យុង ខេមរា តារាហ្វេសប៊ុកថ្មី ល្បីខាងទទួលការជេរប្រទេច
នៅប្រទេសកម្ពុជា ចង់ល្បីឈ្មោះ មិនពិបាកទេ។ ហើយបើចង់ល្បីឈ្មោះកាន់តែខ្លាំង បង្កើតទំព័រមួយតាមបណ្ដាញសង្គមហ្វេសប៊ុក ហើយធ្វើរឿងចម្លែកៗណាមួយទៅ នឹងច្បាស់ជាមានការចែករំលែក ហើយមិនយូឡើយ ម្ចាស់ទំព័រនោះ នឹងក្លាយជាតារាហ្វេសប៊ុកជាមិនខាន។ នេះជាករណី របស់ម្ចាស់ទំព័រមួយទើបនឹងបង្កើត មានឈ្មោះថា កញ្ញា យុង ខេមរា។
កញ្ញា យុង ខេមរា អ្នកសារព័ត៌មានរបស់ទូរទស្សន៍អប្សរា។ (រូបថត ហ្វេសប៊ុក)
តារាវិថី - ទំព័រថ្មីមួយមានឈ្មោះថា «Yung Khemara - យុង ខេមរា» ដែលម្ចាស់របស់ទំព័រ ត្រូវបានគេស្គាល់ថា ជាអ្នកសារពត៌មានប្រចាំទូរទស្សន៏អប្សរា ទើបត្រូវបានបង្កើតឡើង កាលពីថ្ងៃទី២៦ ខែធ្នូ ឆ្នាំ២០១៣នេះប៉ុណ្ណោះ។ ប៉ុន្តែរហូតមកថ្ងៃទី៣១ ខែធ្នូនេះ ទំព័ររបស់អ្នកសារព័ត៌មាននេះ មានអ្នកចុចចូលចិត្ត ដល់ទៅជាងប្រាំពាន់នាក់ទៅហើយ។ ទោះបីចុចចូលចិត្តច្រើនម្តេចក្តី ប៉ុន្តែប្រិយមិត្តលេងហ្វេសបុកទាំងនោះ មិនមែនសុទ្ឋតែស្រឡាញ់ ឬចូលចិត្តម្ចាស់គេហទំព័រម្នាក់នេះឡើយ។ ពួកអ្នកលេងហ្វេសបុកភាគច្រើន ប្រែជាប្រើប្រាស់ពាក្យជេរប្រមាថជាច្រើន រួមនឹងការកាត់តរូបភាពមិនគប្បីមួយចំនួនទៀត ដើម្បីបង្ហាញពីភាពស្អប់ខ្ពើមរបស់ពួកគេចំពោះម្ចាស់ទំព័រនេះទៅវិញ។
នាពេលថ្មីៗនេះ ទំព័រហ្វេសប៊ុក I love Cambodia Hot News ដែលមានអ្នកចុចចូលចិត្តប្រមាណជាង២៧ ម៉ឺននាក់ និងជាទំព័រមួយមាននិន្ទាការទៅរកគណបក្សប្រឆាំង បានចុះផ្សាយនូវប្រតិកម្មនានា ឆ្លើយតបនឹងពាក្យពេចន៏មួយចំនួន ដែលកញ្ញា យុង ខេមរា បានផ្សាយក្នុងទំព័ររបស់ខ្លួន ក្នុងអំឡុងពេលកន្លងមក។ ការឆ្លើយតបនេះ ត្រូវបានទទួលការគាំទ្រ ពីមិត្តភក្តិជាច្រើនតាមហ្វេសបុក ចុចចូលចិត្ត ចែករំលែក និងរិះគន់រាល់វគ្គនិមួយៗ មិនក្រោម ៤០០នាក់ឡើយក្នុងមួយលើកៗ។
ជាទូទៅសម្រាប់គោលការណ៏ប្រជាធិបតេយ្យ បើទោះជាគំនិតដែលមានសម្លេងភាគតិចក៏ដោយ ក៏គំនិតនោះតែងត្រូវបានទទួលស្គាល់ឬត្រូវបានការពារដែរ ដែលមិនខុសពីពាក្យចាស់ ដែលតែងពោលថា៖ «មនុស្សដប់ គំនិតដប់» ឡើយ។
ផ្ទុយទៅវិញ កញ្ញា យុង ខេមរា ដែលរងការរិះគន់ ជេរប្រទេចផ្ដាសារពីបណ្ដាជនជាច្រើននោះ មិនអាចចាត់ទុកថា នោះគ្រាន់តែជាការបញ្ចេញយោបល់ ឬការពិតដែលកញ្ញាខ្លួនឯង បានឃើញនោះឡើយ តែដោយសារកញ្ញាបានបង្ហោះឃ្លីបវីដេអូជាច្រើន មានលក្ខណៈជាការយកព័ត៌មាន ដែលផលិតចេញពីកម្មវិធី អប្សរាណេត របស់ទូរទស្សន៍អប្សរា។ សម្ដីសម្ដៅ និងកាយវិការរបស់នាង ដែលមានដំណើរទំនងជាអ្នកសារព័ត៌មានអាជីពនោះ ត្រូវរងនូវការរិះគន់ជាខ្លាំង ដោយសារតែនាងមិនដែលបានយក ឬថ្លែងយកការណ៍ពីក្រុមបាតុករនៃគណបក្សប្រឆាំង ឬក្រុមកម្មករដែលកំពុងទាមទារការតម្លើងប្រាក់ខែ ឬក៏ក្រុមពលរដ្ឋរងគ្រោះដោយការបណ្ដេញពីដីធ្លី ដែលធ្វើឲ្យគុណភាពព័ត៌មានរបស់នាង មានតុល្យភាព ឬឯករាជ្យនោះឡើយ។
