ហ្វេសប៊ុក ហ៊ុន សែន ចោទបក្សប្រឆាំង ថាមាន«និន្នាការក្រហម»
ថ្ងៃទី០៤ ខែមិនា ឆ្នាំ២០១៤ នេះ ទំព័រហ្វេសប៊ុកដែលមានឈ្មោះថា Samdech Hun Sen, Cambodian Prime Minister បានសរសេរនៅក្នុងទំព័ររបស់ខ្លួន ដែលក្នុងន័យចោទប្រកាន់ ទៅលើគណបក្សប្រឆាំង ក្នុងពេលធ្វើបាតុកម្មកន្លងមក ថាជានយោបាយដែលនាំឲ្យខ្មែរបែកបាក់ ហើយថានោះជានយោបាយដែលមាន«និន្នាកាក្រហម»។
រូបភាពអមដោយសំណេរ ដែលរិះគន់គណបក្សប្រឆាំង ថាធ្វើនយោបាយមាន«និន្នាកាក្រហម»។ (រូបថតផ្ដិតពីហ្វេសប៊ុក)
នយោបាយកម្ពុជា - ក្នុងទំព័រហ្វេសប៊ុកមួយ ដែលមានអ្នកតាមដាន និងចូលចិត្តប្រមាណ ពីរសែននាក់ និងដែលគេជឿជាក់ថា ទំព័ររបស់ លោកនាយករដ្ឋមន្រ្តី ហ៊ុន សែននោះ បានសរសេររាយរ៉ាប់នៅលើ«ជញ្ជាំង»របស់ខ្លួនថា ចាប់តាំងពីមុនការបោះឆ្នោតមកទល់ពេលនេះ គឺបក្សប្រឆាំងបានខំអន្ទងអូសទាញប្រជាពលរដ្ឋ និង យុវជនអោយផុងលង់ជឿលើនយោបាយសន្យាយីហោស្រុកបារាំង។ ទំព័រនោះ បានសរសេរចោទប្រកាន់ត្រង់ៗថា គណបក្សប្រឆាំងបានធ្វើ«កុបកម្មហិង្សា»ជាច្រើនលើក ដែលបានបណ្តាលអោយ«សមាជិកជាច្រើននាក់ស្លាប់ របួសពិការដាច់បាយ អស់គោក្របី អស់ផ្ទះនៅ ជីវភាពកាន់តែយ៉ាប់ទៅៗ មិនដូចការសន្យារបស់គាត់»។
ក្រោយពី«ជញ្ជាំង»ត្រូវបានផ្សាយបានបន្ដិចមក អ្នកប្រើប្រាស់ហ្វេសប៊ុកមួយរូបឈ្មោះថា Roeung Vuthy បានចោទសួរវិញភ្លាមថា៖ «ខ្ញុំសូមសួរវិញថា តើកាលដែលធ្វើឲ្យ សមាជិកជាច្រើននាក់ស្លាប់ របួសពិការ ដាច់បាយ អស់គោក្របី អស់ផ្ទះនៅ ជីវភាពកាន់តែយ៉ាប់ទៅៗ ទាំងអស់នេះគឺដោយសារអ្នកណា?» រីឯអ្នកប្រើប្រាស់ម្នាក់ទៀត Sedhi Sedh បានសរសេរតបវិញថា «យីហោស្រុកបារាំង គឺគ្រាន់បើជាងអាយ៉ងយួនហៅមិនលឺ!»
