ហ្វេសប៊ុក ហ៊ុន សែន ថា​ក្រុម​ប្រឆាំង​កំពុង​តាំង​ខ្លួន​ជា​«នាយក​រដ្ឋមន្ត្រី»

ខណៈស្ថានការណ៍កំពុងជន់ជោរ ដោយសាររលកបាតុកម្ម និងកូដកម្មបានកើតឡើងជាបន្តបន្ទាប់ បូកផ្សំនឹងការ​បង្ក្រាប​យ៉ាងខ្លាំងក្លា ពីសំណាក់កងកម្លាំងប្រដាប់អាវុធរបស់អាជ្ញាធរនោះ លោកនាយករដ្ឋមន្ត្រី ហ៊ុន សែន តាម​រយៈទំព័រ​ហ្វេសប៊ុក ដែលគេជឿជាក់ថាជាទំព័រផ្លូវការបស់លោក បានសរសេរនៅមុននេះបន្តិចថា បក្សប្រឆាំង​និង​ក្រុមជ្រុលនិយមកំពុងតាំងខ្លួនជានាយករដ្ឋមន្រ្តី។
Loading...
  • ដោយ: កេសរ កូល
  • កែប្រែចុងក្រោយ: January 03, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ខណៈស្ថានការណ៍កំពុងជន់ជោរ ដោយសាររលកបាតុកម្ម និងកូដកម្មបានកើតឡើងជាបន្តបន្ទាប់ បូកផ្សំនឹងការ​បង្ក្រាប​យ៉ាងខ្លាំងក្លា ពីសំណាក់កងកម្លាំងប្រដាប់អាវុធរបស់អាជ្ញាធរនោះ លោកនាយករដ្ឋមន្ត្រី ហ៊ុន សែន តាម​រយៈទំព័រ​ហ្វេសប៊ុក ដែលគេជឿជាក់ថាជាទំព័រផ្លូវការបស់លោក បានសរសេរនៅមុននេះបន្តិចថា បក្សប្រឆាំង​និង​ក្រុមជ្រុលនិយមកំពុងតាំងខ្លួនជានាយករដ្ឋមន្រ្តី។


លោកនាយករដ្ឋមន្ត្រី ហ៊ុន សែន នៅមន្ទីរដ្ឋសភាជាតិ កាលថ្ងៃទី២០ ខែធ្នូ ឆ្នាំ២០១៣។ (រូបថត MONOROOM.info/ O.Vary)

វិបត្តិសង្គម - ទំព័រហ្វេសប៊ុក របស់លោកនាយករដ្ឋមន្ត្រី ហ៊ុន សែន បានសរសេរថា «ការប្រើប្រាស់សិទ្ឋិសេរីភាព គឺមិនមែនសំរាប់តែអុចអាលបង្ករបាតុកម្ម និងកុបកម្មហឹង្សា និងការញុះញុងអោយមានភាពរញេរញៃ នៅពាស​ពេញ​ប្រទេស ទើបហៅថាប្រជាធិបតេយ្យនោះទេ។ ការជេរប្រមាថ មាក់ងាយប្រមុខរាជរដ្ឋាភិបាល និង​ព្រះមហាក្សត្រ​នៃព្រះរាជាណាចក្រកម្ពុជា ក៏មិនមែនជាទង្វើល្អ សំរាប់ប្រទេសជាតិដែលកាន់ព្រះពុទ្ឋសាសនា និង​គោរព​​ស្រឡាញ់​ព្រះមហាក្សត្រដែរ។»

ដែលទំនងជាលើកបង្ហាញពីសមិទ្ធិផល ដែល​កើតចេញ«តែពីបាតដៃ»របស់គណបក្សប្រជាជនកម្ពុជា និង​រដ្ឋាភិបាល​​របស់លោកនោះ ទំព័រដដែលបានសរសេរទៀតថា «គំនិតនិងមហិច្ឆិតាបំផ្លាញសមិទ្ឋិផលទាំងឡាយ ដែលក្រុម​ខ្លួន​មិនបានកសាង គឺជាការបំផ្លាញប្រទេសជាតិទាំងមូល»។

ទំព័របស់លោក ហ៊ុន សែន ដែលបានក្លាយជានាយករដ្ឋមន្ត្រី តាមរយៈការតែងតាំងរបស់រដ្ឋសភានិតិកាលទីប្រាំ ដែលត្រូវបានបង្កើតដោយ​គណបក្សប្រជាជនកម្ពុជាតែមួយនោះ បានសរសេរព្រមានទៅកាន់ក្រុមគណបក្សប្រឆាំង និងបាតុករដែលកំពុងធ្វើបាតុកម្មក្នុងពេលនេះថា «មកទល់ម៉ោងនេះបក្សប្រឆាំង និងក្រុមប្រឆាំងជ្រុល​និយម​របស់ខ្លួន កំពុងតាំងខ្លួនជានាយករដ្ឋមន្រ្តី គ្មានស្តាប់អ្នកណាទាំងអស់។ ពួកគេកំពុងក្រឡុកប្រទេសជាតិ តាមរយៈ​ការញុះញុងបាតុកម្ម និងកុបកម្មរហូតដល់កំទេចទ្រព្យសម្បត្តិរោងចក្រ និងបាត់បង់អាយុជីវិតប្រជាពលរដ្ឋ​ថែម​ទៀត។ នេះជាទង្វើញុះញុងបែបអានាធិបតេយ្យ ដែលរាជរដ្ឋាភិបាលនឹងចាត់វិធានការតាមផ្លូវច្បាប់៕»

