«ជ័យជំនះ ៧មករា បានសង្គ្រោះប្រជាជនកម្ពុជាឲ្យរស់រានមានជីវិតឡើងវិញ បានទាន់ពេលវេលាល្អណាស់»  នេះ​ជាកាលើកឡើងរបស់លោក ហេង សំរិន ប្រធានរដ្ឋសភា និងជាប្រធានកិត្តិយសគណបក្សប្រជាជនកម្ពុជា ក្នុងទិវា​រំឭកខួបទី៣៥ នៃទិវាជ័យជំនះ ៧មករា ខណៈបរិយាកាសនយោបាយមួយ កំពុងមានសភាពតឹងតែងខ្លាំងនៅឡើយ នៅរាជធានីភ្នំពេញ ក្រោយការបង្ក្រាបបាតុកម្មយ៉ាងរង្គាល នៅផ្លូវវេងស្រេង និងការបណ្ដេញចេញដោយហិង្សា នូវបាតុកម្មរបស់គណបក្សប្រឆាំង ពីទីលានប្រជាធិបតេយ្យ កាលពី២-៣ថ្ងៃមុន។

ប៉េងប៉ោង ដែលគេបម្រុងនឹងបង្ហោះឡើង ដើម្បីបញ្ចប់ទិវាថ្ងៃ៧មករាឆ្នាំ២០១៤នេះ។ (រូបថត MONOROOM.info/ SengHong)

៧ មករា ១៩៧៩-២០១៤ - ទិវារម្លឹកខួបលើកទី៣៥ ជ័យជំនះ ៧ មករា ជាការរំលឹកខួបជ័យជំនះលើ របបប្រល័យ​ពូជសាសន៍ខ្មែរ​ក្រហម ហើយបានរំដោះប្រជាជនកម្ពុជាច្រើនលាននាក់ ដែលបានរស់ក្រោមសម័យកាល​ដ៏​អប្រិយ ជាង៣ឆ្នាំ៨ខែ២០ថ្ងៃ។ ប៉ុន្តែព្រឹត្តិការណ៍នេះ មិនអាចរាប់ត្រឹមតែជាជ័យជំនះលើរបបនេះប៉ុណ្ណោះទេ តែគេ​ត្រូវ​រំលឹក​ឡើងវិញផងដែរ ពីថ្ងៃជាប្រវត្តិសាស្ត្រមួយ ដែលកងទ័ពនៃប្រទេសវៀតណាម បានចូល​ឈ្លានពាន​ប្រទេស​កម្ពុជា ហើយបានបន្តុបរបប«អាយ៉ងថ្មី»មួយទៀត នៅកម្ពុជា។ នេះបើតាមអ្នកស្រាវជ្រាវ និងប្រវត្តិវិទូជាច្រើន ដែលបាន​សរសេរនៅក្នុងអត្ថបទ ឬសៀវភៅរាប់មិនអស់របស់ពួកគេ។

សម្រាប់គណបក្សប្រជាជនកម្ពុជា ដែលបានតាំងខ្លួនថាជា«បិតាសន្តិភាព» និងរដ្ឋាភិបាលសព្វថ្ងៃ ថ្ងៃ៧មករា វា​ជា​ថ្ងៃកំណើតទីពីរសម្រាប់ប្រជាជនកម្ពុជា ប៉ុន្តែវាក៏បានបើកទំព័រថ្មី សម្រាប់ឲ្យពួកគេបានឡើង​មកកាន់អំណាចរហូត​ដល់សព្វថ្ងៃនេះដែរ។ ហើយការប្រារព្ធទិវានេះដោយគណបក្សមួយនេះ មិនដែលត្រូវបាន​អាក់ខានមិនបានធ្វើ​សូម្បី​តែមួយឆ្នាំឡើយ រហូតវាត្រូវបានអនុម័ត្រជាបុណ្យជាតិ ហើយតម្រូវឲ្យមន្ត្រីរាជការបានឈប់សម្រាកពេញមួយថ្ងៃ។

