ក្លែងឯកសារបាត់ឈ្មោះគ្រូបង្រៀនម្នាក់ពីក្រសួង សង្ស័យរឿងនយោបាយ
- ដោយ: អ៊ុម វ៉ារី
- កែប្រែចុងក្រោយ: April 04, 2014
- ប្រធានបទ:
- អត្ថបទ: មានបញ្ហា?
- មតិ-យោបល់
-
គ្រូបង្រៀនម្នាក់ មានអតីតភាពការងារជាង២១ឆ្នាំ ត្រូវបាន«លុប»ឈ្មោះពីក្រសួងអប់រំ ដោយមិនដឹងខ្លួន តាមឯកសារក្លែងបន្លំហត្ថលេខា និងឈ្មោះរបស់លោក ក្រោយពីលោកបានព្យួការងារ និងចូលជាសមាជិកក្រុមប្រឹក្សាឃុំគោកកធិន ក្នុងគណបក្សសង្គ្រោះជាតិ។
សកម្មភាពឃោសនាបោះឆ្នោតរបស់គណបក្សសង្គ្រោះជាតិ នៅខេត្តបន្ទាយមានជ័យ កាលពីខែកក្កដាឆ្នាំ២០១៣។ (រូបថតហ្វេសប៊ុក)
មន្ត្រីរាជការសាធារណៈ - គ្រូបង្រៀនម្នាក់ នៃសាលាបឋមសិក្សាកាត្រៃ ស្ថិតក្នុងឃុំគោកកធិន ស្រុកថ្មភួក ខេត្តបន្ទាយមានជ័យ ត្រូវបានជនមិនស្គាល់មុខក្នុងក្រសួងស្ថាប័នអប់រំរបស់រដ្ឋ ក្លែងឯកសារសាធារណៈ ដោយធ្វើនូវលិខិតលាឈប់ពីការងារជំនួសលោក ទាំងលោកមិនបានដឹងខ្លួន។ លោកគ្រូ ផា សុខនឿត ដែលរងគ្រោះបាត់បង់តួនាទីពីគ្រួបង្រៀន និងគ្មានប្រាក់បៀវត្ស បានថ្លែងប្រាប់ទស្សនាវដ្ដីមនោរម្យ.អាំងហ្វូ ថា លោកមិនសុខចិត្ត ចំពោះអំពើក្លែងឯកសារសាធារណៈខាងលើនេះឡើយ ព្រោះវាជាអំពើមួយខុសច្បាប់ និងធ្វើបានរំលោភសិទ្ធិបុគ្គលដែលការពារដោយច្បាប់។ យ៉ាងណាក៏ដោយ លោកនឹងប្តឹងតវ៉ារកខុសត្រូវ ពិសេស«វែក»រកមុខ អ្នកដែលហ៊ានក្លែងហត្ថលេខារបស់លោក ពិសេស«លិខិតស្នាមសាធារណៈ»។
ក្នុងវ័យ៤៣ឆ្នាំ លោកគ្រូរូបនេះបានពន្យល់ថា ក្នុងនាមបុគ្គលិកមន្រ្តីរាជការម្នាក់ បើចង់លុបឈ្មោះចេញពីស្ថាប័នរដ្ឋនោះ ត្រូវសំអាងលើអ្វីខ្លះ? បើលោកមានកំហុសណាមួយ នាយកសាលាត្រូវហៅ មកធ្វើការស្តីបន្ទោស ហៅទៅអប់រំ ឬណែនាំពីរលើកឬបីលើកជាមុនសិន តែនេះគ្មានសោះ។ លោកបន្តទៀតថា អាចលប់ឈ្មោះបាន ឬចេញសេចក្តីប្រកាសលុបឈ្មោះបាន លុះត្រាណាមានលិខិតលាឈប់ជាផ្លូវការ ដែលស្នើដោយសាមីខ្លួនផ្ទាល់ តែនេះលោក«មិន»បានដាក់លិខិតលាឈប់ផង ស្រាប់តែមានលិខិតលាឈប់ពីការងាររបស់លោកមួយ ជាសំអាង ដែលនាំឲ្យមានការលប់ឈ្មោះនេះ ហើយមិនមែនជាហត្ថលេខារបស់លោកទៀត។
