នៅថ្ងៃទី៦ និងទី៧ខែកុម្ភៈខាងមុខនេះ នាយករដ្ឋមន្រ្តីកម្ពុជាលោក ហ៊ុន សែន នឹងទៅធ្វើទស្សនកិច្ចផ្លូវរដ្ឋក្នុងប្រទេស​ឡាវ។ ក្នុង​ដំណើរ​ទស្សនកិច្ច​នេះ លោក ហ៊ុន សែន និងលោកថងស៊ីង ថាំម៉ាវង្ស នាយករដ្ឋមន្រ្តីនៃប្រទេសឡាវ នឹង​ត្រូវ​ចុះ​ហត្ថលេខា​លើ​អនុស្សារណៈនៃការយោគយល់ និងកិច្ចព្រមព្រៀងស្តីពីសហប្រតិបត្តិការរវាងកម្ពុជា និងឡាវ​ចំនួន​៧ផងដែរ។

លោក ហ៊ុន សែន នៅពេលលោក ចុះពិនិត្យការដ្ឋានស្ពានស្ទឹងមានជ័យ ថ្ងៃទី៣១ ខែកក្កដា ឆ្នាំ២០១៣។ (រូបថត REUTERS/Samrang Pring)

ការទូត - លោក ហ៊ុន សែន នាយករដ្ឋមន្រ្តីនៃប្រទេសកម្ពុជា នឹងធ្វើដំណើរទស្សនកិច្ចទៅកាន់​ប្រទេស​ឡាវចំនួន​ពីរ​ថ្ងៃ គឺនៅថ្ងៃទី៦ និងថ្ងៃទី៧ ខែកុម្ភៈខាងមុខនេះ តាមការអញ្ចើញរបស់លោក ថងស៊ីង ថាំម៉ាវង្ស នាយក​រដ្ឋមន្រ្តីនៃ​ប្រទេសឡាវ។ នេះបើយោងសេចក្តីជូនដំណឹងព័ត៌របស់ក្រសួងការបរទេស និងសហប្រតិការអន្តរជាតិនៅថ្ងៃទី៣១ ខែមករា ឆ្នាំ២០១៤។

សេចក្តីប្រកាសព័ត៌មាន របស់ក្រសួងការបរទេសកម្ពុជាដដែលនោះ បានបញ្ជាក់ថាអនុស្សារណៈនៃការយោគយល់ និងកិច្ចព្រមព្រៀងស្តីពីសហប្រតិបត្តិការ រវាងកម្ពុជា និងឡាវចំនូនប្រាំពីរនឹងត្រូវចុះហត្ថលេខា​នៅក្នុង​ដំណើរ​ទស្សនកិច្ចផ្លូវការរបស់ លោកនាយករដ្ឋមន្ត្រីហ៊ុន សែន ទៅកាន់ប្រទេសឡាវជាមួយ លោកនាយករដ្ឋមន្រ្តី​នៃប្រទេស​ឡាវនៃដំណើទស្សនកិច្ចចំនួនពីរថ្ងៃនេះ ។

ឯកសារដែលត្រូវចុះហត្ថលេខាទាំងនោះរួមមាន៖ ទី១ អនុស្សារណៈយោគយល់ស្តីពីកិច្ច​សហប្រតិបត្តិការ​អភិវឌ្ឍន៍​វិស័យសុខាភិបាល។ ទី២ អនុស្សារណៈយោគយល់ ស្តីពីកិច្ចសហប្រតិបត្តិការវិស័យច្បាប់ និងយុត្តិធម៌។ ទី៣ អនុស្សារណៈយោគយល់ស្តីពីសហប្រតិបត្តិការវិស័យវប្បធម៌ និងសិល្បៈសំរាប់ឆ្នាំ២០១៤ដល់២០១៧។ ទី៤ កិច្ច​ព្រមព្រៀងស្តីពីវិស័យអប់រំសំរាប់ឆ្នាំ ២០១៤ ដល់ ២០១៨ ទី៥ ផែនការកិច្ចសហប្រតិបត្តិការសំរាប់ឆ្នាំ២០១៤ រវាង​ក្រសួងមហាផ្ទៃ និងក្រសួងសន្តិសុខសាធារណៈ ទី៦ អនុស្សារណៈស្តីពីការបង្កើតអគ្គកុងស៊ុលរវាងកម្ពុជា និងឡាវ និងទី៧ កិច្ចព្រមព្រៀងស្តីពីការបង្កើតចំណងសម្ព័ន្ធមេត្រីភាពរវាងភ្នំពេញ និងវៀងច័ន្ទ។

ក្នុងដំណើរទស្សនៈកិច្ចនេះដែរ នឹងមានអមដំណើរដោយ លោកហោ ណាំហុង រដ្ឋមន្រ្តីក្រសួងការបរទេស និងសហ​ប្រតិការអន្តរជាតិ លោក សុខ អាន រដ្ឋមន្រ្តីទទួលបន្ទុកទីស្តីស្តីការគណៈរដ្ឋមន្រ្តី និងសមាជិកដទៃទៀត។

លើសពីនេះទៅទៀត លោកនាយករដ្ឋមន្រ្តីហ៊ុនសែន និងគណៈប្រតិភូ ដែលអមដំណើរជាមួយ ក៏នឹងជួបសម្តែង​ការ​គួរសមដាច់ដោយឡែកជាមួយលោក ជួបម៉ាលី សៃញ៉ាសន ប្រធានរដ្ឋនៃសាធារណរដ្ឋប្រជាធិបតេយ្យ​ប្រជាមានិត​ឡាវ និងលោកស្រី ប៉ានី យ៉ាថរទូ ប្រធានសភាជាតិនៃប្រទេសឡាវផងដែរ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) -ភ្នំពេញ ថ្ងៃទី ៣១ ខែមករា ឆ្នាំ២០១៤