នៅថ្ងៃទី០៧ ខែមករា ឆ្នាំ២០១៤នេះ នាមជ្ឈមណ្ឌលសន្និសីទកោះពេជ្រ គេសង្កេតឃើញមានវត្តមាន នៃអ្នក​ចូល​រួមក្នុងពិធីនេះ មានចំនួនជាច្រើនម៉ឺននាក់ មានក្មេងចាស់ ប្រុសស្រី តែអ្វីដែលជាការកត់សម្គាល់នោះ មានមនុស្ស​វ័យចំណាស់ មានចូលរួមប្រហែលជាហុកសិបភាគរយ ដែលបានធ្វើដំណើរមកពីតាមខេត្តនានា។ លោក ជា ស៊ីម ប្រធានគណបក្សដែលអវត្តមាននៅឆ្នាំមុន បានចេញមុខសារជាថ្មីក្នុងមិទ្ទិញថ្ងៃនេះ អបដោយលោក ហ៊ុន សែន អនុប្រធានគណបក្ស​ប្រជាជនកម្ពុជា និងលោក ហេង សំរិន ប្រធានកិត្តិយស​នៃ​គណបក្សប្រជាជនកម្ពុជា។

ពិធីដែលត្រូវបានចាប់ផ្តើមពីព្រឹកម៉ោង៧ និង៣០នាទីនោះ បានបញ្ចប់ទៅនៅម៉ោងប្រមាណជា ៩ព្រឹក ដោយ​មាន​ការដោះលែងសត្វព្រាប និង ការបង្ហោះប៉េងប៉ោង អមដោយពាក្យស្លោកមួយចំនួន។ តែបើទោះជាមានផ្សាយ​បន្ត​ផ្ទាល់​ទៅតាមទូរទស្សន៍ និងប្រព័ន្ធឃោសនាការជាច្រើនលើសលប់ នៅក្នុងប្រទេសក៏ដោយ តែទិវានេះមិនសូវជា​បានទាក់ទាញការចាប់អារម្មណ៍ បណ្ដាជនទូទៅនោះឡើយ។ ផ្ទុយទៅវិញ ក្រុមអ្នករិះគន់ និងអ្នកគាំទ្រគណបក្ស​ប្រឆាំង បានផ្សព្វផ្សាយពត៌មានជាច្រើន តាមប្រព័ន្ធផ្សព្វផ្សាយរបស់គេ និងនៅតាមបណ្តាញសង្គមហ្វេសបុក ដើម្បី​បង្ហាញពីការមិនគាំទ្រ របស់ពួកគេចំពោះថ្ងៃនេះ ហើយថែមទាំងបរិហាពីការឈ្លានពានចូលប្រទេសកម្ពុជា និងដាក់​ប្រទេសនេះ នៅក្រោមអាណានិគមនិយម ពីសំណាក់ប្រទេសវៀតណាមនោះទៀត។

សម័យកាល«ទៅជិះឡាន មកជិះចាន»

វីដេអូ រូបភាព និងការបកស្រាយជាច្រើន ត្រូវបានគេផ្សព្វផ្សាយតាមបណ្ដាញសង្គមហ្វេសប៊ុក ធ្វើការបរិហា​យ៉ាង​ចាស់ដៃទៅលើព្រឹត្តិការណ៍នេះ។ មនុស្សមួយចំនួនទៀត ដែលបានរស់នៅទាន់សម័យកាលនោះ បានរំលឹក​មក​វិញនូវព្រឹត្តិការណ៍ដ៏រន្ធត់ នៃយុទ្ធនាការ«ក៥»ដែលខ្មែររាប់សិបម៉ឺននាក់ ត្រូវបានអាជ្ញាធរនៅក្រោមបញ្ជារបស់​វៀតណាម បញ្ជូនឲ្យទៅកាន់សមរភូមិជួរមុខ ហើយបានស្លាប់នៅទីនោះ ដោយជាន់មីន មានជំងឺ។ល។ អ្នកកំប្លែង​ដ៏ល្បីឈ្មោះម្នាក់ ក៏ធ្លាប់បានច្រៀងចំអកនឹងរឿងនេះដែរ ដូចជានៅក្នុងឃ្លាថា«ទៅជិះឡាន មកជិះចាន»ជាដើម។

