«ដីកាបង្គាប់ឲ្យនាំខ្លួន»មួយ ដែលចេញដោយលោកតែ សំអាង ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃ​ទី២៩ ខែសីហា ឆ្នាំ២០១២ ត្រូវបានប្រជាពលរដ្ឋ ដែលរងគ្រោះដោយបញ្ហាដីធ្លី«ដុត»រំលាយចោល នៅមុខតុលាការកំពូល​រាប់រយច្បាប់ (ច្បាប់ចម្លង) ដោយបានចោទប្រកាន់ដីកានោះថា បានផ្តល់នូវភាពអយុត្តិធម៌បំផុតចំពោះគ្រួសារអ្នកស្រី យ៉ោម បុប្ផា ដោយបានជាប់គុកទាំងគ្មានកំហុសនោះ និងស្នើសុំឲ្យកើតមានឡើង នូវយុត្តិធម៌ខាងមុខនេះជាដាច់ខាត។

«ដីកាបង្គាប់ឲ្យនាំខ្លួន» ដែលត្រូវបានគេដុតចោល។ (រុបថត MONOROOM.info/ O.Vary)

ប្រព័ន្ធយុត្តិធម៌ - ប្រជាពលរដ្ឋមកពីសហគមន៍ចំនួនបី ៖ សហគមន៍បឹងកក់ដឹកនាំដោយអ្នកស្រី ទេព វណ្ណី សហគមន៍ថ្ម​គោលដឹកនាំដោយអ្នកស្រី ច្រាយ នីម និងសហគមន៍បុរីកីឡាដឹកនាំដោយលោក ពេជ្រ ប៊ុនធឿន មានគ្នា​ប្រមាណជិត​មួយ​រយនាក់ កមជួបជុំគ្នាមុខតុលាការកំពូល កាលពីល្ងាចម៉ោងពីរថ្ងៃទី១៩ ខែវិច្ឆិកានេះ គោលបំណងធ្វើពិធីបួងសួងតាមបែបប​ពុទ្ធសាសនា ដោយដង្ហែរក្បួនប្រទក្សិន ជុំវិញតុលាការកំពូលនោះចំនួនបីជុំ ដើម្បីបន្ទន់ចិត្តដល់មន្រ្តីនៃតុលាការកំពូល ឲ្យ​ធ្វើការដោះលែងអ្នកស្រីយ៉ោម បុប្ផា បន្ទាប់ពីសវនាការដែលនឹងលើកមកជំរៈនៅថ្ងៃ២២ ខែវិច្ឆិកា ខាងមុខនេះ។

ក្នុងពិធីបែបសាសនានេះ ក្រៅពីលោកអាចារ្យម្នាក់ និងប្រជាពលរដ្ឋរួមជាមួយ នឹងក្រុមយុវជនដើម្បីសន្តិភាពនោះ ពុំ​មាន​វត្តមានព្រះសង្ឃចូលរួម ក្នុងការសូត្រជយន្តោតោនោះទេ។ ក្រៅពីនេះ ក៏មានវត្តមានមន្រ្តីអង្គការសិទ្ធិមនុស្ស អ្នក​សារព័ត៌មាន​ជាតិ និងអន្តរជាតិជាងសាមសិបនាក់ ក៏បានចូលរួមដើម្បីសង្កេតការណ៍ និងយកព័ត៌មាន​ពីទិដ្ឋភាពនៃ​ការ​បួងសួងនេះដែរ។

លោកស្រី ទេព វណ្ណី ដែលជាអ្នកសកម្មក្នុងការទាមទានូវសិទ្ធិដីធ្លីក្នុងសហគមន៍បឹងកក់បានបញ្ជាក់ថា អ្នកស្រីមានជំនឿ​យ៉ាងមុតមាំទៅលើពិធីនេះអាចធ្វើឲ្យអ្នកដឹកនាំ ដូចជារាជរដ្ឋាភិបាល នឹងមន្រ្តីដែលពាក់ព័ន្ធទាំងអស់ក្នុងរឿងបឹងកក់ ក៏​ដូច​ជារឿងអ្នកស្រី យ៉ោម បុប្ផាព្រោះតែប្រទេសកម្ពុជាកាន់នូវសាសនាព្រះពុទ្ធ។ ស្ត្រីតំណាងបឹងកក់រូបនេះបន្តរថា «តុលាការ​កំពូលត្រូវតែគោរពតាមនីតិវិធី និងច្បាប់។ កាត់ក្តីដោយសុក្រិតនិងមិនលំអៀង ឯករាជ្យពិតប្រាកដ និងយុត្តិធម៌សម្រាប់​អ្នកស្រីយ៉ោម បុប្ផា នាថ្ងៃទី២២ ខែវិច្ឆិកា ខាងមុខនេះឲ្យមានសេរីភាពឡើងវិញ។»

