បី​យ៉ាង ដើម្បី​បង្កើត​មិត្ត និង​បួន​យ៉ាង ដើម្បី​ពង្រឹង​ចំណង​មិត្ត

មិត្តភាពជាវត្ថុសំខាន់មួយ ដែលពេលខ្លះយើងបានបំភ្លេចពីសារៈសំខាន់របស់វា ហើយអាចបណ្តាលឲ្យបាត់បង់ផល​ប្រយោជន៏ជាច្រើន ដែលកើតចេញពីមិត្តភាព ជាពិសេស នៅពេលយើងត្រូវការមិត្តភក្ត័​ដើម្បីជួយជីវិតរបស់​យើង​កាន់​តែប្រសើរ។ ដូចពាក្យចាស់ថា មិត្តល្អជួយគ្នាក្នុងគ្រាក្រ ដែលបង្ហាញពីប្រយោជន៏នៃការចងមិត្តភាព រវាងមនុស្ស​នឹងមនុស្ស។ ទស្សនាវដ្តីមនោរម្យ.អាំងហ្វូ លើកយកចំណុចមួយចំនួន ដើម្បីបង្ហាញពីវិធីសាស្រ្តនៃការបង្កើតមិត្ត និង​ថែរក្សាចំណងមិត្តភាពឲ្យបានកាន់តែប្រសើរឡើង។
Loading...
  • ដោយ: ក. សេងហុង
  • កែប្រែចុងក្រោយ: March 18, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

មិត្តភាពជាវត្ថុសំខាន់មួយ ដែលពេលខ្លះយើងបានបំភ្លេចពីសារៈសំខាន់របស់វា ហើយអាចបណ្តាលឲ្យបាត់បង់ផល​ប្រយោជន៏ជាច្រើន ដែលកើតចេញពីមិត្តភាព ជាពិសេស នៅពេលយើងត្រូវការមិត្តភក្ត័​ដើម្បីជួយជីវិតរបស់​យើង​កាន់​តែប្រសើរ។ ដូចពាក្យចាស់ថា មិត្តល្អជួយគ្នាក្នុងគ្រាក្រ ដែលបង្ហាញពីប្រយោជន៏នៃការចងមិត្តភាព រវាងមនុស្ស​នឹងមនុស្ស។  ទស្សនាវដ្តីមនោរម្យ.អាំងហ្វូ លើកយកចំណុចមួយចំនួន ដើម្បីបង្ហាញពីវិធីសាស្រ្តនៃការបង្កើតមិត្ត និង​ថែរក្សាចំណងមិត្តភាពឲ្យបានកាន់តែប្រសើរឡើង។

១.ចំណងមិត្តភាពជួយឲ្យជីវិតវែង

លោក ជូលៀន ហតឡនស្តាដ (Julianne Holt-Lunstad) សាស្រ្តាចារ្យបណ្ឌិតផ្នែកចិត្តវិទ្យានៃសាកលវិទ្យាល័យ ប្រៃហាម យ៉ាំង (Brigham Young) បានធ្វើការវិភាគករណីសិក្សាចំនួន១៤៨ ហើយបានសន្និដ្ឋានពីកង្វះខាត នៃ​ការ​ចូលរួមក្នុងសង្គម នឹងអាចបណ្តាលឲ្យពួកគេប្រឈមមុខ នឹងសេចក្តីស្លាប់ ព្រោះមនុស្សត្រូវការមិត្តភក្តិ ជួយជំរុញ​ចំណុចវិជ្ជមាន និងផ្លូវចិត្តឲ្យកាន់តែប្រសើរឡើង។ មនុស្សដែលរស់នៅក្នុងសង្គមមិត្តភក្តិ មានចំនួន៥០ភាគរយ មាន​ជីវិតរស់នៅបានយូរជាងអ្នករស់នៅតែឯង។ លោក ហតឡនស្តាដ បានធ្វើការសន្និដ្ឋានថា ការចូលរួមក្នុងសង្គមតិច​អាចធ្វើឲ្យពួកគេជួបហានិភ័យ ស្មើរនឹងអ្នកជក់បារីចំនួន១៥ដើម ក្នុងមួយថ្ងៃ ព្រមទាំងអាចប្រឈមនឹងអការៈធាត់ចុក​ខ្លាញ ឬអាចដុះក្បាលពោះ បើគេមិនហាត់ប្រាណ។ ភាពតាន់តឹង និងជំងឺថប់អារម្មណ៏ងាយស្រួល អាចកើតមាន​យ៉ាង​ងាយ លើមនុស្សដែលចូលចិត្តផ្តាច់ខ្លួនពីសង្គម។