បាតុកម្ម-កូដករ ដែលមកទល់នឹងថ្ងៃនេះមានលក្ខណៈកាន់តែស្រួចស្រាវឡើង បន្ទាប់ពីមានព្រឹត្តិការណ៍​ចាប់ខ្លួន​បាតុករ និងមន្ត្រីសង្គមស៊ីវិល កាលពីថ្ងៃទី០២ ខែមករា ឆ្នាំ២០១៤ម្សិលម៉ិញ នៅរោងចក្រយ៉ាកជីង ក្នុងតំបន់​សេដ្ឋកិច្ចពិសេសភ្នំពេញ នៅតាមបណ្ដោយផ្លូវជាតិលេខបួន។ ការប្រឈមមុខរវាងបាតុករ-កូដករ និងកងកម្លាំង​ប្រដាប់អាវុធ នៅសួនឧស្សាហកម្មកាណឌីយ៉ា នៅតាមបណ្ដោយផ្លូវវេងស្រេង រាជធានីភ្នំពេញ បានបង្កឲ្យ​មាន​មនុស្សរងរបួសជាច្រើននាក់ និងបើតាមសេចក្ដីរាយការណ៍ចុងក្រោយ មានមនុស្សស្លាប់យ៉ាងហោចណាស់​ពីរ​នាក់ថែមទៀត។

លោក សម រង្ស៊ី ប្រធានគណបក្សសង្គ្រោះជាតិ បានថ្លែងជាសាធារណៈទៅកាន់ក្រុមបាតុករ កាលពីថ្ងៃទី០២ ខែ​មករា ឆ្នាំ២០១៤ នៅទី​លានប្រជាធិបតេយ្យ អំពាវនាវឲ្យមានការធ្វើបាតុកម្មអហិង្សាដែលមានរូបរាងកាន់តែធំ នៅ​ប៉ុន្មានថ្ងៃខាងមុខ ហើយបានហៅការបង្ក្រាបរបស់កងកម្លាំងអាជ្ញាធរ ថាបានអនុវត្តនូវ«អំពើព្រៃផ្សៃដូច​ពួកខ្មែរ​ក្រហម»។

សកម្មភាពបង្ក្រាបពីសំណាក់អាជ្ញាធរនេះ ត្រូវបានក្រុមអង្គការសង្គមស៊ីវិល ជាពិសេសក្រុមឃ្លាំមើលសិទ្ធិ​មនុស្ស​ធ្វើការថ្កោលទោស និងទាមទារឲ្យមាន ការដោះលែងជនដែលត្រូវបានឃាត់ខ្លួនទាំងប៉ុន្មាននោះ ជាបន្ទាន់។ រីឯ​ក្រុមពលរដ្ឋអ្នកប្រើប្រាស់បណ្ដាញសង្គមហ្វេសប៊ុកជាច្រើន ដែលមាននិន្នាការទៅខាងគណបក្ស​សង្គ្រោះជាតិ​នោះ បានចុះផ្សាយការយល់ឃើញ របស់ពួកគេយ៉ាងព្រោងព្រាតដូចគ្នាដែរ ពីអ្វីដែលពួកគេហៅការបង្ក្រាបនេះថា ជា​«បាតដៃទីបីរ»របស់លោកនាយករដ្ឋមន្ត្រី ហ៊ុន សែន ដូចដែលបុរសខ្លាំងរូបនេះ ធ្លាប់ថ្លែងទៅកាន់អ្នកសារព័ត៌មាន​កន្លងមក។

ពួកគេថែមទាំងនាំគ្នាធ្វើការវិភាគទៀតថា សកម្មភាពខ្លាំងដៃរបស់កងកម្លាំងអាជ្ញាធរ នៅពេលនេះ បានកើត​ឡើង​ក្រោយពេល​ដែលលោក ហ៊ុន សែន បានទៅធ្វើទស្សនកិច្ចផ្លូវរដ្ឋនៅប្រទេសវៀតណាម កាលពីសប្ដាហ៍កន្លង​មក​នេះ។ ក្រុមប្រឆាំងបានសង្ស័យថា ដំណើរទៅកាន់ប្រទេសវៀតណាម របស់លោកនាយករដ្ឋមន្ត្រី ក្នុងពេលដែល​ប្រទេសជាតិកំពុងជួបបញ្ហានេះ ជាការទៅទទួល«ឱវាទ»ឬ«កលឧបាយ»ពីប្រទេសវៀតណាមដែលជាមិត្ត«ម៉ឺន​ឆ្នាំ»​របស់លោក ដើម្បីត្រឡប់យកវាមកអនុវត្តន៍ក្នុងប្រទេសកម្ពុជា ក្នុងការការពារកៅអីរបស់លោក។

ការថ្លែងរបស់ទំព័រហ្វេសប៊ុក របស់លោក ហ៊ុន សែន ខាងលើត្រូវបានអ្នកតាមដានស្ថានការណ៍នយោបាយសង្គម វាយតម្លៃថា នេះជាដំណាក់កាលមួយដែលលោក ហ៊ុន សែន អាចនឹងប្រើប្រាស់យកទៅចោទប្រកាន់ក្រុមប្រឆាំង ថាចង់ធ្វើ«រដ្ឋប្រហារ»ទម្លាក់លោកចេញពីតំណែង។ តំណែងនាយករដ្ឋមន្ត្រី ដែលត្រូវបានតែងតាំងដោយ​រដ្ឋសភា​«ឯកបក្ស»ចេញ​ពីគណបក្សប្រជាជនកម្ពុជារបស់លោកតែមួយ បន្ទាប់ពីការបោះឆ្នោតសកលប្រកបដោយ​ភាព​ចម្រូងចម្រាស់កាលពីខែកក្កដាកន្លងមក៕

------------------------------------------------
ដោយ ៖ កេសរកូល - ភ្នំពេញ ថ្ងៃទី០៣ ខែមករា ឆ្នាំ២០១៤
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...