ប្រធានវិទ្យុសំបុកឃ្មុំលោក ម៉ម សូណង់ដូ បានរិះគន់ដោយឥតសំចៃមាត់ថា រដ្ឋាភិបាលគ្រប់គ្រង​ដោយគណបក្ស​ប្រជាជនកម្ពុជា គឺជាអ្នករំលោភរដ្ឋធម្មនុញ្ញ យ៉ាងពិតប្រាកដ ចំណែកឯពលរដ្ឋកម្ពុជាមិន​បានរំលោភ​រដ្ឋធម្មនុញ្ញ​នោះទេ តែពួកគេគឺជាជនរងគ្រោះ ពីការរំលោភដោយរដ្ឋាភិបាល។

លោក ម៉ម សូណង់ដូ នៅមុខសាលារាជធានី។ (រូបថត MONOROOM.info/ O.Vary)

វិបត្តិសង្គម - ក្នុងពិធីហែញត្តិដាក់តាមស្ថានទូតនានា ទាមទារឲ្យដោះលែងលោក វន់ ពៅ និងជន២២នាក់​ផ្សេង​ទៀត នៅថ្ងៃទី២៩ ខែមករា ឆ្នាំ២០១៤ នេះ លោក ម៉ម សូណង់ដូ ជាប្រធានវិទ្យុសំបុកឃ្មុំ បានអត្ថាធិប្បាយ​ទៅកាន់​អ្នកសារព័ត៌មានថា អ្វីដែលពលរដ្ឋ និងអង្គការសង្គមស៊ីវិលបានធ្វើ គឺដើម្បីទាមទារសិទ្ធិសេរីភាព និងយុត្តិធម៌ ដែល​មានចែងក្នុងរដ្ឋធម្មនុញ្ញ។ ប្រធានវិទ្យុសំបុកឃ្មុំរូបនេះបានបន្ថែមថា រដ្ឋាភិបាលបច្ចុប្បន្នដឹកនាំប្រទេស តាមគណបក្ស​នយោបាយ ហើយរំលងការគោរពរដ្ឋធម្មនុញ្ញ។

លោក ម៉ម សូណង់ដូ បញ្ជាក់ថា៖ « រដ្ឋាភិបាលតែងចោទប្រជាពលរដ្ឋថា រំលោភរដ្ឋធម្មនុញ្ញ ប៉ុន្តែផ្ទុយមកវិញ រដ្ឋាភិបាលទេដែលរំលោភរដ្ឋធម្មនុញ្ញ។ រដ្ឋាភិបាលកំពុងដើរលើផ្លូវខុស ដោយល្ងិតល្ងង់បំផុត ហើយមិនគ្រប់​គ្រង​តាមរដ្ឋធម្មនុញ្ញ គឺគ្រប់គ្រងតាមគណបក្សនយោបាយ។ គាត់កំពុងញុះញង់ឲ្យពលរដ្ឋ និងសមត្ថកិច្ចឈ្លោះគ្នា (...)។ អ្វីដែលយើងធ្វើ គឺធ្វើតាមរបៀបអព្យាក្រិត្យ និងរដ្ឋធម្មនុញ្ញ ដើម្បីឲ្យប្រទេសយើងមានការអភិវឌ្ឍន៍ សន្តិភាព និង​តម្លាភាព។ ធ្វើយ៉ាងម៉េចដើម្បីកុំឲ្យខ្មែរឈ្លោះគ្នា»។

ជុំវិញការលើកឡើងរបស់លោក ម៉ម សូណង់ដូ ទស្សនាវដ្តីមនោរម្យ.អាំងហ្វូ មិនអាចទាក់ទងមន្រ្តីអ្នកនាំពាក្យ​រដ្ឋាភិបាលកម្ពុជា និងមន្រ្តីគណបក្សប្រជាជនកម្ពុជា ដើម្បីធ្វើការអត្ថាធិប្បាយបាននៅឡើយទេ។ តែសមត្ថកិច្ច​របស់​រដ្ឋាភិបាល កាលពីពេលថ្មីៗនេះ បានបដិសេធនូវរាល់ការចោទប្រកាន និងបានការពារប្រតិបត្តិការ​វាយបង្រ្កាប​យ៉ាង​​ចាស់ដៃ លើបាតុកម្មអហិង្សា ទាមទារហ្វ្រេកង់ទូរទស្សន៍ និងទាមទារកម្លាំងផ្សាយវិទ្យុបន្ត ដឹកនាំដោយលោក ម៉ម សូណង់ដូ ប្រធានវិទ្យុសំបុកឃ្មុំ។

គួរកត់សម្គាល់ថា រដ្ឋធម្មនុញ្ញ គឺជាច្បាប់កំពូល ឬជាច្បាប់គ្រឹះរបស់កម្ពុជា តែច្បាប់នេះតែងត្រូវបានក្រុម​ប្រឹក្សា​ធម្មនុញ្ញ គណបក្សនយោបាយ អ្នកនយោបាយ អ្នកច្បាប់អ្នកវិភាគឯករាជ្យ និងមជ្ឈដ្ឋានមួយចំនួនទៀតយកមក​បកស្រាយ ដើម្បីបម្រើផលប្រយោជន៍ ឬមហិច្ឆតានយោបាយរបស់ពួកគេ តាមតែរបៀបរៀងខ្លួន។

ចំពោះការបកស្រាយ«ខ្លឹមសារ»រដ្ឋធម្មនុញ្ញ អ្នកតាមដានស្ថានការណ៍នយោបាយកម្ពុជា និងអ្នកវិភាគឯករាជ្យ​កម្ពុជាបាន សង្កេតឃើញថា គណបក្សប្រជាជនម្ពុជាដែលជាគណបក្សគ្រប់គ្រងអំណាច និងគណបក្សសង្រ្គោះជាតិ​ដែលជាគណបក្សជំទាស់ តែងលើកយក«មានត្រា» នៃច្បាប់រដ្ឋធម្មនុញ្ញ មកបកស្រាយវាយប្រហារលើគ្នា​ទៅវិញ​ទៅមក ក្នុងហេតុផលកេងចំណេញនយោបាយ ជាបន្តបន្ទាប់។

ចំណែកឯកក្រុមប្រឹក្សាធម្មនុញ្ញ ជាស្ថាប័នកំពួលដែលច្បាប់បានកំណត់ថា មានអំណាច ក្នុងការបកស្រាយ​រដ្ឋធម្មនុញ្ញ ក៏ត្រូវបានមជ្ឈដ្ឋានមួយចំនួន ពិសេសអ្នកមាននិន្នាការនយោបាយទៅរកគណបក្សសង្រ្គោះជាតិ បានវាយតម្លៃថា គ្មានឯករាជ្យភាព ខណៈសមាសភាពនៃស្ថាប័ននេះ ភាគច្រើនមានប្រភពចេញមក ពីគណបក្ស​ប្រជាជនកម្ពុជា៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៩ ខែមករា ឆ្នាំ២០១៤