មិត្តភក្តិកំប្លែង ឬរីករាយ តែងធ្វើឲ្យយើងមានអារម្មណ៏សប្បាយរីករាយតាមនោះដូចគ្នា ហើយវាអាចជួយជំរុញឲ្យ​អាយុ​របស់យើងបានវែងជាងធម្មតា។ដូច្នេះចូលបង្កើតមិត្តភក្តិឲ្យបានច្រើន ជាពិសេសមិត្តភក្តិដែលអាចផ្តល់ នូវ​ភាព​រីករាយដល់យើងរាល់ថ្ងៃ។

២.ពេលខ្លះមិត្តស្គាល់អ្នកច្រើនជាងអ្នកស្គាល់ខ្លួនឯង

មនុស្សម្នាក់មិនអាចមើលខ្លួនឯង សព្វគ្រប់ឡើង។ពេលខ្លះមិត្តភិក្តយើងនឹងស្គាល់យើងច្រើនជាងខ្លួនយើងផង ព្រោះ​ពួកគេអាចប្រាប់ពីបុគ្គលិកលក្ខណៈខ្វះខាតដែលយើងមិនដឹងបាន។ នេះបើតាមសម្តីលោក Simine Vazire បណ្ឌិត​ផ្នែកចិត្តវិទ្យានៃសាកលវិទ្យាល័យវ៉ាស៊ីនតោនបាននិយាយថា មិត្តភក្តិអាចជួយឲ្យយើងមើលឃើញខ្លួនឯង កាន់​តែ​ច្បាស់ដូចជា ការជឿជាក់លើខ្លួនឯង និងភាពរីករាយ។ បន្ថែមលើសនេះទៀត មិត្តភក្តិមួយចំនួននឹងជួយយើង សាក​ល្បងភាពវ័យឆ្លាតដែលយើងមិនដឹង។

៣.មិត្តភក្តិបង្កើនភាពរីករាយបន្ថែមលើជីវិតគ្រួសារ

លោក ដេវិត ខេណេមែន(David Kahneman) ម្ចាស់ពាន់រង្វាន់ណូបែលបានបង្ហាញការស្រាវជ្រាវរបស់គាត់ថា ការ​ចំណាយពេលវេលានៅជាមួយមិត្តភក្តិ រីករាយជាងការចំណាយពេលនៅជាមួយប្តី ឬប្រពន្ធនិងកូន។ មិនមែន​ដោយ​សារមានបញ្ហាមានជីវិតគ្រួសារឡើយ ប៉ុន្តែពេលនៅជាមួយមិត្តភក្តិទំនួលខុសត្រូវរបស់ខ្លួនមិនសូវមាន ហើយ​យើង​មានពេលសម្រាប់សម្រាក។

លើសពីនេះការរក្សាចំណងមិត្តភាព រវាងមិត្តិភក្តិអាចរក្សាបានយូរ ដូចការរក្សាចំណងទាក់ទងក្នុងគ្រួសារដែរ។ រីឯ​ការជួបជុំជាមួយមិត្តភក្តិថ្មីផ្សេងៗទៀត ក៏នឹងផ្តល់នូវអារម្មណ៏ថ្មីៗនិងបទពិសោធន៏ ប្លែកៗក្នុងជីវិតដូចគ្នា។

តើធ្វើយ៉ាងណាដើម្បីរក្សាទំនាក់ទំនងរវាងអ្នកនឹងមិត្តភក្តិរបស់អ្នក

តាមការសិក្សារបស់អ្នក​ចិត្តវិទ្យាជនជាតិហូលឡង់ម្នាក់ ទៅលើមនុស្សមួយក្រុម ដែលមានវ័យចំរុះ ចំនួនមួយពាន់​នាក់បានរកឃើញថា អាត្រាជាមធ្យមយើងនឹងបាត់បង់មិត្តភក្តិពាក់កណ្តាលរៀងរាល់ប្រាំពីរឆ្នាំម្តង។ដូច្នេះបើសិន​បើយើងចង់រក្សាមិត្តភក្តិជិតស្និតរហូតនោះ តើត្រូវបែបណា?