រីឯ Voeun Tola ដែលទំនងជាយល់ស្របនឹងការលើកឡើង របស់ទំព័រហ្វេសប៊ុកលោកនាយករដ្ឋមន្រ្តី ហ៊ុន សែន ខាងលើ បានបញ្ចេញយោបល់ដោយជួយបន្ទរការបរិហាទៀតថា «តាំងពីដើមដល់ចប់ សង្រ្គោះជាតិបានធ្វើអ្វីខ្លះហើយ ក្រៅពីពីចោទថាយួន ពុករលួយ លក់ជាតិ និងក្បត់ជាតិ ឃើញតែនិយាយពាកបែបនេះដដែលៗ គ្មានបានការអ្វីទាំងអស់ ក្រៅពីបង្កចលាចល ម្នាក់ៗអួតសុទ្ធតែស្រលាញ់ជាតិ តែបានធ្វើអ្វីចំពោះជាតិហើយឬនៅ ?»។ ការលើកឡើងនេះ ទំនងជាចង់និយាយអំពីការលាបពណ៌ ដែលបានកើតឡើងយ៉ាងព្រោងព្រាត នៅក្នុងប្រទេសកម្ពុជាសព្វថ្ងៃនេះ រវាងក្រុមអ្នកគាំទ្រនិងប្រឆាំងទៅវិញទៅមក។
ប៉ុន្តែប្រសិនជាអ្នកគាំទ្រលោក ហ៊ុន សែន លើកឡើងពីការលាបពណ៌របស់ក្រុមអ្នកគាំទ្រគណបក្សប្រឆាំង ទៅលើមេដឹកនាំជា«ប្រវត្តិសាស្ត្រ»របស់ខ្លួននោះ ទំព័រហ្វេសប៊ុក ហ៊ុន សែន ដដែលក៏មិនអន់ប៉ុន្មានដែរ ក្នុងការលាបពណ៌ត្រឡប់ទៅគណបក្សប្រឆាំងវិញ។ ដូចនៅក្នុងឃ្លាសរសរថា «តាមការចូលរួមពីប្រជាពលរដ្ឋទាំងក្នុង និងក្រៅប្រទេស អស់រយៈពេលប៉ុន្មានខែនេះ នៅក្នុងយុទ្ឋសាស្រ្តកុបកម្មផ្លាស់ប្តូរទាំងហិង្សា និងអហិង្សារបស់បក្សប្រឆាំង គឺបានបង្ហាញអោយឃើញកាន់តែច្បាស់ អំពី"និន្នាការក្រហម"ប្រឆាំង និងជាតិសាសន៍ឯង»។
«និន្នាការក្រហម» ដែលគ្មាននរណាគិតថា ជាការលើកឡើងដោយវិចារណញ្ញាណពិតប្រាកដនោះទេ។ នរណាៗ ក៏ដឹងដែរថា គឺលោក ហ៊ុន សែន ខ្លួនលោកទៅវិញទេ ដែលធ្លាប់ជាអតីតទាហានខ្មែរក្រហមកុម្មុយនីស ហើយបានរត់ចោលជួរ និងងាកមកប្រឆាំងរបបនេះវិញ ក្រោយការជួយគាំទ្រពីប្រទេសវៀតណាមកុម្មុយនីសមួយទៀតនោះ។ បន្ទាប់ពីអ្វីដែលលោក ហ៊ុន សែន និយាយថា បានរំដោះប្រជាជនកម្ពុជាចេញពីរបបកុម្មុយនីសខ្មែរក្រហមនោះហើយ លោក ហ៊ុន សែន និងបណ្ដាសមមិត្តរបស់លោក ត្រូវបានបន្ដុបឡើងធ្វើមេដឹកនាំដោយវៀតណាម ដើម្បីតម្លើងរបបកុម្មុនីសថ្មីបែបវៀតណាមមួយទៀត ដែលសុទ្ធសឹងតែជារបបប្រកាន់«និន្នាការក្រហម»ទាំងអស់។
រហូតមកដល់ថ្ងៃនេះ ព្រះរាជាណាចក្រកម្ពុជាទីពីរ នៅក្រោមការដឹកនាំដ៏«ចាស់វស្សា»របស់លោក ហ៊ុន សែន និងគណបក្សប្រជាជនកម្ពុជា ដែលជាអតីតគណបក្សកុម្មុយនីសបង្កើតដោយវៀតណាមនោះ ក៏តែងរងនូវការរិះគន់ថា កំពុងស្ថិតនៅក្រោយការគ្រប់គ្រង តាមបែបកុម្មុយនីស«ក្រហម»នោះនៅឡើយដែរ។
Mean Chey ដោយមិនយល់ស្រប និងទំព័រហ្វេសប៊ុកខាងលើ បានប្រតិកម្មថា «សូម្បីតែកូនក្មេងបៀមដៃក៏មិនជឿសម្តេចដែរ ល្មមឈប់បោករាស្ត្រខ្មែរទៀតទៅសម្តេច គួរតែអាណិតអានាគតពលរដ្ឋខ្មែរខ្លះផងទៅ មានតែខ្មែរទេដែលចេះយោគយលខ្មែរដូចគ្នា យួនវាគ្មានដឹងគុណខ្មែរទេ»៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) -ភ្នំពេញ ថ្ងៃទី ០៤ ខែមិនា ឆ្នាំ២០១៤