បទ​យក​ការណ៍៖ ព្រៃ​ព្រះ​រការ នៅ​មុន​ក្លាយ​ជា​«ព្រៃ​ឡង់​ទី​២»

ផ្លូវលំដែលស្ទើរតែខូចទាំងស្រុង ដោយសារតែរថយន្តធនធ្ងន់ដឹកឈើ ចេញពីព្រៃព្រះរការទាំងយប់ទាំងថ្ងៃ ដែល​ស្ថិត​នៅ​ក្នុងទីប្រជុំនៃស្រុកចំនួនបី ក្នុងខេត្តព្រះវិហារ បានជម្រុញឲ្យសហគមន៍ជនជាតិភាគតិចគួយ នាំគ្នាធ្វើពិធី​បំបួស​ព្រៃ​តាម​ប្រពៃណីរបស់ពួកគេ ដើម្បីរក្សាព្រៃធំទីពីរ នៅក្នុងខេត្តព្រះវិហារបន្ទាប់ពីព្រៃឡង់ ត្រូវបានបំផ្លាញ​ស្ទើរ​តែ​ទាំង​ស្រុង។
Loading...
  • ដោយ: លោក គិន ដោយ គិន ង៉ុយ (ទាក់ទង [email protected]) - ភ្នំពេញ ថ្ងៃទី២៥ មីនា ២០១៤
  • កែប្រែចុងក្រោយ: October 20, 2014
  • ប្រធានបទ: ជំនួញឈើ
  • អត្ថបទ: មានបញ្ហា?
  • មតិ-យោបល់

បទល្មើសព្រៃឈើ - ឈើជាច្រើនកំណាត់​បាន​បន្សល់​ទុក នៅ​កណ្តាល​ព្រៃ​អម​សង​ខាង​តាម​ផ្លូវ ឆ្ពោះ​ទៅ​កាន់​ព្រៃ​​ព្រះ​រការ ផ្លូវ​ចូល​ទៅ​ក្នុង​តំបន់​នោះ បាន​ស្រុត​ជា​អន្លើរៗ ដោយ​សារ​តែ​ការ​ដឹក​ឈើ​ចេញ​ពី​សំណាក់​ឈ្មួញ​រក​​ស៊ី​ទិញ​​ឈើ។ ចំណែក​ឯ​សំលេង​រណា​ង៉ោងៗ ដែល​តែង​តែ​លឺ​រំពង​ព្រៃ ចាប់​ពី​ព្រឹក​ព្រលឹម​ម៉ោង​៧ ប៉ុន្តែ​បែរ​ជា​ស្ងាត់​ជ្រងំ ក្រោយ​ពី​ប្រជា​សហគមន៍​ចុះ​ល្បាត​ព្រៃ។

ជនជាតិដើមភាគតិចគួយ ដែល​បាន​ចុះ​ល្បាត​ព្រៃ និង​បំបួស​ព្រៃ អ្នកស្រី នួន ម៉ុន បាន​ថ្លែង​ឲ្យ​ដឹង​ថា ក្រុមហ៊ុន ទី្រភាព ជួល​មនុស្ស​មក​ពី​ចម្ងាយ ឲ្យ​មក​កាប់​ដើមឈើ​នៅ​ក្នុង​តំបន់​នេះ ជា​ពិសេស​គេ​កាប់​ដើម​ច្បោះ​របស់​ជន​ជាតិ ទើប​​ប្រជា​​សហគមន៍​នាំ​គ្នា​ចូល​បំបួស​ព្រៃ​ឈើ ដើម្បី​សុំ​ឲ្យ​អារក្ស​អ្នកតា​ជួយ​ការពារ​ធន​ធាន​ធម្មជាតិ ពី​ព្រោះ​ព្រៃ​ឈើ គឺ​ជា​​អាយុ​​ជីវិត​របស់​​មនុស្ស​សត្វ ហើយ​ពលរដ្ឋ​ជន​ជាតិ​រស់​នៅ​ក្នុង​តំបន់​នេះ ពឹង​ពាក់​លើ​អនុផល​ពី​ព្រៃ​ឈើ​ដូច ជា​ដង​ជ័រ​ទឹក​​​ជា​​ដើម។ អ្នកស្រី​បាន​ថ្លែង​ថា៖ «បំផ្លាញ​ព្រៃឈើ គឺ​បំផ្លាញ​អាយុ​ជីវិត​ពួក​យើង​ទាំង​អស់​គ្នា»។

