ភ្ជាប់ជាមួយលិខិតរបស់តុលាការបារាំងមួយច្បាប់ផងនោះ ទំព័រហ្វេប៊ុកផ្លូវការរបស់ លោក សម រង្ស៊ី បានបញ្ជាក់ថា៖ «អាជ្ញាធរបារាំង ទើបតែបានចាត់ចៅក្រមថ្មីម្នាក់ប្រចាំតុលាការទីក្រុង ប៉ារីស ដើម្បីពន្លឿនការ ស៊ើប​អង្កេតទៅលើការគប់គ្រាប់បែក នៅទីក្រុងភ្នំពេញ កាលពីថ្ងៃ ៣០ មីនា ១៩៩៧។ នេះជាកាតព្វកិច្ច នៃអាជ្ញាធរ បារាំង ពីព្រោះមានជនរងគ្រោះ ឬជនដែលគេប៉ុនប៉ងសម្លាប់ មួយចំនួននៅពេលនោះ ដែលមានសញ្ជាតិបារាំង ទន្ទឹមនឹង​សញ្ជាតិខ្មែរ។»

ការិយាល័យនិពន្ធរបស់ទស្សនាវដ្ដីមនោរម្យ.អាំងហ្វូ ប្រចាំរដ្ឋធានីប៉ារីស មិនអាចស្វែងរកការបញ្ជាក់ពី ចៅក្រមស៊ើប​អង្កេតថ្មីនោះ ជុំវិញករណីដ៏រសើបនេះបានទេ។ ប៉ុន្តែ​ដោយឡែក សម្រាប់នៅក្នុងប្រទេសកម្ពុជាវិញ សំនុំរឿងនេះ ហាក់ដូចជាមិនបានកម្រើកសោះឡើយ នៅក្នុង​រយៈ​ពេលជាច្រើនឆ្នាំកន្លងមកនេះ។

គិតមកដល់ពេលនេះ មានរយៈពេល១៧ឆ្នាំមកហើយ ដែលសមត្ថកិច្ចរដ្ឋាភិបាលកម្ពុជា មិនទាន់បំបែកសំណុំ​រឿង​គប់គ្រាប់បែក៤គ្រាប់ លើហ្វូងបាតុករទាមទារប្រព័ន្ធតុលាការឯករាជ្យ នៅមុខមន្ទីររដ្ឋសភាចាស់ ដឹកនាំដោយលោក សម រង្ស៊ី កាលពីខែមីនា ឆ្នាំ១៩៩៧ ដែលបណ្តាលឲ្យមានជនរងគ្រោះ១៦នាក់ស្លាប់ និងជាង១៥០រងរបួស ក្នុង​ចំណោមនោះក៏មានជនបរទេសផងដែរ។

ការអូសបន្លាយពេលនៃការបំបែសំណុំរឿងគប់គ្រាប់បែក ត្រូវបានសមត្ថកិច្ចក្រសួងមហាផ្ទៃកន្លងមក បានលើក​ឡើង​ថា សំណុំរឿងគប់គ្រាប់បែកនេះ នៅតែបន្តស៊ើបអង្កេតនៅឡើយ។ តែសម្រាប់ការិយាល័យសហព័ន្ធ​ស៊ើបអង្កេត​របស់សហរដ្ឋអាមេរិក(FBI) ដែលបានបើកការស៊ើបអង្កេតករណីគប់គ្រាប់បែកនេះ បានអះអាងថា ខ្លួនត្រូវបានគេ​បង្ខំឲ្យចាកចេញពីកម្ពុជា នៅពេលដែលដំណើរការស៊ើបអង្កេត កាន់តែមានរូបរាងច្បាស់នោះ។ តែការអះអាង​របស់​ការិយាល័យសហព័ន្ធស៊ើបអង្កេតរបស់សហរដ្ឋអាមេរិក (FBI) ត្រូវបានសមត្ថកិច្ចរដ្ឋាភិបាលកម្ពុជាបដិសេធ។

លោក នី ចរិយា មន្ត្រីជាន់ខ្ពស់មួយរូប នៃសមាគមការពារសិទ្ធិមនុស្សអាដហុក បានលើកឡើងថា ៖ «ខ្ញុំគ្នានជំនឿថា សមត្ថកិច្ច​រដ្ឋាភិបាលកម្ពុជា មានឆន្ទៈពិតប្រាកដក្នុងការដោះស្រាយរឿងក្តីនេះទេ ព្រោះវាមានការផ្សារភ្ជាប់​ក្នុង​រឿង​នយោបាយ នៅពីក្រោយខ្នងច្រើន។ ដូច្នេះរឿងនេះ វាកើតឡើងពីការរៀបចំរបស់អ្នកនយោបាយមួយក្រុម។ រឿង​នេះ មើលទៅអាចរើកកាយបាន ទាល់តែមានការផ្លាស់ប្តូរអំណាចគ្រប់គ្រង។»

មន្ត្រីជាន់ខ្ពស់នៃសមាគមការពារសិទ្ធិមនុស្សអាដហុកដដែលនេះ បន្ថែមថា ករណីគប់គ្រាប់ថ្ងៃ៣០ ខែមីនា ឆ្នាំ​១៩៩៧ គឺបានបង្ហាញច្បាស់ ថាសមត្ថកិច្ច និងប្រព័ន្ធតុលាការកម្ពុជា អសមត្ថភាព ឬគ្មានឆន្ទៈពិតប្រាកដ ក្នុងការ​បំបែកសំណុំរឿងដ៏រសើបមួយនេះ៕