សម្ភាស​ពលរដ្ឋ​រង​គ្រោះ៖ បណ្តឹង​ទៅ​តុលាការ​ដូច «បង់​អំបិល​ក្នុង​ទន្លេ»

ទាំងពលរដ្ឋរងគ្រោះ ទាំងពលរដ្ឋដែលបានចូលរួមគាំទ្រ ការដាក់ពាក្យបណ្ដឹងនៅសាលាដំបូងរាជធានី ប្រឆាំងនឹង​ជនបង្កឲ្យមានការវាយ​បែកក្បាល ទៅលើស្ត្រីមកពីសហគមន៍បូរីកីឡា បានថ្លែងចោទប្រកាន់ប្រព័ន្ធតុលាការកម្ពុជា ថាមិនរកខុសត្រូវឲ្យពលរដ្ឋនោះឡើយ ហាក់បីដូច «បង់អំបិលចូលទន្លេ» ដែលបង្កឲ្យមានជនខិលខូច​កាន់​តែ​កើន​ឡើងៗយ៉ាងដូច្នេះ។
Loading...
  • ដោយ: អ៊ុម វ៉ារី
  • កែប្រែចុងក្រោយ: March 11, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ទាំងពលរដ្ឋរងគ្រោះ ទាំងពលរដ្ឋដែលបានចូលរួមគាំទ្រ ការដាក់ពាក្យបណ្ដឹងនៅសាលាដំបូងរាជធានី ប្រឆាំងនឹង​ជនបង្កឲ្យមានការវាយ​បែកក្បាល ទៅលើស្ត្រីមកពីសហគមន៍បូរីកីឡា បានថ្លែងចោទប្រកាន់ប្រព័ន្ធតុលាការកម្ពុជា ថាមិនរកខុសត្រូវឲ្យពលរដ្ឋនោះឡើយ ហាក់បីដូច «បង់អំបិលចូលទន្លេ»  ដែលបង្កឲ្យមានជនខិលខូច​កាន់​តែ​កើន​ឡើងៗយ៉ាងដូច្នេះ។


អាគារសាលាដំបូងរាជធានីភ្នំពេញ ក្នុងទីតាំងថ្មី។ (រូបថត ឯកសារ)

ប្រព័ន្ធយុត្តិធម៌ - ប្រព័ន្ធយុត្តិធម៌របស់ប្រទេសកម្ពុជា តែងរងការចោទប្រកាន់ជារឿយៗ ថាគ្រាន់តែជា«ម៉ាស៊ីន» ដើម្បី​កាត់ក្ដីបម្រើឲ្យអ្នកកាន់អំណាច និងអ្នកមានប្រាក់បុណ្យស័ក្ដិប៉ុណ្ណោះ។ សូមអានការថ្លែងជាបន្តបន្ទាប់ របស់​ពលរដ្ឋដែលមិនត្រឹមតែរងគ្រោះ នឹងការបណ្ដេញចេញ ពីដីធ្លីផ្ទះសម្បែងនោះទេ តែបានរងគ្រោះនឹងការវាយ​សំពង​រហូតបែកក្បាល ដួលសន្លប់នោះ ដោយក្រុមអ្នកមានអំណាច ឬពីក្រុមកងកម្លាំងរបស់អាជ្ញាធរនោះថែមទៀត ដូច​ខាង​ក្រោម៖

អ្នកស្រី ម៉ៅ សុខា បានលើកឡើងថា រាល់ពាក្យបណ្តឹងរបស់ប្រជាពលរដ្ឋស្លូតត្រង់ ដែលតែងតែប្តឹងផ្តល់ ជាមួយ​អ្នក​មានអំណាច ឬជាមួយនិងអ្នកមានលុយកាក់ បុណ្យសក្តិ មិនដែលត្រូវបានតុលាការ លើកមកធ្វើការចាត់ការឡើយ ភាគច្រើនតែងតែកប់សំណុំរឿងនោះចោល ដោយមិនទាំងបានបញ្ជាក់ពីមូលហេតុនោះទៀត។ ពេលប្រជាពលរដ្ឋ​រងគ្រោះ ស្វែងរកការអន្តររាគមន៍ដើម្បីយុត្តិធម៌ ក្រុមទាំងនោះមិនត្រឹមតែមិនរកយុត្តិធម៌ឲ្យពលរដ្ឋទេ ទាំងរដ្ឋាភិបាល ទាំងអាជ្ញាធម៌ ដឹងតែពីវាយដំ ដឹងតែពីចាប់។ ចំណែកអ្នកវាយ អ្នកកប្រព្រឹត្ត មិនដែលឃើញ (តុលាការ) ហៅអ្នកណា មកសាកសួរបានម្នាក់នោះទេ។

