ក្ដីអ្នកការសែតបារាំងនៅឧទ្ទរណ៍ ពីបទធ្វើសញ្ចារកម្ម មេធាវីមានសង្ឃឹម
សំនុំរឿងកាត់ទោសរបស់លោក ដានីញ៉ែល ឡេណេ (Daniel Lainé) ទៅដល់សាលាឧទ្ទរណ៍ ត្រូវបានបើកសវនាការនៅថ្ងៃសុក្រទី២១ខែកុម្ភៈនេះ មួយឆ្នាំបន្ទាប់ពីសាលក្រមសម្រេចឲ្យលោកជាប់ទោស ដោយសាលាដំបូងរាជធានីភ្នំពេញ ពីបទធ្វើ«សញ្ចារកម្ម»។ លោក ដានីញ៉ែល ឡេណេ អ្នកសារព័ត៌មាន ដែលបានធ្វើបទយកការណ៍មួយ ពីសេវាកម្មបម្រើផ្លូវភេទនៅកម្ពុជា និងមេធាវីការពារក្ដីរបស់លោកផង បានប្រកែកថាជាការចោទប្រកាន់ប្រកបដោយភាពអយុត្តិធម៌។
ផ្លាកសញ្ញាបញ្ជាក់ពីយុត្តិធម៌ ពីខាងក្រៅសាលាឧទ្ទរណ៍។ MONOROOM.info photo/ O. Vary
ប្រព័ន្ធយុត្តិធម៌ - លោក ដានីញ៉ែល ឡេណេ ត្រូវបានកាត់ទោសឲ្យជាប់ពន្ធនាគារ៧ឆ្នាំ ដោយសាលក្រមរបស់សាលាដំបូងរាជធានីភ្នំពេញ កាលពីខែមករាឆ្នាំទៅម៉ិញ ដែលត្រូវជាការកាត់ក្ដីលើកទីពីរ បន្ទាបពីការកាត់ក្ដីលើកទីមួយ យ៉ាងប្រញ៉ាប់ប្រញ៉ាល កាលពីឆ្នាំ២០១០ នៅក្នុងកម្រិតទោសតែមួយដូចគ្នា។
ក្នុងសវនាការសាលាឧទ្ទរណ៍ នៅព្រឹកថ្ងៃសុក្រនេះ ព្រះរាជអាជ្ញា អ៊ីម សូផាន មិនបានស្នើសុំឲ្យមានការផ្ដន្ទាទោស ប្រឆាំងនឹងអ្នកសារព័ត៌មានជនជាតិបារាំងនេះទេ តែក៏មិនបានសុំឲ្យមានការលើកលែងទោសនោះដែរ។ លោកគ្រាន់តែស្នើសុំឲ្យតុលាការ ពិនិត្យចំនុចសង្ស័យចំនួនពីរ ដែលទាក់ទងនឹងទៅនឹងពេលវេលានៃបទចោទប្រកាន់។
ព្រះរាជអាជ្ញារូបនេះ បានចោទសួរនៅក្នុងអង្គសវនាការថា «បើមានបទសញ្ចារកម្ម តើជនសង្ស័យបានទទួលប្រាក់ពីករណីនេះឬទេ?»
បន្ទាប់ពីសវនាការបានបិទបញ្ចប់ មេធាវីទាំងពីររបស់លោក ឡេណេ បានចេញមកខាងក្រៅ ដោយសម្ដែងក្ដីសង្ឃឹមច្រើននៅក្នុងសំនុំរឿងនេះ។ លោក មេធាវីជនជាតិខ្មែរ គង់ សំអុន បានថ្លែងបញ្ជាក់ នៅក្នុងសេចក្ដីប្រកាសព័ត៌មានមួយថា «នៅពេលតតាំងគ្នា ក្នុងអង្គសវនាការ ព្រះរាជអាជ្ញាបានសម្ដែងមន្ទិលរបស់គាត់ ទាក់ទងទៅនឹងការដាក់ទម្ងន់ទោស ទៅលើជនជាប់ចោទ ហើយលោកក៏មិនបានស្នើសុំឲ្យមានការដាក់ទោសអ្វីទាំងអស់ ប្រឆាំងនឹងកូនក្ដីខ្ញុំដែរ។ ដូច្នេះយើងអាចសង្ឃឹមបានថា លោក ដានីញ៉ែល ឡេណេ នឹងត្រូវបានរួចទុក្ខទោស ពីការដាក់ទោសដ៏អយុត្តិធម៌នេះ។»
សាលក្រមសម្រេចរបស់សាលាឧទ្ទរណ៍ នឹងត្រូវប្រកាសនៅថ្ងៃទី០៥ ខែមិនាខាងមុខ។
តាមការស្នើសុំរបស់អាជ្ញាធរកម្ពុជា អ្នកការសែត ដានីញែល ឡេណេ បានជាប់ឈ្មោះនៅក្នុង«បញ្ជីក្រហម» របស់នគរបាលអន្តរជាតិ (Interpol)។ ដោយមូលហេតុនេះហើយ ទើបអ្នកការសែតរូបនេះ ត្រូវបានប្រទេសមួយធ្វើការឃាត់ខ្លួនលោក និងបន្ទាប់មកត្រូវបានគេបណ្ដេញចេញពីប្រទេសនោះ។ ប៉ុន្តែនៅខែកុម្ភៈ ឆ្នាំ២០១៣ ឈ្មោះរបស់លោក បានរលប់បាត់ពីគេហទំព័ររបស់នគរបាលអន្តរជាតិនោះទៅវិញ។ បើតាមមេធាវីបានឲ្យដឹងថា លោក ឡេណេ ត្រូវបានគេលប់ឈ្មោះចេញពីបញ្ជីក្រហមនោះទាំងស្រុង នៅប៉ុន្មានខែក្រោយមក។