ក្រៅពីក្រុម អ្នកគាំទ្រគណបក្សប្រជាជនកម្ពុជាដ៏តិចតួចចេញ ដែលបានដាក់មតិនូវពាក្យសម្ដីល្អៗឲ្យនាងនោះ អ្នកប្រើប្រាស់បណ្ដាញដទៃទៀត សុទ្ធតែបានជម្រះបញ្ជីជាមួយកញ្ញា យុង ខេមរា ដោយការរិះគន់ ឬការជេរផ្ដាសាទាំងអស់។ សិល្បការិនីម្នាក់ កញ្ញា ដាណេ ស៊ូណេណេ បានថ្លែងជាយោបល់តបថា «រឿងអញ្ចឹង ផ្សាយណាស់។ ចុះរឿងខ្លះៗ ដែលកងប្រដាប់អាវុធ សំលាប់គេទៀត ម៉េចមិនផ្សាយ?» រីឯអ្នករិះគន់ម្នាក់ទៀត បានធ្វើវីដេអូឃ្លីបប្រតិកម្មតបទៅកញ្ញា យុង ខេមរា ទៀតថា «នោះ ដោយសារតែនាង យុង ខេមរា ឯង មិនដែលជួបបញ្ហា ឬរងនូវអំពើអយុត្តិធម៌»។
ព្រះសង្ឃលួន សាវាត ដែលមានព្រះនាមល្បីឈ្មោះដែរនោះ បានសរសេរនៅក្នុងទីកន្លែងឲ្យយោបល់ នៃវីដេអូមួយរបស់កញ្ញា យុង ខេមរា ដូច្នេះថា «ក្រោយពីបានមើលកិច្ចសម្ភាសន៍ TVនេះហើយ តើគួរហៅថា ទូរទស្សន៍អប្សរា ឬហៅថា ទូរទស្សន៍ ទុរយសព្រាយបីសាច ? សម្ភាសន៍យកតែមតិស្រប មិនមានមតិផ្ទុយ ឬហៅថាតុល្យភាព តម្លាភាពនៃប្រភពព័ត៌មាន បន្តិចណាសោះ ? ឯណាទៅព័ត៌មានឯករាជ្យអព្យាក្រិត្យ?» ដោយល្បីថាជាសង្ឃ ពូកែផ្សព្វផ្សាយព័ត៌មានដែរនេះ ព្រះសង្ឃ លួន សាវាត បានមានសង្ឃដីការទៀតថា «អាត្មាគិតថា នឹងបបួលព្រះសង្ឃញាតិញោម ពុទ្ធបរិស័ទជនរួមជាតិសាសនាខ្មែរ ដែលស្រលាញ់យុត្តិធម៌ សច្ចធម៌ ព័ត៌មានសេរី ប្រជាធិបតេយ្យ សិទ្ធិមនុស្ស ទៅធ្វើបាតុកម្មសួរសុខទុក្ខ កញ្ញាបីសាចTVអប្សរា នៅស្ថានីយ៍ និងក្រសួងព័ត៌មានថ្ងៃណាមួយ ក្នុងពេលឆាប់ៗខាងមុខនេះជាមិនខាន ព្រោះអាត្មាភាពយើងខ្ញុំទាំងអស់គ្នា ក៏ចង់មានមតិចង់និយាយ តាមកញ្ចក់ទូរទស្សន៍ផងដែរ ហេតុអីអ្នកយកព័ត៌មានព្រាយបិសាចមិនមកសម្ភាសន៍ ?»
ទស្សនាវដ្តីមនោរម្យព័ងអាំងហ្វូ បានសុំប្រតិកម្មពីម្ចាស់ទំព័រហ្វសប៊ុក «Yung Khemara - យុង ខេមរា» កញ្ញា យុង ខេមរា ប៉ុន្តែមិនទាន់ត្រូវបានម្ចាស់ទំព័ររូបនេះ ឆ្លើយតបវិញនៅឡើយ។ បើសូម្បីនៅថ្ងៃទី ៣០ ខែធ្នូ ឆ្នាំ២០១៣មុននេះ កញ្ញា យុង ខេមរា បានបង្ហោះនូវរូបភាពរបស់ខ្លួន ដោយមិនបាននិយាយ ទាក់ទងដល់បញ្ហាសង្គម ឬនយោបាយក្តី ក៏រូបភាពកញ្ញាដ៏ស្រស់ស្អាតមួយនេះ នៅតែទទួលរងនៅការរិះគន់ច្រើនដដែល រហូតជាង៤០០យោបល់ ដែលភាគច្រើនសុទ្ធតែជាពាក្យជេរប្រទេច ពីអ្នកលេងហ្វេសប៊ុក៕
-----------------------------------------------
ដោយ៖ ក. សេងហុង - ភ្នំពេញ ថ្ងៃ៣១ ខែធ្នូ ឆ្នាំ ២០១៣
រក្សាសិទ្ឋដោយ៖ ទស្សនាវដ្តីមនោរម្យព័រអាំងហ្វូ