ម៉ម សូណង់ដូ៖ អាជ្ញាធរ​មិន​ដោះ​ស្រាយ​-គោរព​សន្យា តែ​អាង​វាយ​តប់

«មិនចាំបាច់រាយរ៉ាប់អ្នកក្រីក្រពេញមួយស្រុកខ្មែរទេ ប៉ុន្តែនេះជាតួនាទីអ្នកគ្រប់គ្រង។ (...) អ្នកគ្រប់គ្រងត្រូវតែ គោរព និងទទួលខុសត្រូវលើតួនាទីរបស់ខ្លួន លើការចុះហត្ថលេខារបស់ខ្លួន»។ នេះជាការលើកឡើងរបស់លោក ម៉ម សូណង់ដូ ប្រធានវិទ្យុសម្បុកឃ្មុំ នៅមុខសាលារាជធានីភ្នំពេញនាថ្ងៃទី២៥ ខែធ្នូនេះ។
Loading...
  • ដោយ: អ៊ុម វ៉ារី
  • កែប្រែចុងក្រោយ: December 26, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

«មិនចាំបាច់រាយរ៉ាប់អ្នកក្រីក្រពេញមួយស្រុកខ្មែរទេ ប៉ុន្តែនេះជាតួនាទីអ្នកគ្រប់គ្រង។ (...) អ្នកគ្រប់គ្រងត្រូវតែ គោរព និងទទួលខុសត្រូវលើតួនាទីរបស់ខ្លួន លើការចុះហត្ថលេខារបស់ខ្លួន»។ នេះជាការលើកឡើងរបស់លោក ម៉ម សូណង់ដូ ប្រធានវិទ្យុសម្បុកឃ្មុំ នៅមុខសាលារាជធានីភ្នំពេញនាថ្ងៃទី២៥ ខែធ្នូនេះ។


លោក ម៉ម សូណង់ដូ នៅមុខសាលារាជធានី។ (រូបថត MONOROOM.info/ O.Vary)

ហិង្សានិងច្បាប់ - បន្ទាប់ពីស្ងប់ស្ងាត់ មិនសូវលឺនៅតាមបណ្ដាញផ្សព្វផ្សាយមួយរយៈមក លោក ម៉ម សូណង់ដូ បានប្រតិកម្មតបត នៅថ្ងៃទី២៥ខែធ្នូនេះ ទៅនឹងការប្រើប្រាស់កម្លាំងប្រដាប់អាវុធជាបន្តរបន្ទាប់ ដើម្បីបង្ក្រាប​លើ​ក្រុមបាតុកម្មអហិង្សា។ ក្រុមបាតុករទាំងនោះ ដែលតែងតែធ្វើការស្វែងរកនូវការដោះស្រាយ និងការអន្តរាគម​ពី​រដ្ឋអំណាចមូលដ្ឋាន ដើម្បីដោះស្រាយនូវការរំលោភបំពានសិទ្ធិ សិទ្ធិដីធ្លី និងសិទ្ធិលំនៅដ្ឋាន ពីសំណាក់បុគ្គលមាន​អំណាចមួយចំនួន។

លោក ម៉ម សូណង់ដូ បានឆ្លៀតឱកាសនេះ ដើម្បីធ្វើការរិះគន់បន្ថែម ទៅលើថ្នាក់ដឹកនាំរបស់​ស្ថាប័នក្រសួងនានា​របស់រដ្ឋ ក៏ដូចជារដ្ឋាភិបាលក្នុងការមិនគោរព ទៅតាមអ្វីដែលខ្លួនបានសន្យា។ លោកបានលើកជាឧទាហរណ៍ថា ដូចករណីបូរីកីឡា ដែលបានសន្យាថានឹងសាងសង់ចំនួន១០អាគារ តែខាងក្រុមហ៊ុនសាងសង់​បានត្រឹមតែប្រាំបី​អាគារ បែរជារដ្ឋាភិបាល ឬអាជ្ញាធរមិនមានវិធានការដោះស្រាយ។ ដល់ពេលប្រជាពលរដ្ឋធ្វើការតវ៉ា អាជ្ញាធរ ឬ​រដ្ឋាភិបាលនោះ បែរជាធ្វើការវាយតប់លើប្រជាពលរដ្ឋទៅវិញ។ ករណីនេះលោកចាត់ទុកថាទង្វើ មិនត្រឹមត្រូវមួយ ក្នុងនាមជាថ្នាក់ដឹកនាំ។