«បនចាប់ជំរិតដោយស្របច្បាប់» សម្រាប់អង្គការអ្នកយកព័ត៌មានគ្មានព្រំដែន
បទយកការណ៍ស៊ើបអង្កេត ស្ដីពីទេសចរណ៍ផ្លូវភេទនៅកម្ពុជាក្នុងឆ្នាំ២០០៣ របស់អ្នកការសែតរូបនេះ បានថតយករូបជនជាតិបារាំងម្នាក់ ដែលរស់នៅក្នុងប្រទេសកម្ពុជា និងបានយល់ព្រមអោយមានការផ្សាយរូបគាត់ ក្នុងលក្ខខ័ណ្ឌមិនអោយឃើញមុខ និងស្គាល់សម្លេង។ តែបើទោះជាមាន ការបិតបាំងមុខ និងការប្ដូរសម្លេង នៅក្នុងបទយកការណ៍នេះក៏ដោយ ក៏ជនជាតិបារាំងនោះ ត្រូវបានស្គាល់ដោយគ្រួសាររបស់គាត់ ក្នុងពេលដែលទូរទស្សន៍ តេអេហ្វអង (TF1) របស់បារាំង បានចាក់ផ្សាយ ក្នុងកម្មវិធីមួយ មានចំណងជើងថា «សិទ្ធិក្នុងការដឹង (Le droit de savoir)» កាលពីឆ្នាំ២០០៣កន្លងទៅ។
ក្នុងពេលលោកវិលត្រឡប់មកកម្ពុជា ក្នុងឆ្នាំ២០០៤ លោក ដានីញ៉ែល ឡេណេ ត្រូវបានក្រសួងមហាផ្ទៃកម្ពុជាកោះហៅ ទៅតាមពាក្យបណ្ដឹងរបស់ជនជាតិបារាំងនោះ។ ដើម្បីអនុញ្ញាតអោយលោកបានរួចខ្លួនមកវិញ អ្នកកាសែតរូបនេះ ត្រូវបានគេស្នើឲ្យចុះហត្ថលេខា លើកិច្ចសន្យាសំណងជម្ងឺចិត្តមួយ មានទឹកប្រាក់ចំនួន ១២៥ ពាន់ដុល្លាអាមេរិក (ត្រូវជា ៩៧ ៥០០អ៊ឺរ៉ូ)។ ករណីនេះ ត្រូវបានអង្គការអ្នកយកព័ត៌មានគ្មានព្រំដែន ចេញសេចក្ដីថ្លែងការណ៍នៅពេលនោះ ថាជាការឃុបឃិត រួមគ្នាប្រព្រឹត្តិអំពើពុករលួយ ដែលមិនអាចទទួលយកបាន ហើយបានហៅសកម្មភានោះ ជា«បនចាប់ជំរិត»មួយ ដោយស្របច្បាប់នៅកម្ពុជា។
នៅឆ្នាំ២០០៦ ខណៈលោកឡេណេ បានវិលត្រឡប់មកកម្ពុជាជាថ្មីទៀត ដើម្បីការងារថតភាពយន្ដឯកសារជាច្រើននោះ លោកត្រូវបានអាជ្ញាធរខ្មែរដកហូត លិខិតឆ្លងដែនរបស់លោក និងបានហាមលោក មិនអោយចេញពីប្រទេសម្ដងទៀត។ ហេតុការណ៍នោះ បានជម្រុញអោយលោកលួចភៀសខ្លួន និងលួចឆ្លងដែនដោយខុសច្បាប់ ទៅកាន់ប្រទេសថៃ ដើម្បីគេចខ្លួនពីការរុកគួនយាយ៉ី ពីសំណាក់អាជ្ញាធរខ្មែរ។
លោក ដានីញែល កើតក្នុងឆ្នាំ ១៩៤៩ ធ្លាប់ឈ្នះពានរង្វាន់ «អ្នកសារព័ត៌មានឯកនៃពិភពលោក» ឆ្នាំ១៩៩១។ លោកជាអតីតអ្នកថតរូបប្រចាំទីភ្នាក់ងារ ហ្គាមា (Gamma) តែសព្វថ្ងៃលោក ជាអ្នកកាសែតធ្វើការដោយឯករាជ្យមួយរូប។ ស្នាដៃនៃបទយកការណ៍របស់លោក ត្រូវគេចាក់ផ្សាយក្នុងទូរទស្សន៍ជាច្រើន ទាំងក្នុងប្រទេសបារាំង និងទាំងនៅឯបរទេស៕
----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី២១ ខែកុម្ភៈ ឆ្នាំ២០១៤