ប្រជាពលរដ្ឋមកពីតាមបណ្តាខេត្តនានា ទាំងជុំវិញខេត្តសៀមរាប ក៏ដូចជាខេត្តឆ្ងាយៗចំនួនជាងមួយម៉ឺននាក់ បាន​មកជួបជុំគ្នានាទីលានសម្តែងមតិ មុខនគរធ្យូងយូរ ក្នុងខេត្តសៀមរាប បើទោះជាអវត្តមានលោក កឹម សុខា អនុប្រធាន និងមានតែវត្តមានលោក សម រង្ស៊ី ប្រធានគណបក្សសង្គ្រោះជាតិក៏ដោយ។ សូមអានបទពិពណ៌នា របស់អ្នក​យកព័ត៌មានរបស់ទស្សនាវដ្ដីមនោរម្យព័ងអាំងហ្វូ នៅក្រុងសៀមរាប-អង្គរ ដូចខាងក្រោម។

លោក សម រង្ស៊ី ថ្លែងនៅមុខនគរធ្យូងយូរ ថ្ងៃទី១០ខែធ្នូ ឆ្នាំ២០១៣។ (រូបថត MONOROOM.info/ O.Vary)

សៀមរាប -ការស្វាគមន៍របស់អាជីវករ មុនវត្តមានរបស់លោកសម រង្ស៊ី មកដល់ នាវេលាម៉ោងមួយ និងសាមសិប​នាទី នាក្រុងសៀមរាប គេសង្កេតឃើញអាជីវករទាំងក្នុងទីផ្សារ និងតាមបណ្តោយផ្លូវនានា​ភាគច្រើន​បានបិទទ្វារ។ ប៉ុន្តែបណ្ដាជនជាច្រើនបានថ្លែងថាការបិទទ្វានោះ មិនមែនដោយសារភ័យខ្លាចការជួបជុំដ៏ធំ ដែល​ធ្វើ​នៅទីនោះទេ តែផ្ទុយទៅ​វិញ គឺដើម្បីបានទៅចូលរួមស្វាគមន៍លោក សម រង្ស៊ី ដល់ព្រលានយន្តហោះខេត្ត​សៀមរាប។

វេលាម៉ោងជាងបីរសៀល លោកសម រង្ស៊ី ក៏បានមកដល់ទីលានសម្តែងមតិមុខនគរធ្យូងយូរ ដែលអមដំណើរ​ដោយ​ប្រជាពលរដ្ឋម្ចាស់ស្រុក មិនតិចជាងប្រាំពាន់នាក់ និងប្រជាពលរដ្ឋមកពី​តាមបណ្តាខេត្តនានា ដែលមានវត្តមាន​ក្នុង​ទីលានស្រាប់ ក៏មិនតិចជាងប្រាំពាន់នាក់ដែរ។

«ទិវាសិទ្ធិមនុស្សអន្តរជាតិ ។ (...) ពលរដ្ឋគ្រប់រូបត្រូវតែមានសិទ្ធិ ដែលមិនអាចឲ្យគេជាន់ឈ្លីបាន ដូចជាសិទ្ធិរស់រាន​មានជីវិតដែលសុខទាំងកាយនិងចិត្ត សិទ្ធិមានជីវភាពរស់នៅយ៉ាងសមរម្យ និងដោយសេចក្តីថ្លៃថ្នូរ សិទ្ធិមានកម្មសិទ្ធិ​ជៀសផុតពីការរំលោភបំពានពីសំណាក់រដ្ឋអំណាចមូលដ្ឋាន មន្រ្តីជាន់ខ្ពល់ បក្សពួកនិយមនិងឈ្មួញ។ (...) តំណាង​រាស្រ្ត​គណបក្សសង្គ្រោះជាតិ នឹងមិនចូលរួមក្នុងរដ្ឋសភាខុសច្បាប់ សភាដែលមិនគោរពសិទ្ធិ​ប្រជាពលរដ្ឋ​ទេ។» នេះ​ជាការថ្លែងរបស់លោកសម រង្ស៊ី។