កាប់ឈើ នាំចេញទៅប្រទេសវៀតណាម?

អ្នកស្រីបានថ្លែងឲ្យដឹងបន្តទៀតថា ប្រពៃណីជនជាតិដើមភាគតិច នៅពេលដែលឃើញបំបួសដើមឈើ គេ​មិនហ៊ាន​កាប់ដើមឈើនោះទេ ប៉ុន្តែចំពោះអ្នកកាប់អានាធិបតេយ្យនោះអ្នកស្រី មិនថាតើគេខ្លាចដែរ​រឺអត់​នោះ​ទេ។ ព្រៃព្រះរការ​នេះ គឺជាព្រៃមួយធំទីពីរ បន្ទាប់ពីព្រៃឡង់ដែលសំបូរទៅដោយដើមច្បោះ។ អ្នកស្រី​បាន​ថ្លែងថា៖ «គេកាប់ឈើទាំង​នោះ នាំចេញទៅប្រទេសវៀតណាម»។

បើទោះជាប្រជាសហគមន៍ ខំប្រឹងការពារព្រៃយ៉ាងណាក៏ដោយ ក៏គ្មានអាជ្ញាធរណា ចេញមុខមកជួយប្រជា​សហគមន៍​​នោះឡើយ។ អ្នកស្រីបានថ្លែងថា នៅពេលករណីណាមួយកើតឡើង គឺប្រជាសហគមន៍​រាយ​ការណ៍ ទៅ​គ្រប់​សមត្ថកិច្ច​ដែលពាក់ព័ន្ធទាំងអស់ ប៉ុន្តែមិនដែលឃើញសមត្ថកិច្ចណាមួយ ចេញមុខមក​អន្តរាគមន៍ រឺក៏យកចិត្តទុក​ដាក់អំពីការកាប់ជ័រច្បោះ របស់ប្រជាពលរដ្ឋនោះទេ។ អ្នកស្រីថា៖ «សមត្ថកិច្ចជួយ ប៉ុន្តែ​មិន​មែ​នជួយពួកយើងទេ គឺគេជួយពួកអនាធិបតេយ្យទាំងនោះ នៅពីក្រោយខ្នង នេះ​គឺជា​ឧបសគ្គ​ដែល​យើង​ពិបាក​ការពារ​ឈើ នៅពេល​ណា​ដែលគេដឹងថាចុះល្បាត គេរាយការណ៍ទៅពួកអាណាធិបតេយ្យ»។

មេត្តាទុកព្រៃនេះដើម្បីជាកេរ្តិ៍ដំណែល ដល់កូនចៅជំនាន់ក្រោយ

លោក ភឿង សារឿន ពលរដ្ឋមួយរូបដែលចូលរួមការពារព្រៃព្រះរការនេះ បាននិយាយថា ព្រៃព្រះរការ​បច្ចុប្បន្ន កំពុង​តែត្រូវបានកាប់បំផ្លាញ ដូច្នេះលោកសូមអំពាវនាវទៅដល់រដ្ឋាភិបាល មេត្តាជួយ​ការពារ​ព្រៃ​នេះ សម្រាប់​សហគមន៍​ជនជាតិគួយផង ពីព្រោះជនជាតិទាំងអស់ ពឹងអាស្រ័យលើជ័រទឹកនៅក្នុងព្រៃនេះ។ លោក​ថា៖ «ពលរដ្ឋជនជាតិ​គួយ​រាប់ម៉ឺននាក់ រស់ដោយសារព្រៃនេះ មេត្តាទុកព្រៃនេះដើម្បីជាកេរ្តិ៍ដំណែល ដល់​កូន​ចៅ​ជំនាន់​ក្រោយ​រកស៊ីបន្ត​ពីពួក​យើង»។

