សកម្មជនតវ៉ាសិទ្ធិលំនៅដ្ឋាន ហៅការបាញ់រថយន្ដ ជាការបំបាក់ស្ប៉ាត
ក្រុមសកម្មជន អ្នកតវ៉ាសិទ្ធិមនុស្ស និងសិទ្ធិលំនៅដ្ឋាន បានហៅការបាញ់ប្រហារ នៅយប់ថ្ងៃសៅរ៍ទី២២ ខែមីនាថា ជាការគម្រាមកំហែងបំភិតបំភ័យ ឬអាចជាករណីប៉ុនប៉ងធ្វើឃាត។ ការបាញ់ប្រហារ ដែលកើតឡើងនៅចំណុចជិតស្ពានជ្រោយចង្វារ ដោយសារជនមិនស្គាល់អត្តសញ្ញាណមួយរូប បានដកកាំភ្លើងខ្លីបាញ់ប្រហើរមួយគ្រាប់ ធ្វើឲ្យបែកកញ្ចក់រថយន្ដក្រុង ដែលក្រុមសកម្មជនទាំងនោះ ជិះត្រឡប់ពីខេត្តសៀមរាបមកវិញ។
ស្នាមធ្លុះកញ្ចក់រថយន្ដ ដោយគ្រាប់កាំភ្លើងរបស់ជនមិនស្គាល់អត្តសញ្ញាណ។ (រូបថត MONOROOM.info/ Channita)
អំពើបាញ់បោះ - ព្រះតេជគុណ លួន សូវាត ដែលគង់ក្នុងរថយន្ដក្រុងដែរនោះ បានហៅការបាញ់ប្រហារនេះ ថាជាការបំភិតបំភ័យ ដែលធ្វើឲ្យប៉ះពាល់ដល់សិទ្ធិសេរីភាព និងការរស់នៅរបស់ប្រជាពលរដ្ឋ ដោយព្រះអង្គបានសម្ដែងសង្ឃដីការ លើកជាភស្ដុតាងពីការបាញ់ប្រហារនេះឡើងថា «រាងបញ្ឆិតឡើងលើ ជាការបាញ់គំរាមគំហែង ជាងការធ្វើឃាតមនុស្ស»។ ព្រះសង្ឃដែលជាសកម្មជនទាមទារ ឲ្យមានការគោរពសិទ្ធមនុស្ស និងសិទ្ធិលំនៅដ្ឋានមិនចេះនឿយហត់អង្គនេះ បានសម្ដែងការសោកស្ដាយថា «កាំភ្លើងត្រូវបានគេប្រើប្រាស់ សម្រាប់ការគំរាមគំហែងខ្មែរយើង ហើយអាត្មាជឿថា ករណីនេះមិនមែនជាករណីចៃដន្យទេ»។
ការបាញ់ប្រហារ បានកើតឡើងកាលពីយប់ថ្ងៃទី២២ ខែមីនា វេលាម៉ោងប្រមាណជា៧ និង៣០នាទីយប់ បន្ទាប់ពីក្រុមសកម្មជនមកពីសហគមន៍បឹងកក់ បូរីកីឡា និងថ្មគោល បានត្រឡប់មកពីធ្វើបុណ្យខួប៥ឆ្នាំ ស្តីពីពីការបាញ់បង្ក្រាបលើកសិករ នៅសហគមន៏ជីក្រែងនៅខេត្តសៀមរាប ដោយបានជិះក្នុងរថយន្ដក្រុងមួយ មកកាន់រាជធានីភ្នំពេញ។ ជនមិនស្គាល់អត្តសញ្ញាណមួយរូប ជិះម៉ូតូវីវា ប្រដាប់ដោយកាំភ្លើងខ្លី បានបាញ់សំដៅលើរថយន្ដក្រុង បន្ទាប់ពីជននោះបញ្ជាឲ្យបញ្ឈប់រថយន្ដ តែតៃកុងរថយន្តមួយនេះមិនធ្វើតាម បណ្តាលឲ្យធ្លុះកញ្ចាក់ខាងមុខផ្នែកខាងឆ្វេង ប៉ុន្តែមិនបណ្តាលឲ្យជនណាម្នាក់រងរបួសឡើយ។ រថយន្ដក្រុងបានបន្តដំណើររហូត មកដល់មុខស្ថានទូតបារាំង ទើបឈប់។
អ្នកបើកបររថយន្ដឲ្យក្រុមហ៊ុនលីឈុនលី ក្នុងលក្ខខណ្ឌមិនបញ្ចេញឈ្មោះ ដោយសារតែការភ័យខ្លាច បានថ្លែងថា៖ «មានម៉ូតូមួយជិះពីគីឡូលេខ៦ មកឲ្យខ្ញុំឈប់ ខ្ញុំមិនឈប់ទេ ព្រោះគ្មានកំហុសអីគ្មានអ្វីត្រូវឈប់ផង (...) ជិតស្ពានជ្រោយចង្វារ វាទាញកាំភ្លើងមក បានបាញ់សំដៅឡានតែម្តង»។ លោកបានបន្តទៀតថា ជនដែលមានពាក់មួកធម្មតានេះ មុនដំបូងមានគ្នាម្នាក់ទៀត ជាស្រី។ បន្ទាប់មក ជននេះបានទម្លាក់ស្រ្តីនោះចុះ ហើយខ្លួនបានជិះម៉ូតូបន្ត មកហៅឡានឲ្យឈប់។ តៃកុងរថយន្ត ដែលទំនងជានៅភិតភ័យមិនទាន់បាត់រូបនេះ បានថ្លែងបញ្ជាក់ពីភិនភាគ ខ្មាន់កាំភ្លើងថា៖ «ពាក់អាវមួយឈុត ជាអង្គរក្សជិះម៉ូតូវីវា ពាក់មួកធម្មតាដោយមិនបាំងអ្វីទេ។»
