ប្រធានសមាគមខ្មែរកម្ពុជាក្រោមលោក ថាច់ សេដ្ឋា បានរិះគន់ចំពោះរដ្ឋាភិបាលកម្ពុជា ដែលនៅស្ញៀមមិនព្រមជួយ​ពលរដ្ឋ​ខ្មែរក្រោមថា កំពុងតែរំលោភលើរដ្ឋធម្មនុញ្ញ។ ការិះគន់ររបស់ប្រធានសមាគមខ្មែរកម្ពុជាក្រោមបែបនេះ បាន​ធ្វើឡើង​ក្រោយពីរដ្ឋាភិបាលកម្ពុជា បានសម្រេចបដិសេធសំណើរបស់ខ្មែរក្រោម ដែលស្នើឲ្យជួយ​អន្តរាគមន៍​ទៅ​រដ្ឋាភិបាល​វៀតណាម បន្ទាប់ពីជនជាតិខ្មែរក្រោមមួយចំនួន ត្រូវបានចាប់ខ្លួន នៅប្រទេសវៀតណាមកាលពី​ពេល​កន្លងទៅ។

ខេត្ត​ខ្មែរ​នៅកម្ពុជាក្រោម ដែល​បារាំង​បាន​កាត់​ឲ្យ​យួន​នៅ​ថ្ងៃ​៤ មិថុនា ១៩៤៩។ (រូបថត​ ឯកសារ)

ខ្មែរក្រោម - ភ្លាមៗក្រោយពីរដ្ឋាភិបាលកម្ពុជា តាមរយៈក្រសួងការបរទេសនិងសហប្រតិការណ៍អន្តរជាតិ បាន​បដិសេធចំពោះសំណើរបស់សមាគមខ្មែរកម្ពុជាក្រោម ដែលចង់ឲ្យរដ្ឋាភិបាលកម្ពុជា​ជួយអន្តរាគន៍ទៅរដ្ឋាភិបាល​វៀតណាម ឲ្យដោះលែងពលរដ្ឋខ្មែរក្រោម ដែលត្រូវអាជ្ញាធរវៀតណាមចាប់ខ្លួនដាក់ក្នុងពន្ធនាគាររួចមក។ តំណាង​សមាគមខ្មែរកម្ពុជា ក្រោមបានចេញមុខរិះគន់ ចំពោះទង្វើរបស់រដ្ឋាភិបាលថា ជាការខ្លាចប្រទេសវៀតណាម និង​រំលោភលើច្បាប់រដ្ឋធម្មនុញ្ញ ដែលជាច្បាប់កំពូលរបស់កម្ពុជា។

ប្រធានសមាគមខ្មែរកម្ពុជាក្រោមលោក ថាច់ សេដ្ឋា នៅថ្ងៃទី២០ ខែមករានេះ បានប្រតិកម្មខ្លាំងៗ ដោយបាន​ចាត់​ទុកការការបដិសេធរបស់រដ្ឋាភិបាលកម្ពុជាដែលមិនព្រមជួយអន្តរាគមន៍ទៅអាជ្ញាធរវៀណាមថា ជាទង្វើដែល​ផ្ទុយ​ពីច្បាប់រដ្ឋធម្មនុញ្ញរបស់ប្រទេសកម្ពុជាទាំងស្រុង ពីព្រោះថាពលរដ្ឋខ្មែរក្រោមក៏ជាជនជាតិខ្មែរដែរ ដែលតម្រូវឲ្យ​រដ្ឋាភិបាលខ្មែរយកចិត្តទុកដាក់ការពារ និងថែរក្សា មិនឲ្យអាជ្ញាធរវៀតណាមរំលោភបំពានសិទ្ធិរបស់ពួកគេ។ប្រធាន​សមាគមខ្មែរក្រោមរូបនេះ បន្តថា រដ្ឋាភិបាលកម្ពុជាអាចជួយពលរដ្ឋខ្មែររស់នៅប្រទេសដទៃបាន នៅពេលដែល​ពលរដ្ឋទាំងនោះមានបញ្ហា តែហេតុអ្វីបានជារដ្ឋាភិបាល មិនអាចជួយពលរដ្ឋខ្មែរក្រោមបាន?

លោក ថាច់ សេដ្ឋា បានចាត់ទុកសម្មកភាពរបស់រដ្ឋាភិបាលកម្ពុជា នៅពេលនេះថា ជាការកំសាក និងកោតខ្លាច​រដ្ឋាភិបាលវៀតណាម មិនហ៊ានជួយខ្មែរគ្នាឯង។ លោកថា ហេតុផលរបស់រដ្ឋាភិបាលក្រុងភ្នំពេញ​មិនសមហេតុ​ផល​នោះទេ ពីព្រោះថា រឿងខ្មែរក្រោមនេះ កាលពីព្រះបាទបរមរតនកោដិនៅមានព្រះជន្មនៅឡើយ ឲ្យតែជួបការរំលោភ​បំពានពីអាជ្ញាធរវៀតណាមម្តងៗ ព្រះអង្គតែងចេញព្រះភ័ក្រ្តការពារ និងជួយអន្តរាគមន៍ទៅអាជ្ញាធរវៀតណាម​ជានិច្ច។