១.ចំណាយពេលវេលា

លោក ដានីញ៉ែល រូស្កា (Daniel Hruschka) បានធ្វើការសិក្សាម្តងទៀត លើករណីបែកបាក់មិត្តភាព ព្រមទាំង​រក​ឃើញពីមូលហេតុនៃការបែកបាក់មួយចំនួន បណ្តាលមកពីការគ្មានពេលវេលាឲ្យគ្នា។ ប្រាកដណាស់ថា យើងនឹង​ចំណាយពេលនៅជាមួយនរណាម្នាក់ មានន័យថាយើងឲ្យតម្លៃទៅលើពួកគេ ដូច្នេះហើយពេលវេលា មានតម្លៃ​ណាស់សម្រាប់ការរក្សាចំណងមិត្តភាព និងសាងអនុស្សាវរីយ៏ល្អៗជាមួយមិត្តភក្តិ។

២.ធ្វើអ្វីសាមញ្ញៗជាមួយគ្នា

លោក មាលីស្សា ដេមៀ (Meliksah Demir) ជាសាស្រ្តាចារ្យនៃសាកលវិទ្យាល័យអារីស្សូណាខាងជើង (Northern Arizona University) បាននិយាយថា ការផ្លាស់ប្តូរទំនាក់ទំនងរវាងគ្នានឹងគ្នា ដោយធ្វើនូវសកម្មភាពសាមញ្ញៗ​ជាមួយ​គ្នា នឹងជួយឲ្យចំណងមិត្តភាពកាន់តែកក់ក្តៅ កាន់តែប្រសើរឡើង ដោយសារមិត្តភក្តិរបស់យើង​ជួយផ្លាស់ប្តូរ​អារម្មណ៏​អ្វីថ្មីៗ។

៣.ធ្វើឲ្យខ្លួនមានអារម្មណ៏កាន់តែល្អឡើងចំពោះមិត្តភក្តិ

នាពេលអ្នកជួបមិត្តភក្តិរបស់អ្នក មិនថានៅទីណាទេ អ្នកត្រូវបង្កើតភាពរីករាយ និងបង្ហាញនូវការរីករាយក្នុងការជួប ពួកគេ ទោះដោយចៃដន្យក្តី ឬដោយការណាត់ជួបគ្នាក្តី។ អ្នកត្រូវចំាថាបើអ្នកមិនរីករាយក្នុងការជួបជាមួយពួកគេទេ ចំណងមិត្តភាពរបស់អ្នកនឹងត្រូវបាត់បង់បន្តិចម្តងៗជាមិនខាន។

៤.ស្គាល់កាលៈទេសៈ

ត្រូវបញ្ចូលខ្លួនរបស់អ្នកក្នុងសង្គម មិនមែនចេះតែធ្វើអ្វីដែលខ្លួនចង់នោះទេ។ មនុស្សដែលធ្វើខ្លួនឯងទៅ​តាមធម្មជាតិ​សង្គម នឹងជួយឲ្យពួកគេជោគជ័យក្នុងការចងសម្ព័ន្ធភាពជាមួយមនុស្សគ្រប់ប្រភេទ និងបានស្គាល់ពីការពិត​នៃ​មនុស្ស​ជាច្រើនក្នុងសង្គម។ អ្នកមិនត្រូវមានការរើសអើងចំពោះនរណាម្នាក់ឡើយ នាពេលនោះហើយអ្នកនឹងមាន មិត្តកាន់តែច្រើនឡើងៗ។

៥.គាំទ្រមិត្តរបស់អ្នក និងអ្វីដែលគេមាន

មិត្តភក្តិល្អ តែងតែត្រូវការឲ្យមិត្តរបស់ខ្លួន គាំទ្រនូវអ្វីដែលខ្លួនមាន ដើម្បីធ្វើឲ្យពួកគេមានអារម្មណ៏ល្អ​ចំពោះអ្វីដែល​ពួកគេ​មាន។ ការយល់ចិត្ត និងគាំទ្រនូវអ្វីដែលមិត្តអ្នកធ្វើ ឬមានងាយស្រួលក្នុងការធ្វើឲ្យ​ពួកគេក្លាយជា​មិត្តភក្តិល្អ​នឹង​អ្នក។ម្យ៉ាងវិញទៀត ការចេះជួយ ការចែករំលែកទុកលំបាក ក៏ដូចជាការជួយកែកំហុសគ្នាទៅវិញទៅមក ក៏ជា​ផ្នែក​មួយ ជួយឲ្យចំណងទំនាក់ទំនងរបស់ពួកគេកាន់តែល្អឡើងដែរ៕

--------------------------------------
ដោយ ក. សេងហុង (ទំនាក់ទំនង៖ [email protected]) - ភ្នំពេញ ថ្ងៃ១៤ ខែមីនា ឆ្នាំ ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...