំពូលអន្តរជាតិ បានព្រមានបន្ថែមថា «ការធ្វើកូដកម្មថ្មីណាមួយទៀត នឹងអាចឲ្យពន្យឺត​នូវរាល់​និតិវិធីរបស់សាលាក្ដី និងបង្កឲ្យមានភាពលំបាកដល់ ដំណើរប្រព្រឹត្តទៅនៃ ការរកយុត្តិធម៌»​របស់ស្ថាប័នពាក់កណ្ដាល​អន្តរជាតិមួយនេះ៕

-----------------------------------------------
ដោយ ៖ កេសរកូល - ថ្ងៃទី១៨ ខែកញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