អ្នកស្រី បាននិយាយបញ្ជួសដូច្នេះថា «យូរៗគង់តែឆេះកន្លែងហ្នឹងទេ ឲ្យតែមិនដោះស្រាយ ហើយយក (ពាក្យបណ្តឹង​ពលរដ្ឋ) ទៅគរទុក យូរៗគង់តែឆេះទាំងចៅក្រម ឆេះទាំងព្រះរាជអាជ្ញានោះទេ»។

អ្នកស្រី យ៉ាម បុប្ផា ដែលជាសកម្មជនសិទ្ធិលំនៅដ្នានដែរនោះ ក្រោយពីតុលការបានធ្វើការដោះលែង អ្នកស្រីនៅតែ​បន្តរការទាមទារឲ្យរដ្ឋាភិបាលដោះស្រាយបញ្ហា ដីធ្លី និងសិទ្ធិលំនៅដ្ឋាន ឲ្យទៅពលរដ្ឋស្លូតត្រង់។ នៅមុខសាលា​ដំបូង​រាជធានីភ្នំពេញ ជាមួយនឹងអ្នកបូរីកីឡា អ្នកស្រីបានរិះគន់លើប្រព័ន្ធតុលាការ ឬមន្រ្តីតុលាការមួយចំនួនថា «មានតែតុលាការសម័យនេះទេ ដែលគេបាចអំបិល បាចម្ទេស ធ្វើរូបទីងមោងដុត ជាមួយនឹងការដាក់ទំនាយ នៅតែ​មិនមានការកែប្រែ»។

តំណាងអ្នកបូរីកីឡាមួយរូប ក្នុងការប្តឹងលោកអភិបាល និងអភិបាលរងខណ្ឌ៧មករា អ្នកស្រី ឆាយ គឹមហ៊ន បាន​លើកឡើងថា អ្នកស្រីនឹងមិនសង្ឃឹមចំពោះបណ្តឹនេះ ត្រូវបានតុលាការលើកមកពិចារណានោះទេ ។ អ្នកស្រីបាន​ពន្យល់ថា «តែនេះជានីតិវិធី មុននឹងពួកខ្ញុំដាក់ទៅតាមអង្គការសង្គមស៊ីវិល ឬ បណ្តាស្ថានទូត។ (...) ពាក្យបណ្តឹង​របស់ពួក ខ្ញុំនាពេលកន្លងមក តុលាការតែងតែកប់ចោយ មិនដែលលើកយកមកចាត់ការ ម្តងណានោះទេ។ តែបើ​ពាក្យបណ្តឹងខាងក្រុមហ៊ុនប្តឹងវិញ យ៉ាងយូរមួយសប្តាហ៍ តុលាការកោះហៅពួកខ្ញុំមកសាកសួរភ្លាម។»។

ពរពោះជិតប្រាំបីខែអ្នកស្រី ហាស់ សុចិន្តា ដែលរងរបួសពីការវាយតប់កាលពីថ្ងៃទី១៤ ខែកុម្ភៈ ក្នុងសហគមន៍​បូរីកីឡា បានរម្លឹក ពាក្យបណ្តឹងពលរដ្ឋមួយ ដែលបានដាក់មកតុលាការតាំងពីថ្ងៃទី៣ ខែមករា ប្តឹងអ្នកស្រី ស៊ុយ សុផាន ថាមកទល់នឹងពេលនេះ តុលាការមិនបានកោះហៅមកតទល់គ្នា ចំពោះមុខឡើយ។ តែផ្ទុយមកវិញអ្នកស្រី ស៊ុយ សុផាន បានប្តឹងប្រជាពលរដ្ឋតែប្រាំថ្ងៃគត់ តុលាការបានចេញដីកាចាប់ពលរដ្ឋទាំងនោះដាក់គុកតែម្តង។

ទស្សនាវដ្តីមនោរម្យ.អាំងហ្វូ មិនអាចសុំការសម្ភាសប្រតិកម្មតប ពីមន្រ្តីនៃសាលាដំបូងរាជធានីភ្នំពេញ ចំពោះ​ការ​ចោទប្រកាន់​របស់ប្រជាពលរដ្ឋខាងលើនេះបានទេ។

លោក ណង អូនី មន្រ្តីច្បាប់មកពីអង្គការសិទ្ធិលំនៅដ្ឋាន ដែលកំពុងតាមដាន ការដាក់ពាក្យបណ្តឹងរបស់ពលរដ្ឋ បាន​លើកឡើងថា តុលាការមួយនេះ ប្រាកដជានឹងមិនលើកយកសំណុំរឿង មកដោះស្រាយនោះទេ។ លោកបាន​អះអាង​ថា នេះមិនមែនជាលើកទីមួយនោះទេ មានច្រើនករណីណាស់ ដែលតុលាការតែងតែផ្អឹបទុក ឬមិនចាត់ការ ដោយ​ហេតុផលនេះឬហេតុផលនោះ ព្រោះតែការគេចវេស ពីការដោះស្រាយមិនរកយុត្តិធម៌​សម្រាប់ពលរដ្ឋ​ស្លូតត្រង់៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១០ មីនា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...