«ហ៊ុន សែន ចុះចេញទៅ ហ៊ុន សែនចុះចេញទៅ។ ហ៊ុន សែន ស្អែកវិចបង្វិចចេញទៅ» នេះជាសម្រែកទាមទារ​​របស់​ប្រជាពលរដ្ឋក្មេងចាស់ ប្រុសស្រីដែលបានចូលរួមជួបជុំសម្តែងមតិ បង្ហាញពីទុក្ខលំបាករបស់ខ្លួន ក្នុងទិវាសិទ្ធិ​មនុស្ស ១០ធ្នូ នៅមុខ អង្គគរហ្យូងយូរ ក្នុងខេត្តសៀមរាប កាលពីថ្ងៃទី១០ខែធ្នូកន្លងទៅ។ ជា​សម្រែកទាមទារ ដែល​ទទួល​ស្គាល់ដោយមន្ត្រីរដ្ឋាភិបាល លោក ផៃ ស៊ីផាន។ តែមន្ត្រីរូបនេះ បានហៅការ​ទាមទារ​នោះថា «បានហួស​ពី​អាណត្តិ​នៃច្បាប់»។

សកម្មភាពឈូសផ្ទះប្រជាជន កាលពីខែមីនា ឆ្នាំ២០១៣ នៅភូមិចំរាំង ឃុំកែវផុស ស្រុកស្ទឹងហាវ ខេត្តព្រះសីហនុ។ (រូបថតអង្គការបណ្ដាញដីធ្លី)

បញ្ហាដីធ្លី - ប្រជាពលរដ្ឋមកពីបណ្តាខេត្តនានា មានចំនួនមិនតិចជាងមួយម៉ឺននាក់ ដែលបានចូលរួមក្នុង​ទិវាសិទ្ធិ​មនុស្ស១០ ធ្នូ នៅទីក្រុងសៀមរាប ខេត្តសៀមរាប រៀបចំឡើងដោយគណបក្សសង្រ្គោះជាតិ ហើយបានសម្តែង​ការមិនពេញចិត្ត ចំពោះការគ្រប់គ្រងប្រទេសជាង ៣០ឆ្នាំ របស់នាយករដ្ឋមន្រ្តីចាស់វស្សា លោកហ៊ុន សែន។ ពួក​គាត់បានលើកឡើង ពីការឈឺចាប់ពិបាករស់នៅ ដោយហេតុថាបញ្ហាដីធ្លី ផ្ទះសម្បែងរបស់ពួកគាត់ ត្រូវបាន​មន្រ្តី​មានអំណាចមួយចំនួនឈូសឆាយ នឹងរឹបអូសយក។

អ៊ំប្រុស អេម អាន បានថ្លែងប្រាប់ទស្សនាវដ្តីមនោរម្យព័ងអាំងហ្វូថា លោកអ៊ំចង់ឲ្យមានការប្តូរ​នាយក​រដ្ឋមន្រ្តី ហ៊ុន សែន ចេញ។ លោកបានបង្ហាញថា៖ «អ្នកដឹកនាំឥលូវពុករលួយ គាបសង្កត់អ្នកក្រីក្រ» ហើយលោកអ៊ំចង់រើស​អ្នក​ដឹកនាំថ្មី។

រីឯ អ៊ំប្រុស ជា ជឿន មកពីស្រុកកំពង់ស្វាយ ខេត្តកំពង់ធំ និងអ៊ំស្រី ឈុយ សុខន រស់នៅក្នុងស្រុកមួយទៀត ឆ្ងាយ​ពីខេត្តសៀមរាប ក៏មានយោបល់មិនខុសគ្នាប៉ុន្មានដែរថា ពួកគាត់ចង់ប្តូរឲ្យមានថ្នាក់ដឹកនាំថ្មី ដោយហេតុថា បច្ចុប្បន្ន​ប្រជាពលរដ្ឋរស់នៅក្នុងភាពផ្សងព្រេង ដីធ្លី ផ្ទះសម្បែងរបស់ខ្លួនដែលកំពុងរស់នៅ និងកាន់កាប់មិនដឹងថ្ងៃណា​គេ​ដកយកនោះទេ ព្រមទាំងមានកការរំលោភសិទ្ធិប្រជាពលរដ្ឋស្ទើគ្រប់រូបភាព។

ដោយឡែកអ៊ំប្រុសឈ្មោះ លាម លុន មកពីស្រុកកំពង់ស្វាយ ខេត្តកំពង់ធំ ក៏បានសង្កត់ធ្ងន់ថា លើសពីនេះ​អាជ្ញាធរ​មិនដែលបានធ្វើអន្តរាគមន៍ ជួយដោះស្រាយបញ្ហាជូនប្រជាពលរដ្ឋ ដែលរងគ្រោះទាំងនោះទេ ដោយបាននិយាយ​ថា ជាដីររបស់រដ្ឋ។

តែរាល់ការទាមទាររបស់ប្រជាពលរដ្ឋ ឲ្យលោកនាយករដ្ឋមន្រ្តី ហ៊ុន សែនលាលែងពីតំណែងនេះ លោក ផៃ ស៊ីផាន មន្ត្រីនាំពាក្យទីស្តីការគណៈរដ្ឋមន្រ្តី បានចាត់ទុកថា៖ «នេះជាសិទ្ធិនៃការទាមទារ»។ នៅក្នុងកិច្ចសម្ភាសន៍ខ្លីមួយ ជា​មួយទស្សនាវដ្ដីមនោរម្យព័ងអាំងហ្វូ  នៅល្ងាចថ្ងៃទី១១ ខែធ្នូ ឆ្នាំ២០១៣នេះ លោកបានហៅការទាមទារទាំងនោះថា «វាមិនឋិតនៅក្នុងអ្វី ដែលជា​អាណត្តិ​នៃច្បាប់»។

មន្ត្រីជាន់ខ្ពស់របស់រដ្ឋាភិបាលលោក ហ៊ុន សែន រូបនេះ បានពន្យល់បន្ថែមទៀតថា ការទាមទារទម្លាក់លោក​នាយករដ្ឋមន្ត្រី ឬរាជរដ្ឋាភិបាលបានមាន ពីរទិដ្ឋភាព។ ទិដ្ឋភាពស្របច្បាប់ទីមួយ គឺតាមរយៈ«ការបោះឆ្នោត» ដែលអាចទម្លាក់ បញ្ឍប់ ឬបន្តការងារនាយករដ្ឋមន្រ្តី តាមរយៈការបោះឆ្នោតជាសាកល។ ទិដ្ឋភាពទីពីរ អ្នក​ដែល​អាចទម្លាក់នាយករដ្ឋមន្រ្តីបាន គឺមានតែ «សភា» ដែលជាស្ថាប័នតែមួយ មានសិទ្ធិដកសេចក្តីទុកចិត្ត ពី​នាយករដ្ឋមន្រ្តី៕

-------------------------------------------
ដោយ៖ ក. គីមហេង - ថ្ងៃទី១១ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