លោកបានត្អូញត្អែរថា ប្រជាសហគមន៍បើចង់កាប់ឈើធ្វើផ្ទះ ប៉ូលីសគេចាប់ លុះណាតែបង់លុយឲ្យគេ ចំណែក​​ឯ​ពួកអាណាធិបតេយ្យ គេដឹកទាំងឡានធំៗ អត់ហ៊ានចាប់គេទេ។ លោកអះអាងទៀតថា៖ «ពួក​ឈ្មួញ​​ដឹកឡើង​ខូង​ផ្លូវ​អស់ហើយ គេដឹកទាំងយប់ទាំងថ្ងៃ ពួកគេគ្មានខ្លាចអ្នកណានោះទេ»។

លោកបានបន្តថា ជនជាតិភាគតិច មិនចង់ក្លាយជាអ្នកស៊ីឈ្នួលគេទើប នាំគ្នាការពារព្រៃឈើ ពលរដ្ឋ​ទាំង​អស់​ចង់​បាន ព្រៃដើម្បីរក្សារវប្បធម៌ប្រពៃណី ចង់បានការងារធ្វើដោយម្ចាស់ការលើខ្លួនឯង។ លោកថ្លែងថា៖ «មិន​ដែល​​មាន​អ្នកណា ក្លាយជាអ្នកមាន ដោយសារតែធ្វើជាកម្មករឲ្យគេ មួយថ្ងៃ២ម៉ឺនរៀលនោះទេ»។

លោក លាង ឆាត អាយុ ៥៣ ឆ្នាំ ជាជនជាតិគួយ ដែលបានប្រកបរបរជាអ្នកដួសជ័រទឹកតាមឪពុកម្តាយ បាន​ថ្លែង​ឲ្យ​ដឹងថា ជនជាតិគួយទាំងអស់ត្រូវតែពួតដៃគ្នា ដើម្បីការពារព្រៃកុំឲ្យក្រុមហ៊ុនគេមកបំផ្លាញទៀត ពីព្រោះ​នេះគឺជាព្រៃ​សល់​ចុងក្រោយនៅក្នុងខេត្តព្រះវិហារ។ ហើយបច្ចុប្បន្ននេះ ប្រសិនបើប្រជាជន​នៅតែ​ពឹង​ទៅ​លើ​សមត្ថកិច្ចទៀត​នោះ គឺអស់ឈើតែម្តង លោកបានឲ្យដឹងថា៖ «យើងសព្វថ្ងៃនេះសង្ឃឹម​ភាគតិច​ណាស់ ថា​អាច​ការពារព្រៃព្រះរការនេះ​បាន ដោយសារតែពេលយើងត្រឡប់ទៅផ្ទះវិញ គេចាប់ផ្តើមមក​កាប់​ព្រៃទៀត»។

ជ័រច្បោះប្រមាណជា៧ពីដុងដាក់ នៅលើគោយន្តនោះផង លោកបានថ្លែងឲ្យដឹងថា នៅក្នុងមួយខែគាត់​ត្រូវ​ដួស​ជ័រ​ទឹក៦ដង ហើយនៅក្នុងមួយដងទទួលបានជ័រ ៦កាន ចំណែកឯតម្លៃចម្បោះ តែងតែមានការប្រែប្រួល​តាម​ពេលវេលា ពេលខ្លះមួយកានលក់បាន៨ម៉ឺន តែពេលខ្លះ១កាន លក់បាន៩ម៉ឺន។ លោកបានឲ្យដឹង​ទៀត​ថា៖ «សព្វថ្ងៃ​នេះ​​គេកាប់​ឈើខ្លាំងណាស់ បើសិនជាបាត់ដើមជ័រទឹកអស់ មានតែដាច់បាយ»។