«ពាក្យ​សម្តី» មាន​តម្លៃ​ជាង​ស្នេហា និង​កិត្តិយស

ប្រធានវិទ្យុសម្បុកឃ្មុំរូបនេះ បានបន្ថែមថាទាំងប្រជាពលរដ្ឋ ទាំងអាជ្ញាធរ ធ្វើយ៉ាងណាត្រូវតែយកច្បាប់ជា«ធំ» គោរពច្បាប់ និងសំអាងទៅលើច្បាប់ ពិសេសការគោរពនូវពាក្យសម្តីរបស់ខ្លូន។ ក្នុងមូលហេតុបែបនេះហើយ ទើប​លោកបានប្រៀបធៀបថា «ស្នេហាមានតម្លៃដូចជីវិត ហើយកិត្តិយសមានតម្លៃជាងលុយកាក់ និង​សម្បត្តិទ្រព្យ។ តែ​អ្វីដែលមានតម្លៃជាងស្នេហា និងកិត្តិយស គឺពាក្យ “សម្តី” ។ ដូច្នេះបើយើងនិយាយអ្វីត្រូវតែគោរព។ (...) ក្នុងនាម​ជា​ថ្នាក់ដឹងនាំ មិនគោរពពាក្យសម្តី ហើយមានបំណងចង់ឈ្នះ ចង់ចាញ់ទៅលើប្រជាពលរដ្ឋរបស់ខ្លួន នោះការដឹកនាំ និងគ្រប់គ្រង់របស់ខ្លួន វាគ្មានប្រយោជន៍អ្វីនោះទេ។»

ទោះយ៉ាងណាក៏ដោយអ្នកដឹកនាំ ដែលទទួលបាននូវសម្លេងគាំទ្រពីប្រជាពលរដ្ឋ ត្រូវតែយកចិត្ត​ទុកដាក់លើប្រជា​ពលរដ្ឋរបស់ខ្លួន មិនមែនប្រកាសសង្គ្រាម ប្រឆាំងនឹងពលរដ្ឋរបស់ខ្លួននោះទេ។ លោកបន្តរយ៉ាងដូច្នេះថា «ប្រជា​ពលរដ្ឋចង់រស់ ចង់បានយុត្តិធម៌ យើងមិនសម្រួលដល់ប្រជាពលរដ្ឋ ទៅជាយើងចង់ធ្វើសង្គ្រាម​ជាមួយពលរដ្ឋ​របស់​ខ្លួន។ ទាំងអស់នេះ មិនមែនជាការត្រឹមត្រូវទេ។»

ជាមួយនឹងការសម្តែងនូវការខកចិត្ត ចំពោះការមិនដោះស្រាយរបស់អាជ្ញាធរ ជូនប្រជាពលរដ្ឋដែលមានបញ្ហា លោក សូណង់ដូ បានថ្លែងទៅកាន់ក្រុមអ្នកបឹងកក់ថា «បើយើងនៅស្ងៀម ទុកឲ្យគេធ្វើបាប មិនមែនធ្វើបាបតែយើងទេ គេ​អាចធ្វើបាបរហូតដល់កូនចៅយើង។ នោះប្រទេសយើងមិនមានសន្តិភាព មិនមានសេរីភាព តើយើងអាចទ្រាំរស់​បានទេ?» លោកបញ្ជាក់ទៀតថា «យើងចង់បានប្រទេសមួយមាននីតិរដ្ឋ តែបើអ្នកកាន់ច្បាប់ អង្គុយលើច្បាប់ ហើយ​យើង​មិន​ហ៊ានប្រឆាំងអ្នកអង្គុលលើច្បាប់ តើពេលណាប្រទេសយើងបាននីតិរដ្ឋ?»។

មកដល់ពេលនេះ ទស្សនាវដ្តីមនោរម្យព័ងអាំងហ្វូមិនអាចសុំប្រតិកម្មតប ពីសាលារាជធានីភ្នំពេញបាននៅឡើយ ដោយសារតែ លោក ឡុង ឌីម៉ង់ អ្នកនាំពាក្យរបស់ស្ថាប័ននេះពុំទទួលទូរស័ព្ទ។

សូមរម្លឹកថា សេចក្ដីប្រតិកម្មរបស់លោក ម៉ម សូណង់ដូ ខាងលើនេះ បានធ្វើឡើងបន្ទាប់ពីមានការប្រើប្រាស់​នូវ​កម្លាំងហិង្សា​របស់អាជ្ញាធរ លើអ្នកតវ៉ាមកពីភូមិបឹងកក់ និងព្រះសង្ឃនៅមុខសាលារាជធានីភ្នំពេញ កាលពីម្សិល​ម៉ិញ។ ការ​បង្ក្រាបនេះ បានធ្វើឲ្យព្រះសង្ឃចំនួនពីរអង្គ និងមនុស្សប្រាំនាក់ផ្សេងទៀតបានរងរបួស។ រីឯខាង​សាលា​រាជធានីភ្នំពេញ បានទទួល​រងនូវការ​ខូចខាតទ្រព្យសម្បត្តិមួយចំនួន ដូចជាបែកកញ្ចក់បញ្ជរប្រកាសព័ត៌មាន នៅ​ខាងក្រៅរបងមុខសាលា​រាជធានី៕

-------------------------------------------
ដោយ៖ អ៊ុម វ៉ារី - ភ្នំពេញ ថ្ងៃទី២៥ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...