អំពើហឹង្សានេះ បានផ្ទុះឡើងខ្លាំងរវាងក្រុម ដែលប្រឆាំងនឹងរបប របស់លោក បាឆារ អែលអាសាធ (Bachar el-Assad) ប្រធានាធិបតីស៊ីរីបច្ចុប្បន្ន ជុំវិញការដណ្ដើមមកគ្រប់គ្រង នូវទឹកដីជាប់ព្រំដែនមួយចំនួន។ កងស្ម័គ្រប្រយុទ្ធ​និយមអ៊ីស្លាម ដែលមានចំនួនកើនឡើង នៅក្នុងចំណោមក្រុមឧទ្ទាមនោះ ក៏បានជួបប្រយុទ្ធគ្នាជាញឹកញាប់ នៅក្នុងតំបន់​ភាគ​ខាង​ជើង​នៃប្រទេសស៊ីរីដែរ ដោយបានធ្វើឲ្យមានមនុស្សស្លាប់ជាច្រើនរយនាក់។

ក្រុមសកម្មជនឃ្លាំមើលសិទ្ធិមនុស្សបានរាយការណ៍ថា ការប្រយុទ្ធដ៏ស្រួចស្រាវ នៅថ្ងៃសុក្រទី០៤ខែតុលានេះ នៅក្នុងភូមិ​អាហ្សាស (Azaz) ស្ថិតនៅមិនឆ្ងាយប៉ុន្មានពីព្រំដែនជាមួយប្រទេសទួគីរ រវាងក្រុមនិយមអ៊ីស្លាមដែលស្និតនឹង​បណ្ដាញ​ភេវរនិយម អាល់ កៃដា (Al-Qaïda) ទល់នឹងកងទ័ពសេរីស៊ីរី ដែលទទួលបានការជួយឧបត្ថម្ភ ពីសំណាក់មហាអំណាចធំៗ នៅបស្ចឹមលោក។

ចំណែកឯនៅទីក្រុងដាម៉ាសឯណេះវិញ ក្រុមអធិការកិច្ចនៃអង្គការសហប្រជាជាតិ កំពុងធ្វើការងាររបស់ខ្លួននៅនឹងកន្លែង សម្រាប់ថ្ងៃទី៤របស់ខ្លួន នៅក្នុងក្របខ័ណ្ឌនៃការរំសាយចោលនូវអាវុធគីមី របស់ប្រទេសនេះ។ ក្រុមប្រឹក្សាសន្តិសុខរបស់​អង្គការសហប្រជាជាតិ បានផ្ដល់បេសកកម្មនេះទៅឲ្យក្រុមអធិការកិច្ចនេះ ដើម្បីធ្វើការរបស់ខ្លួន កាលពីសប្ដាហ៍មុន។ ក្រុមអ្នកជំនាញទាំងនេះ មានពេលរហូតដល់ថ្ងៃទី០១ខែវិច្ឆិការខាងមុខ ដើម្បីរំសាយចោលអាវុធគីមី របស់ប្រទេសស៊ីរី និងបំផ្លាញចោលនូវរាល់ឃ្លាំងផ្ទុកទាំងអស់ នៃរបបលោក អែលអាសាធ ពីពេលនេះរហូតដល់រដូវក្ដៅឆ្នាំក្រោយ។

ប្រទេសរ៉ូស្សី ដែលជាសម្ព័ន្ធមិត្តសំខាន់បំផុតរបស់របបក្រុងដាម៉ាស បានសម្រេចជាមួយសហរដ្ឋអាមេរិក នូវការយោគ​យល់គ្នាមួយ ដោយបានបញ្ជៀសនូវការវាយប្រហាររបស់សហរដ្ឋអាមេរិក តាមផ្លូវអាកាសណាមួយប្រឆាំងរបបលោក អែលអាសាធ ដើម្បីជាការឆ្លើយតបនឹងការប្រើប្រាស់អាវុធគីមីនេះ ដែលធ្វើឲ្យមនុស្សជាច្រើនរយនាក់បាត់បង់ជីវិត កាលពីខែមុន។

ដោយឡែកលោកប្រធានាធិបតីស៊ីរី លោក បាឆារ អែលអាសាធ បានថ្លែងបញ្ជាក់តាមកញ្ចក់ទូរទស្សន៍ឯកជនមួយ របស់​ប្រទេសទួគីរ ថាវាដូចជាឆាប់ពេក ក្នុងការនិយាយពីការឡើងឈរ ជាបេក្ខជនប្រធានាធិបតីថ្មី នៅក្នុងការបោះឆ្នោតនា​ឆ្នាំ​ខាងមុខ។ តែលោកនៅតែនិយាយឲ្យដឹងថា លោកនឹងឡើងធ្វើបន្តទៅទៀត ប្រសិនប្រើប្រជាជនស៊ីរី«ភាគច្រើន» ចង់​ឲ្យ​លោកធ្វើ៕