លោក លួស សាខន ដែលត្រូវជាស្វាមីអ្នកស្រី យ៉ោម បុប្ផា ដែលមានវត្តមានជាមួយគ្នាដែរនោះ ក៏បានបង្ហាញពីការដុត​នូវ​ដីកា«បង្គាប់ឲ្យនាំខ្លួន»ថា ក្រោយពីការចាប់ខ្លួនហើយទើបឃើញមានដីកានេះជាក្រោយ។ លោកបន្តរថាដីកានោះ​មិនមាន​បញ្ជាក់ពីអត្តសញ្ញាណនៃអ្នកដែលត្រូវចាប់ខ្លួននោះតែ។ ក្រោយពេលចាប់ខ្លួនហើយទើបឃើញមានដីកាថ្មីមួយទៀត ដែល​បានដាក់ឈ្មោះរូបលោក(លួស សាខន)។ ទោះយ៉ាងណាក៏ដោយ លោកសូមសំណូមពរដល់តុលាការ​កំពូលនៅថ្ងៃទី​២២​ខាងមុខនេះ ជួយរកយុត្តិធម៌ដល់អ្នកស្រីយ៉ោម បុប្ផា ឲ្យមានសេរីភាពឡើងវិញដើម្បីរួមរស់ជួបជុំជាមួយគ្រួសារ។

ឯលោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការសិទ្ធិមនុស្ស លីកាដូដែលមានវត្តមាន​នៅមុខតុលាការ​កំពូលដែរនោះ បានបង្ហាញជាទស្សនៈថា លើកនេះមានលក្ខណៈប្លែកពីលើកមុនៗ ដែលរាល់ការទាមទានៅតាម​បណ្តា​ក្រសួងនានាដូចជាក្រសួងយុត្តិធម៌ សាលាដំបូងរាជធានីភ្នំពេញ សាលាឧទ្ធណ៍ ដែលបានធ្វើតាមបែបដាក់លិខិត ញ្ញត្តិ ឬ​តាមរយៈការទាមទាផ្សេងៗក្នុងការដោះលែង និងផ្តល់នូវភាពយុត្តិធម៌ដល់អ្នកស្រី យ៉ោម បុប្ផា។

លោកបន្តរថានេះប្រហែលមកពីការអស់ជំនឿទៅលើការតស៊ូមតិតាមផ្នែកច្បាប់ ទើបបានធ្វើការជ្រើសរើសបែបជំនឿ​ពុទ្ធសាសនា និងតាមបែបអរូបិយផ្សេងៗ ដែលធ្វើការបួងសួងបន្ទន់ចិត្តដល់មន្រ្តីនៃតុលាការកំពូលមានការគិត ពិចារណា​ក្នុងការផ្តល់យុត្តិធម៌ ពិសេសឲ្យមានការលើកលែងការចោទប្រកាន់ដល់អ្នកស្រី យ៉ោម បុប្ផា ឲ្យមានសេរីភាពបានជួបជុំប្តី កូន និងបងប្អូន។ «ខ្មែរយើងដែលកាន់ព្រះពុទ្ធសាសនា នឹងមានជំនឿលើពុទ្ធសាសនា មានជំនឿតាមបែបអរូបិយ។ ដូចគ្នា​នេះតុលាការនឹងអាចគិតគូរនូវបាប និងបុណ្យ។ (...) រយៈពេលចុងក្រោយនេះ យើងឃើញថា តុលាការកំពូលក៏បាន​ផ្តល់​នូវយុត្តិធម៌ជាច្រើន ដែរដូចជាករណី ប៊ន សំណាង និងសុខ សំអឿនជាដើម។ ដូច្នេះអ្នកស្រី យ៉ោម បុប្ផា នឹងត្រូវបាន​ដោះ​លែង បើមើលតាមការតាមដាន នៅសាលាដំបូងរាជធានីភ្នំពេញ ក៏ដូចជាសាលាឧទ្ធណ៍ មិនមានភស្តុតាងណាមួយ ដែល​បញ្ជាក់ថា អ្នកស្រី រួមជាមួយនឹងប្តី បានប្រព្រឹត្តិបទល្មើសហិង្សាដោយចេតនា មានស្ថានទម្ងន់ទោស ដូចការចោទប្រកាន់​នោះទេ។ (...) ជនរងគ្រោះខ្លួនឯងសូម្បីតែជនល្មើសដែលប្រព្រឹត្តិនោះមិនស្គាល់ផង ចុះហេតុអ្វីបានជាទៅចោទអ្នក​ស្រី​យ៉ោម បុប្ផា និងប្តី ពីការប្រ់ប្រាស់អំពើហិង្សាលើខ្លួន។»

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៩ វិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