អ្នកស្រីទេព វណ្ណនី ក៏បានអះអាងពីភិនភាគរបស់ជនដែលបាញ់បោះសេរី ដូច្នេះដែរថា៖ «វីវាឥតពាក់ផ្លាកលេខទេ ពាក់អាវអង្គរក្សដៃខ្លី ពាក់អាវខ្មៅ។ អាអាវខ្មៅក្រៅក្រាស់ អាអាវប៉ូលីស ចំណាំតែពាក់។»
ក្រុមអ្នករងការបាញ់ប្រហារទាំងនេះ បានដាក់ពាក្យបណ្តឹង ទៅប៉ុស្ត៏នគរបាលសង្កាត់ ស្រះចក នៅយប់ថ្ងៃដដែល។ បើតាមមន្ត្រីនគរបាល ដែលបានចុះទៅស៊ើបសួរ នៅទីនោះ បានហៅការបាញ់បោះនេះ ជាការសងសឹងទៅនឹងការប៉ះពារគ្នា ផ្នែកចរាចរណ៍បន្តិចបន្តួច មិនមែនជាការគម្រាមកំហែងអ្វីទេ។ តែសម្រាប់អ្នកបើកបររថយន្ដក្រុងវិញ បានថ្លែងថា លោកមិនដែលមានបញ្ហាជាមួយនរណាឡើយ តាំងពីលោកធ្វើអ្នកបើកបររថយន្ដ ឲ្យក្រុមហ៊ុនខាងលើអស់រយៈកាលបួនឆ្នាំមកនេះ។
យ៉ាងណាក៏ដោយ ក្រុមសកម្មជនតវ៉ា ដែលមានវត្តមាននៅក្នុងរថយន្ដក្រុង នៅតែចាត់ទុកថា នោះជាសកម្មភាពសំដៅ«បំបាក់ស្បាត» ក្រុមអ្នកហ៊ានចេញមុខតវ៉ា។ នៅក្នុងកិច្ចសម្ភាសដាច់ដោយឡែកមួយ ជាមួយទស្សនាវដ្តីមនោរម្យ.អាំងហ្វូ អ្នកស្រី ពៅ សោភា អនុប្រធានសមាគមសហគមន៍អ្នកភូមិបឹងកក់ បានទម្លាយថា មានសមាជិកក្រុមអាជ្ញាធរម្នាក់ ធ្លាប់បានបោះសម្ដីគំរាមពួកគាត់ថា៖ «ពួកង្ងែងតវ៉ាណ្នឹង គង់តែស្រីទេ បើប្រុសគេសម្លាប់ចោលយូរហើយ»។ ពាក្យសម្ដី ដែលអ្នកស្រីបានយកមកប្រៀងធៀប នឹងការបោះសម្ដីរបស់ខ្មាន់កាំភ្លើងនៅយប់នេះ យ៉ាងដូច្នេះថា៖ «ពួកង្ងែងនៅណា អញស្គាល់ច្បាស់ណាស់» មិនបានធ្វើឲ្យក្រុមអ្នកស្រីសង្ស័យឡើយ ថាតើជនប្រដាប់អាវុធរូបនេះ ជានរណា។ «អ្នកណានៅពីក្រោយខ្នង អ្នកណាចង់ឲ្យពួកយើងស្លាប់ គឺពួកយើងដឹងច្បាស់ណាស់។ តែអ្វីដែលពួកយើងធ្វើ គឺអត់ខ្លាចទេ៕»
ក្រុមសកម្មជនតវ៉ាសិទ្ធិមនុស្ស និងសិទ្ធិលំនៅដ្ឋាន ដែលនៅក្នុងរថយន្ដរងការវាយប្រហារ។ (រូបថត MONOROOM.info/ O. Vary)
ស្នាមធ្លុះកញ្ចក់រថយន្ដ ដោយគ្រាប់កាំភ្លើង មើលពីក្នុងរថយន្ដមកវិញ។ (រូបថត MONOROOM.info/ O. Vary)
សម្បកកាំភ្លើង ត្រូវបានឃើញជ្រុះធ្លាក់នៅនឹងដី។ (រូបថត MONOROOM.info/ O. Vary)
--------------------------------------
ដោយ ក. ចាន់នីតា និង ក. សេងហុង (ទំនាក់ទំនង៖ [email protected] ) -ភ្នំពេញ ថ្ងៃទី ២៣ មីនា ២០១៤