លោក សម រង្ស៊ី បានថ្លែងបន្តរថា «ប្រជាពលរដ្ឋទាមទាឲ្យលោកហ៊ុន សែន ចុះចេញពីដំណែងដូចនាយករដ្ឋមន្រ្តីថៃ លោកស្រីយីងឡាក់ ដែលជាថ្នាក់ដឹកនាំថ្លៃថ្នូរ សុខចិត្តចុះចេញពីតំណែងព្រោះតែចង់ឃើញជាតិសុខ ប្រជារាស្រ្ត​សប្បាយ និងទទួលយកការបោះឆ្នោតជាថ្មី។ (...) បើមិនយកគំរូតាមនាយករដ្ឋមន្រ្តីថ្លៃថ្នូរដូចប្រទេសថៃ ដែល​មាន​លោកស្រីយីងឡាក់ទេ យើងនឹងធ្វើបាតុកម្មបណ្តេញចេញទាល់តែបាន។ ចុះចេញដោយខ្លួនឯង ចុះចេញដោយ​ថ្លៃថ្នូរ ចុះចេញដោយប្រជាពលរដ្ឋគោរពស្រលាញ់ ល្អជាងឲ្យគេដេញនាំខ្មាសគេ។ (...) យើងសង្គ្រោះជាតិឲ្យ​ទាល់​តែបាន។»

ក្រោយពីកិច្ចថ្លែងស្វាគមន៍របស់លោក សម រង្ស៊ី នាវេលាម៉ោងជាងបីនិងសែសិបនាទី លោកសម រង្ស៊ី ក៏បាន​ផ្តល់​វេទិការទៅប្រជាពលរដ្ឋ ដែលលោកចាត់ទុកថាជាម្ចាស់ឆ្នោត បានថ្លែងបញ្ជាក់នូវអារម្មណ៍ និងបញ្ហារបស់​ខ្លួន​ដែល​បានជួបប្រទះ និងមិនមានការដោះស្រាយ ឬអន្តរាគមន៍ ដល់ប្រជាពលរដ្ឋ។

«ចុះចេញទៅៗៗៗ» ជាសម្រែករបស់ប្រជាពលរដ្ឋស្រែកយ៉ាងកងរំពងពេញទីវាល ដើម្បីបង្ខំឲ្យលោក ហ៊ុន សែន ចុះចេញពីដំណែងជានាយករដ្ឋមន្រ្តី។ ស្របជាមួយនឹងសម្រែកជ័យឃោសនេះ ប្រជាពលរដ្ឋចំនួនជាងប្រាំនាក់​រួម​ទាំងព្រះសង្ឃមួយអង្គ ក៏បានបង្ហាញពីទិកចិត្តស្រដៀងគ្នា ចំពោះការគ្រប់គ្រង់របស់រដ្ឋាភិបាលលោក ហ៊ុន សែន ថា​ពោរពេញទៅដោយអំពើពុករលួយ បក្សពួកនិយម បំផ្លាញទ្រព្យសម្បត្តិជាតិ ទ្រព្យសម្បត្តិសាធារណៈ ជិះជាន់​សង្កត់​សង្គិនរាស្រ្តគ្មានត្រាប្រណី គ្មានដំណោះស្រាយ និងគ្មានកិច្ចអន្តរាគមជាដើម។

ម៉ោងជាង៤ល្ងាច ក្បួនដង្ហែរបានចាប់ផ្តើមចេញពីនគរព្យូងយូរ សំដៅឆ្ពោះទៅរាជសំណាក់ព្រះអង្គចេកព្រះអង្គចម ដើម្បីសុំនូវសេចក្តីសុខដល់ប្រជាពលរដ្ឋ សុំទាមទាឲ្យមានយុត្តិធម៌សម្រាប់ប្រជាជនទូទាំងប្រទេស ពិសេសអ្នក​ដែលត្រូវ​បានគេលួចបន្លំសន្លឹកឆ្នោត កាលពីថ្ងៃទី២៨ ខែកក្កដា កន្លងមកនេះ។

