សាលារាជធានីភ្នំពេញបានប្រកាសបិទ ទីលានប្រជាធិបតេយ្យជាបណ្តោះអាសន្ន។ ការប្រកាសបិទនេះ គឺស្រប​ពេល​ដែលគណបក្សសង្រ្គោះជាតិ បានប្រកាសផ្តាច់ការចរចាជាមួយគណបក្សប្រជាជនកម្ពុជា ហើយព្រមានថា​នឹងធ្វើ​មហាបាតុកម្មជាថ្មីក្នុងពេលខាងមុខ។ សម្រាប់មន្រ្តីសិទ្ធិបានលើកឡើងថា ចំណាត់ការបិទទីលានប្រជាធិបតេយ្យ គឺជាហេតុផលនយោបាយ ច្រើនជាងការរក្សាសន្តិសុខសង្គម។

ទីលានប្រជាធិបតេយ្យ នៅកណ្ដាលរាជធានីភ្នំពេញ។ (រូបថត MONOROOM.info/ D.KEO)

នយោបាយកម្ពុជា - ក្នុងឱកាសអញ្ជើញជាអធិបតី ក្នុងកម្មវិធីមួយ ស្ថិតនៅតំបន់ស្ពានជ្រោយចង្វា រាជធានី​ភ្នំពេញ នៅព្រឹកថ្ងៃទី១២ មីនា លោកអភិបាលរាជធានីភ្នំពេញ ប៉ា សុជាតិវង្ស បានរិះគន់ឥតសំចៃមាត់ ចំពោះក្រុម​អ្នកភូមិ​បឹងកក់ និងបាតុករអាជីពមួយចំនួនទៀតថា ជាឈ្មួញបាតុកម្មពហុវិស័យ។ ក្នុងកម្មវិធីដដែលនោះ អភិបាល​រាជធានី​ដែលបានមកកាន់តំណែងកាលពីខែឧសភា ឆ្នាំកន្លងទៅម៉ិញរូបនេះ បានសង្កត់ធ្ងន់ថា ចាប់ពីពេលនេះតទៅ ទីតំាង​ទីលានប្រជាធិបតេយ្យ ត្រូវបិទមិនឲ្យមាន​ការប្រមូលផ្តុំ​ជួបជុំ​គ្នាធ្វើបាតុកម្ម រហូតដល់ការស៊ើបអង្កេត​ករណីហិង្សា​នៅផ្លូវវេងស្រេង បានបិទបញ្ចប់។

ការប្រកាសរបស់លោក ប៉ា សុជាតិវង្ស គឺស្របពេលដែលលោកសម រង្ស៊ី ប្រធានគណបក្សសង្រ្គោះជាតិ ដែលជា​គណបក្សប្រឆាំង បានថ្លែងទៅកាន់អ្នកគាំទ្រនៅខេត្តត្បូងឃ្មុំ ក្នុងថ្ងៃដដែលនេះថា៖ «ប្រសិនបើពុំមានកំណែទម្រង់ សមាសភាពគណៈកម្មាធិការជាតិ រៀបចំការបោះឆ្នោត (គ.ជ.ប) ទេ យើងនឹងផ្តាច់ការចរចា​ជាមួយគណបក្ស​ប្រជាជនកម្ពុជា ហើយត្រៀមខ្លួនធ្វើមហាបាតុកម្មទៀត»។

ចំពោះបញ្ហានេះ លោក អំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការលីកាដូ បានពន្យល់ថា ស្ថានភាព​សន្តិសុខនៅរាជធានីភ្នំពេញ ក៏ដូចជានៅកម្ពុជាបច្ចុប្បន្ន មិនមានភាពចាំបាច់ ដើម្បីឈានដល់ការបិទទីលាន​ប្រជាធិបតេយ្យ​នោះទេ ហើយរដ្ឋាភិបាល និងសាលារាជធានីភ្នំពេញ មិនគួរយកករណីផ្លូវវ៉េងស្រេង និងទីលាន​ប្រជាធិបតេយ្យដែលជារឿងពីរ និងទីកន្លែងពីរដាច់ពីគ្នា មកសំអាងក្នុងការបិទទីលានប្រជាធិបតេយ្យនោះទេ។

ប្រធានផ្នែកបច្ចេកទេសស៊ើបអង្កេតដដែលនេះ បញ្ជាក់ថា៖ «ទីលានប្រជាធិបតេយ្យ ជាកន្លែងដែល​ប្រជាពលរដ្ឋ​បញ្ចេញ​មតិដោយសន្តិវិធី ដែលជាមូលដ្ឋានគ្រឹះនៃលិទ្ធិប្រជាធិបតេយ្យ(...)។ ទីក្រុងភ្នំពេញមិនទាន់ដល់ថ្នាក់ ដាក់ជា​តំបន់មានគ្រាអាសន្នទេ។ ការណ៍ដែលដាក់នេះ ខ្ញុំគិតថាគឺជាបំណងមួយ ទាក់ទងនឹងស្ថានការណ៍​នយោបាយ​កំពុងតានតឹង ហើយយកបញ្ហានេះជាលេស មិនឲ្យប្រជាពលរដ្ឋបញ្ចេញមតិ។ អញ្ចឹងបើករណីផ្លូវវ៉េងស្រេង ស៊ើប​អង្កេតគ្មានទីបញ្ចប់ ទីលានប្រជាធិបតេយ្យត្រូវបិទគ្នានទីបញ្ចប់ដែរឬយ៉ាងណា?»

ទស្សនាវដ្តីមនោរម្យ.អាំងហ្វូ មិនអាចទាក់ទងមន្រ្តីអ្នកនាំពាក្យសាលារាជធានីភ្នំពេញ និងមន្រ្តីអ្នកនាំពាក្យក្រសួង​មហាផ្ទៃ ដើម្បីធ្វើការអត្ថាធិប្បាយបន្ថែម ជុំវិញសេចក្ដីប្រកាសរបស់លោកអភិបាលបាននៅឡើយ តែលោក នី ចរិយា មន្ត្រីជាន់ខ្ពស់នៃសមាគមការពារសិទ្ធិមនុស្ស អាដហុក បានលើកឡើងថា ការស៊ើបអង្កេតករណីណាមួយ គឺរឿង​ចាំ​បាច់ តែទីលានប្រជាធិតេយ្យ គឺជាទីកន្លែងមួយដាច់ដោយឡែក ដែលមិនមែនជាកន្លែងដែលរដ្ឋាភិបាល ត្រូវ​ប្រមូល​ផ្តុំកម្លាំងបង្រ្កាបនោះទេ។ លោកនី ចរិយា បញ្ជាក់ថា៖ «កាលណាយើងដាក់ទ័ព បិទបាំង បង្រ្កាបហ្នឹង វាលែងទៅជា​ទីលាន​ប្រជាធិបតេយ្យហើយ។ តែវាទៅជាទីលានបំបិទសេរីភាព៕»

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១២ មីនា ២០១៤