យោងតាមរបាយការណ៍ របស់អង្គការពន្លកខ្មែរ បានឲ្យដឹងថា ព្រៃព្រះរការគឺជាព្រៃធំទីពីរបន្ទាប់ពីព្រៃឡង់ ដែលស្ថិត​នៅចំណុចប្រសព្វនៃស្រុកបី នៃខេត្តព្រះវិហារដូចជាស្រុកត្បែងមានជ័យ ស្រុកជាំក្សាន្ត និង ស្រុក​ឆែប ដែលលាត​សន្ធឹងលើផ្ទៃដី ៩៥៩០៥ ហិកតា ដែលសម្បូរទៅដោយជីវៈចម្រុះ សត្វព្រៃគ្រប់ប្រភេទ និង​ឈើប្រណិតជា​ពិសេស​ដើមឈើទាល ដើមជ័រទឹក ដែលមានប្រជាពលរដ្ឋរស់នៅចំនួន ១៥០៤៦នាក់ ក្នុង​ភូមិ​ចំនួន២១។ ព្រៃនេះធ្លាប់​ប្រឈម​នឹងគ្រោះថ្នាក់នៅក្នុងឆ្នាំ ១៩៩៧ ដោយសារក្រុមហ៊ុនព្រៃ​សម្បទាន​ឈ្មោះ និន្តាហ្លាយវូត ប៉ុន្តែដោយមាន​ចលនាតវ៉ាពីប្រជាជនរស់នៅជុំវិញ ក្រុមហ៊ុនមួយនេះបានផ្អាក​សកម្មភាព​នៅ​ឆ្នាំ ២០០២ ហើយបច្ចុប្បន្ន កំពុងស្ថិត​នៅក្នុងការគំរាមកំហែង ពីការកាប់បំផ្លាញពីសំណាក់​ក្រុម​ឈ្មួញ អ្នកមាន​អំណាច​មួយ​ចំនួន ដែលបានលើកទឹក​ចិត្ត​ឲ្យពលរដ្ឋចូលទៅកាប់ឈើលក់ឲ្យពួកគេ។

មន្ត្រីផ្នែកតស៊ូមតិរបស់អង្គការពន្លកខ្មែរ លោក ប៉ិក សោភ័ណ បានមានប្រសាសន៍ថា ព្រៃព្រះរការកំពុងតែ​ស្ថិតនៅ​ក្រោមការគំរាមកំហែង និងប្រឈមនិងការកាប់បំផ្លាញយ៉ាងអនាធិបតេយ្យ ជាពិសេសក្រុមឈ្មួញ​បាន​លើកទឹកចិត្ត​ឲ្យសហគមន៍ មកពីកន្លែងផ្សេងចូលមកកាប់ឈើនៅក្នុងតំបន់នេះ។ លោកបានថ្លែង​ឲ្យ​ដឹង​ថា៖ «តាមដែលយើង​ដឹង​គឺក្រុមហ៊ុនទ្រីភាព បានដាក់ពង្រាយមនុស្ស ឲ្យចូលមកកាប់ឈើលក់ឲ្យពួកគេ​យ៉ាង​គគ្រឹក​គគ្រេង ពុំមានអាជ្ញាធរ​ណាទប់ស្កាត់នោះទេ»។

លោក ឆេង គឹមស៊ុន ប្រតិភូរាជរដ្ឋាភិបាលទទួលបន្ទុក ជាប្រធានរដ្ឋបាលព្រៃឈើ ពុំអាចទំនាក់ទំនង​ដើម្បី​ធ្វើការ​​អត្ថាធិប្បាយបានទេ។ រីឯលោក អ៊ីត ភូម្រា ប្រធានរដ្ឋបាលព្រៃឈើខេត្តព្រះវិហារ បានបដិសេធ​ពុំធ្វើ​ការ​អត្ថាធិប្បាយ​​ជុំវិញបញ្ហានេះឡើយ។

«ក»លោក ហ៊ុន សែន នៅឯណាពេលនេះ?