ក្នុងក្បួនដង្ហែរដោយថ្មើរជើងក្នុងដីជិតប្រាំពីរគីឡូម៉ែត្រពីនគរព្យូងយូរ សំដៅឆ្ពោះទៅកាន់ទីអាសនៈ​របស់ព្រះអង្គ​ចេកព្រះអង្គចម ដោយវាងកាត់តាមបណ្តោយផ្លូវសំខាន់ៗមួយចំនួន ក្នុងក្រុងសៀមរាប​មុននឹងទៅដល់គោលដៅ​របស់ខ្លួន។ អំឡុងពេលដង្ហែរជាក្បួននេះ មិនមានការរាំងស្ទះ ឬបិទផ្លូវពីសំណាក់អាជ្ញាធរមានសម្ថកិច្ចទេ តែផ្ទុយ​ទៅវិញ កងកម្លាំងទាំងនោះបានជួយសម្រួលដល់ចរាចរណ៍យ៉ាងយកចិត្តទុកដាក់ និងមួយចំនួន បានលួចបង្ហាញ​នូវការគាំទ្ររបស់ខ្លួន តាមរយៈការញញឹម ជាមួយនឹងមាត់ម្ហបៗថា «ដូរៗៗ»។

នៅពេលវត្តមានក្បួនដង្ហែរបានមកដល់ក្នុងក្រុង នាទីប្រជុំជន ក្រុមបាតុករដែលនាំមុខគេ ក្រុមមួយបានស្រែកថា «ហ៊ុន សែន អើយ» និងមានក្រុមមួយទៀតដែលនាំមុខដែរនោះ ក៏បានបន្ទរថា «ចុះចេញទៅ»។ ការស្រែក​យ៉ាង​នេះ​បានធ្វើឡើងបន្តរបន្ទាប់គ្នាជាច្រើនដងច្រើនសារ ជាមួយនិងការបន្ថែមនូវពាក្យមួយចំនួនដូចជា «ឈ្នះមិនឈ្នះ? ឈ្នះៗ។ (...) ជយោ! គណបក្សសង្គ្រោះជាតិ» ជាដើម។ ការស្រែកនូវជ័យឃោសនេះ បានបន្តររហូតមកដល់​មុខ​ព្រះអង្គចេកព្រះអង្គចមទើបឈប់។

ក្រោយពីបានអុជធូបសុំក្តីសុខ ជាមួយនឹងការស្នើសុំឲ្យមានការស្វែងរកយុត្តិធម៌នៃលទ្ធផលការបោះឆ្នោត ជូនម្ចាស់​ឆ្នោតរួចហើយនោះ លោកសម រង្ស៊ី រួមជាមួយនិងតំណាងរាស្រ្ត បានវិលត្រឡប់ទៅកាន់ទីលាន​សម្តែងមតិ​ដែល​ស្ថិត​នៅមុខនគរធ្យូងយូរ ដើម្បីបន្តការកំសាន្តជាមួយតន្ត្រីសម័យវិញ មុននឹងធ្វើការបំបែកផ្លូវគ្នា​ទៅកាន់លំនៅដ្ឋាន​រៀងៗ​ខ្លួន។

សូមបញ្ជាក់ថា តំណាងរាស្ត្រនៃគណបក្សសង្គ្រោះជាតិ ដែលបានចូលរួមមានដូចជា លោកស្រីកែវ សុវណ្ណារ័ត្ន តំណាងរាស្រ្តខេត្តសៀមរាប លោកគួច ប៊ុនរឿនតំណាងរាស្រ្តខេត្តកំពង់ចាម លោកហូរ វ៉ាន់ តំណាងរាស្រ្តភ្នំពេញ លោកយន់ ថារ៉ូ តំណាងរាស្រ្តខេត្តបន្ទាយមានជ័យ និងតំណាងរាស្រ្តជាច្រើនផ្សេងទៀត។ នៅរសៀលនេះ គេក៏​សង្កេត​ឃើញមាន ការចូលរួមពីសមាជិកព្រឹទ្ធសភាមួយចំនួនទៀតដូចគ្នាដែរ៕

សូមទស្សនា ការពិពណ៌នាតាមរយៈរូបថត ដោយចុចនៅទីនេះ។

---------------------------------------------------------
ដោយ៖ អ៊ុម វ៉ារី - ភ្នំពេញថ្ងៃទី១០ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