ការគំាទ្រដែលតារាចម្រៀងស្រស់សោភា នាងអីវ៉ា ធ្លាប់មានពីអ្នកគាំទ្រភាគច្រើនជាយុវ័យនោះ ត្រូវបានប្រែប្រួល ដោយ​សារនៅចុងឆ្នាំនេះ តារាចម្រៀងរបស់ផលិតកម្មសាន់ដេរូបនេះ ហាក់ដូចជាស្ងាត់ មិនឃើញមានបទចម្រៀងល្បីៗទៀត ខណៈយុវតារាដទៃទៀតមានបទថ្មី និងម្នាក់ៗបណ្ដែតខ្លួនឡើង យ៉ាងព្រោងព្រាតនោះ។ យុវវ័យដែលធ្លាប់គាំទ្រ​នាង​មួយ​ចំនួនបានរអ៊ូថា បទចម្រៀងរបស់ អ៊ី វ៉ា មិនទាក់ទាញដូចមុនសោះ បើទោះជានាងមានសំឡេងល្អយ៉ាងណាក៏ដោយ។

តារាចម្រៀងវ័យក្មេង អ៊ីវ៉ា នៅមុនឡើងឆាកនៅស្ថានីយ៍ទូរទស្ស៍ ស៊ីធីអ៊ិន។ (រូបថត MONOROOM.info/ SamNeang)

តារាចម្រៀង - តារាច្រៀងដែលមានសម្លេងទាក់ទាញយុវ័យ នាងអ៊ី វ៉ា ចាប់ផ្តើមមានឈ្មោះល្បីត្រឹមតែអំឡុង​ពេលជិត​២ឆ្នាំនេះប៉ុណ្ណោះ បើរាប់ចាប់តាំងពីនាងចូលច្រៀង ឲ្យផលិតកម្មសាន់ដេរមក។ ល្បីឈ្មោះ ដោយសារតែនាង មានទឹកដម​សំឡេងខ្ពស់ ពិរោះរណ្តំចិត្ត បូករួមនឹងរូបសម្បត្តិស្រស់ស្អាត និងពេលឡើងច្រៀងម្ដងៗ ទាក់ទាញធ្វើឲ្យយុវវ័យ​ឧស្សាហ៍​លើកសរសើរ។នាងមានបទចម្រៀងបែបមនោសញ្ចេតនាល្បីៗជាច្រើន ដែលធ្វើឲ្យនាងអាចវាយលុកចូលទីផ្សារ ហើយ​ថាសចម្រៀងរបស់នាង ក៏ត្រូវបានប្រិយមិត្តទិញយកទៅយ៉ាងសន្ធឹកសន្ធាប់ដែរ។

ប៉ុន្តែអ្វីដែលផ្លែកនោះគឺឈានចូលដល់ជិតបំណាច់ឆ្នាំ២០១៣នេះ អ៊ី វ៉ា អត់សូវមានបទចម្រៀងគួរឲ្យ​ចាប់ចិត្តដិតអារម្មណ៍​ខ្លាំងដូចមុន ខណៈដែលមានអ្នកចម្រៀងយុវវ័យដូចនាងម្នាក់ៗ សុទ្ឋតែមានបទចម្រៀងចេញលក់ថ្មីៗ។ តារាចម្រៀង​ខ្លះ​ទៀត មិនមានចម្រៀងថ្មី តែខិតខំបញ្ចេញក្បាច់រាំពិសេសៗ នៅលើឆាកសម្ដែង ដើម្បីក្តាប់យកភាពទាក់ទាញ​និង​ប្រជាប្រិយ​ភាព ពីសាធារណៈជន កុំឲ្យមានភាពដដែលៗ។

ក្នុងពេលកំពុងមានវត្តមានច្រៀងក្នុងកម្មវិធី«តន្ត្រីថ្ងៃអាទិត្យ» របស់ស្ថានីយ៍ទូរទស្សន៍ស៊ីធីអិន កាលពីពេលថ្មីៗនេះ។ តារា​ចម្រៀងខ្ពស់ស្រឡូន មានឈ្មោះពិត«ឃីង ស្រីនិច» ហៅអ៊ី វ៉ា បានមកសម្តែងហើយរំលេចដោយ ឈុតសម្លៀកបំពាក់​ទំនើបត្រូវចិត្តយុវវ័យទាន់សម័យ បានអះអាងប្រាប់ក្រុមអ្នកយកព័ត៌មាន នៅខាងក្រោយឆាកថា នាងបានដឹងព័ត៌មាន​រិះ​គន់​ពីនាង គ្មានបទចម្រៀងអីថ្មីលេចធ្លោដូចមុន។ នាងបានឆ្លើយតបថា «ទោះបីនោះជាការយល់ឃើញរបស់ប្រិយមិត្តក៏ដោយ ក៏នាងខ្ញុំមានបទចម្រៀងថ្មីចាស់ ជាច្រើនទៀតលក់នៅលើទីផ្សារដូចតារាដ៍ទៃដែរ»។

នាង អ៊ី វ៉ា បានឲ្យដឹងទៀតថា មិត្តអ្នកស្តាប់បានយល់ច្បាស់ហើយ ព្រោះកន្លងមក នាងមិនហ៊ានថាខ្លួនឯងល្អ ឬអន់ជាងគេ​នោះទេ។ នាងបានបញ្ជាក់ថា «នាងខ្ញុំសម្តែង ទុកឲ្យមហាជនដាក់ពិន្ទុ បើល្អសប្បាយចិត្ត តែបើគេថាមិនល្អនាងនឹង​កែ​ប្រែ​ចំនុចខ្វះខាត ដើម្បីវិវត្តន៍ខ្លួនបន្តទៀត។ ពោលគឺនាងខ្ញុំមិនខឹងគេរិះគន់ទេ វាជាការល្អទៅវិញទេ ដើម្បីកុំឲ្យខុស​លើក​ក្រោយ។»

ក្រោមសំនួរអ្នកសារព័តមាន សួរថា ក្រៅពីច្រៀង អ្នកសិល្បៈឥឡូវនេះចេះរាំ នឹករកក្បាច់រាំៗជាមួយក្រុមរាំផ្សេងៗ មើលទៅ​ត្រសងគ្នា ហើយមានការប្រជែងគ្នា ខណៈរូបនាងមានតែបទចម្រៀងកម្សត់ តែមិនសូវជាឃើញច្រៀងបទញាក់នោះ? តារា​ចម្រៀងស្រីស្រ់ នាង អ៊ី វ៉ា បានត្រឹមតែញញឹម ហើយនិយាយថា នាងអត់ហ៊ានប្រាប់ថាធ្វើបានចេះរាំដូចគេមុនទេ ចាំដល់​ពេលនោះគឺបងប្អូនដឹងច្បាស់។ តែនាងទទួលយល់ព្រមថាអ្នកចម្រៀងពូកែ ត្រូវរកចំនុចប្លែក  ហើយនាងក៍ត្រូវតែ​ដើរឲ្យ​ទាន់​ចំនុចនេះដែរ៕

សូមទស្សនាចម្រៀងកាយវិការមួយបទរបស់នាង ដែលច្រៀងក្នុងផលិតកម្ម សាន់ដេ៖

-----------------------------------------------
ដោយ ៖ សំ នៀង - ភ្នំពេញ ថ្ងៃទី២០ ខែវិច្ឆិកា ឆ្នាំ២០១៣
រក្សាសិទ្ធិគ្រប់យ៉ាងដោយ ទស្សនាវដ្តីមនោរម្យព័ងអាំងហ្វូ