នៅក្នុងវីដេអូមួយ លោក ប៉ែន សុវណ្ណ ដែលគេស្គាល់ថាធ្លាប់ជាអតីតសមមិត្តកៀកស្មា ជាមួយនឹង លោក ជា ស៊ីម លោក ហេង សំរិន និងលោក ហ៊ុន សែន នោះ បានបកស្រាយនូវព្រឹត្តិការណ៏មួយចំនួន ប្រឆាំងនឹងថ្ងៃ ៧ មករា ដែលរូបលោកធ្លាប់ជាអ្នកចូលរួមផ្ដួចផ្ដើមដែរ។ អតីតនាយករដ្ឋមន្ត្រី នៃសាធារណរដ្ឋប្រជាមានិតកម្ពុជា ចំណាស់​ជាង ៧០ឆ្នាំរូបនេះ បានផ្សាយវីដេអូតាមទំព័រហ្វេសប៊ុករបស់លោកថា ថ្ងៃ៧ មករា ជាថ្ងៃដែលយួនចូលកាន់កាប់​ប្រទេសកម្ពុជា ក្នុងលេសថា បានសង្គ្រោះកម្ពុជាពីសង្គ្រាម។ លោក ប៉ែន សុវណ្ណ បានបញ្ជាក់ទៀតថា ដោយសារ​តែ​រូបលោក បានប្រឆាំងនឹងបំណងចង់ដាក់ប្រទេសកម្ពុជា ទៅក្នុងអាណានិគមនិយមបែបថ្មី របស់ប្រទេសវៀតណាម​នេះហើយ ទើបធ្វើឲ្យរូបលោក ត្រូវបានគេដកចេញពីតំណែង ហើយយកលោក ទៅដាក់គុកងងឹតអស់ជាង១០ឆ្នាំ ក្នុងពន្ធនាគារនៃប្រទេស​កុម្មុយនីស​។

រីឯនៅទីស្នាក់ការគណបក្សសង្គ្រោះជាតិវិញ មេដឹកនាំគណបក្សនេះ បានធ្វើសន្និសីទកាសែតមួយ ដែលបានផ្សាយ​ពីយុទ្ធការនយោបាយរបស់ខ្លួនជាបន្តទៅមុខទៀត ប្រឆាំងនឹងមេដឹកនាំគណបក្សប្រជាជនកម្ពុជា ជាពិសេសលោក ហ៊ុន សែន និងរដ្ឋាភិបាលរបស់លោក ដែលបានបញ្ជាឲ្យបង្ក្រាបយ៉ាងជូរចត់ ក្រុមអ្នកតវ៉ាប្រឆាំង​នៅតាមបណ្ដោយ​ផ្លូវវេងស្រេង និងបណ្ដេញចេញ​ដោយហិង្សាពីទីលានប្រជាធិបតេយ្យ នូវបាតុកម្មដោយសន្តិវិធីរបស់ក្រុមប្រឆាំង។ លោក កឹម សុខា អនុប្រធានគណបក្សសង្គ្រោះជាតិ បានថ្លែងនៅ​ពេលនោះថា គណបក្សរបស់លោក កំពុងសិក្សា​ជាមួយក្រុមមេធាវីអន្តរជាតិមួយក្រុម ដើម្បីប្ដឹងជនអ្នកទទួលខុសត្រូវ​មួយចំនួន នៅក្នុងព្រឹត្តិការណ៍ទាំងនេះ ទៅកាន់​តុលាការឧក្រិដ្ឋកម្មអន្តរជាតិ៕

សូមទស្សនារូបភាព ពីទិវាបុណ្យថ្ងៃ៧មករា៖

--------------------------------------
ដោយ៖ ក. សេងហុង ថ្ងៃ០៧ ខែមករា ឆ្នាំ ២០១៣
រក្សាសិទ្ឋដោយ៖ ទស្សនាវដ្តីមនោរម្យព័រអាំងហ្វូ