សូមបញ្ជាក់ថា កាលពីថ្ងៃទី ០៧ ខែមករា ឆ្នាំ ២០១៤ កន្លងទៅសមាគមន៍ខ្មែរកម្ពុជាក្រោម បានសរសេរលិខិតដាក់​ជូនទៅក្រសួងការបទេសកម្ពុជា ដើម្បីស្នើឲ្យជួយអន្តរាគមន៍ទៅរដ្ឋាភិបាលវៀតណាម ឲ្យដោះលែងព្រះសង្ឃខ្មែរ ២ អង្គ និងពលរដ្ឋខ្មែរក្រោម ៧ នាក់ទៀត ដែលអាជ្ញាធរវៀតណាម ចាប់យកទៅដាក់គុកនៅក្នុងប្រទេសវៀតណាម។ ជាការឆ្លើយតប រដ្ឋាភិបាលកម្ពុជាតាមរយៈក្រសួងការបរទេស បានចាត់ទុកការស្នើសុំរបស់​សមាគមខ្មែរកម្ពុជា​ក្រោម​ថា រដ្ឋាភិបាលកម្ពុជាមិនអាចជួយបាននោះទេ ពីព្រោះថា ពលរដ្ឋខ្មែរក្រោមរស់នៅក្នុងប្រទេសវៀតណាម ត្រូវស្ថិត​នៅក្រោមការគ្រប់គ្រងរបស់ច្បាប់វៀតណាម។

លើសពីនេះទៅទៀតនៅក្នុងលិខិតចុះថ្ងៃទី ១៧ ខែមករា ឆ្នាំ ២០១៤ ដែលចុះចុះហត្ថលេខាដោយរដ្ឋលេខាក្រសួង​ការបរទេស លោក អ៊ុច បូរិទ្ធ ដែលទើបផ្សព្វផ្សាយដល់អ្នកការសែតកាលពីល្ញាចមិញនេះ បានសរសេរថា កម្ពុជានិង​វៀតណាមមានអធិបតេយ្យរៀងៗខ្លួន ហើយរាជរដ្ឋាភិបាលកម្ពុជា ប្រកាន់យកនូវគោលនយោបាយមិនជ្រៀតជ្រែក ក្នុងកិច្ចការផ្ទៃក្នុងប្រទេសដទៃ។ ហេតុដូច្នេះហើយ រាជរដ្ឋាភិបាលកម្ពុជាមិនអាចជួយអន្តរាគមន៍ ទៅរដ្ឋាភិបាល​វៀតណាមបាននោះឡើយ។

គួរសម្គាល់ថា ដែនដីខ្មែរក្រោមដែលអតីតជាទឹកដីរបស់កម្ពុជា ហើយពេលនេះ ត្រូតត្រាដោយរដ្ឋអំណាច​កុម្មុយនីស​វៀតណាមមានខេត្តចំនួន ២១ និងមានផ្ទៃដីសរុបប្រមាណជាង ៧ ម៉ឺនគីឡូម៉ែត្រក្រឡា។ បច្ចុប្បន្នពលរដ្ឋខ្មែរក្រោម​ដែលរស់នៅលើកទឹកដីកំណើតរបស់ខ្លួន គឺកម្ពុជាក្រោមនេះ ត្រូវអាជ្ញាធរវៀតណាមរំលោភសិទ្ធិគ្រប់បែបយ៉ាង ដោយហោចទៅសូម្បីតែរៀនអក្សរសាស្រ្តខ្មែរ ក៏ត្រូវអាជ្ញាធរយួនមិនឲ្យសិក្សាដែរ។ មកទល់ពេលនេះ មានព្រះសង្ឃ និងពលរដ្ឋខ្មែរក្រោមមិនតិចនាក់ទេ ដែលកំពុងជាប់ពន្ធនាគារនៅក្នុងប្រទេសវៀតណាម។ ភាពឈឺចាប់ ដែលមិន​អាចទ្រាំនឹងទង្វើរបស់រដ្ឋអំណាចកុម្មុនីសវៀតណាម ប្រព្រឹត្តមកលើខ្មែរក្រោមបែបនេះ ទើបពលរដ្ឋខ្មែរកម្ពុជាក្រោម នៅទូទាំងពិភពលោក បានស្វះស្វែងរកសិទ្ធិសេរីភាពរបស់ខ្លួនគ្រប់ច្រកល្ហក ជាពិសេសគឺសង្ឃឹមចង់ឲ្យ​រដ្ឋាភិបាល​កម្ពុជាជួយការពារសិទ្ធិរបស់ពួកគេ។ ប៉ុន្តែជាញឹកញាប់រដ្ឋាភិបាលកម្ពុជា តែងតែបដិសេធ​នូវសំណើរទាំងនោះ៕

-------------------------------------------------
ដោយ ជា ធីរិទ្ធ (ទំនាក់ទំនង៖ [email protected]) - ភ្នំពេញថ្ងៃទី ២០ ខែមករា ឆ្នាំ២០១៤