សូមរំលឹកថា កាលពីខែ មករា ឆ្នាំ២០១០ លោកនាយករដ្ឋមន្ត្រីហ៊ុន សែន បានដាក់បទបញ្ជាជាលើកទី១ និង​ព្រមាន​ខ្លាំងៗ ទៅលើមន្ត្រីយោធាទាំងអស់ ឲ្យបញ្ឈប់សកម្មភាពកាប់ព្រៃឈើ និងបញ្ឈប់សកម្មភាពទន្ទ្រាន​កាន់កាប់ដី រឺ​គាំទ្រអ្នករកស៊ីឈើខុសច្បាប់។ លោក ហ៊ុន សែន ថែមទាំងសន្យា នឹង«កាត់ក»របស់លោក ប្រសិន​​ណាជាការអនុវត្ត​នូវបទបញ្ជាទាំងនេះ មិនបានសម្រេចនោះផងទៀត។

លោក អ៊ូច ឡេង ប្រធានអង្គការក្រុមកិច្ចការពិសេសសិទ្ធិមនុស្សកម្ពុជា បានថ្លែងឲ្យដឹងថា បច្ចុប្បន្ននេះ ក្រុមហ៊ុន​​កំពុងតែប្រើល្បិច ដើម្បីចោទប្រកាន់មកលើប្រជាពលរដ្ឋ ថាមានការពាក់ព័ន្ធទៅនឹង​ការកាប់​បំផ្លាញ​​ព្រៃឈើ បែប​អនាធិបតេយ្យ តាមពិតអ្នកដែលកាប់ឈើទាំងនោះ គឺជាកម្មកររបស់ក្រុមហ៊ុន ដែលគេ​ជួល​មក​កាប់ឈើឲ្យគេតែ​ប៉ុណ្ណោះ។ លោកឲ្យដឹងថា៖ «បើទោះជាឈ្មួញប្រមូលទិញឈើមកពីណាក៏ដោយ គឺប្រមូល​ទិញដើម្បីលក់ឲ្យ​ក្រុមហ៊ុន​តែមួយ គឺក្រុមហ៊ុនទ្រីភាព ដើម្បីនាំយកទៅលក់នៅក្រៅប្រទេស»។

យោងតាមរបាយការណ៍រូបភាពផ្កាយរណប ដែលចេញកាលពីខែធ្នូ ឆ្នាំ ២០១៣ ផែនទីដែលមានលក្ខណៈ​ចលនា គេហទំព័រ Open Development Cambodia (ODC) បានបង្កើតពីរូបភាពផ្កាយរណបណាស្សា (NASA) បានបង្ហាញ​លម្អិត អំពីការបំផ្លាញខ្លាំងក្លាទៅលើព្រៃឈើរបស់ប្រទេសកម្ពុជា ដែលជាការបំផ្លាញ ដែល​បាន​កើន​ឡើង​យ៉ាងខ្លាំង​ក្នុងរយៈកាល៥ឆ្នាំចុងក្រោយនេះ។ គេហទំព័រ ODC បានឲ្យដឹងថា ការវិភាគ​រូបភាព​ផ្កាយ​រណប​បង្ហាញថា ក្នុងឆ្នាំ​១៩៧៣ ប្រហែល ៧២.១១ភាគរយនៃប្រទេសកម្ពុជា ត្រូវបានគ្រប់​ដណ្តប់​​ដោយ​ព្រៃឈើ។ រូបភាពថ្មីៗបានបង្ហាញថា គម្របព្រៃឈើបច្ចុប្បន្នមានតិចទៅៗគឺចំនួន ៤៦,៣៣ ភាគរយ ដោយ​រួម​បញ្ចូល​ទាំងចម្ការកៅស៊ូ៕



Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...