លោកបន្តថាកាលពីថ្ងៃទី១៥ ខែមីនាកន្លងមកនេះ ប្រធានការិយាល័យអប់រំស្រុក លោក ប៉ែន សាប៊ន បានហៅលោកទៅទទួលសេចក្តីប្រកាសលុបឈ្មោះ ដែលបានចុះហត្ថលេខាដោយលោក អ៊ឹម សុធី។
លោកបានបញ្ជាក់ថា ពាក្យសុំព្យួរការងារនេះ ទើបតែបានដាក់ក្នុងថ្ងៃទី២៦ ខែកក្កដា ឆ្នាំ២០១២ ហើយនាយកសាលាចុះហត្ថលេខាថ្ងៃទី៣០ ខែកក្កដា ឆ្នាំ២០១២ និងខាងអប់រំស្រុកចុះថ្ងៃទី២១ ខែសីហា ឆ្នាំ២០១២។ ចំណែកលិខិត ដែលលោកចោទប្រកាន់ថា«ក្លៃងក្លាយ»មានហត្ថលេខា និងឈ្មោះរបស់លោកនោះ ចុះថ្ងៃទី១៩ ខែតុលា ឆ្នាំ២០១២ ឯនាយកសាលាចុះហត្ថលេខាថ្ងៃទី១៩ ខែតុលា ឆ្នាំ២០១២ជាមួយគ្នា និងខាងអប់រំស្រុកចុះថ្ងៃទី៣១ ខែតុលា ឆ្នាំ២០១២។ «មន្ទីរធ្វើអ្វី ត្រូវយោងឯកសារពីស្រុក។ លិខិតលាឈប់នោះ ត្រូវមានការចុះហត្ថលេខា៤នាក់ ម្នាក់ជាសាម៉ីជន ជានាយកសាលា ជាប្រធានអប់រំស្រុក និងប្រធានអប់រំខេត្ត។ (...) តែក្នុងលិខិតនេះ មិនមានការចុះហត្ថលេខាដោយប្រធានអប់រំខេត្តទេ។ (...) ខ្ញុំជាប់ជាក្រុមប្រឹក្សាឃុំ ដល់ពេលហ្នឹងខ្ញុំដាក់ពាក្យព្យូរហើយ និងក៏មិនហានទៅសុំបើកលុយទេ ខ្លាចគេថាយើងមិនបានទៅបំរើការងារឲ្យគេ។ (...) ខ្ញុំមិនបានទាមទារបើកប្រាក់ខែទេ សូមតែរក្សាឈ្មោះខ្ញុំទុកបានហើយ។»
ទស្សនាវដ្តីមនោរម្យ.អាងហ្វូ មិនអាចសុំការបញ្ជាក់ ពីនាយកសាលាបឋមសិក្សាកាត្រៃលោក យិន ហេង បានទេ ក្នុងពេលភ្លាមៗនេះ ដោយមិនអាចភ្ជាប់ទំនាក់ទំនងបាន។ តែលោក ប៉ែន សាប៊ន ប្រធានការិយាល័យអប់រំស្រុកថ្មភួក បានបញ្ជាក់ប្រាប់ទស្សនាវវដ្តីមនោរម្យ.អាំងហ្វូ ថា លោកមិនបានដឹងរឿងនោះច្បាស់ទេ ប៉ន្តែលោកផ្ទាល់បានឲ្យធ្វើការចចារគ្នារកដំណោះស្រាយសិន បន្ទាប់ពីលោកគ្រូខាងលើបានមកធ្វើការតវ៉ា។ មកទល់នឹងថ្ងៃនេះ លោកនៅមិនទាន់ទទួលបានព័ត៌មាន ពីករណីចោទប្រកាន់ខាងលើនៅឡើយទេ។
លោក ប៉ែន សាប៊ន បានបន្ថែមថា «ការរលប់ឈ្មោះ ត្រូវមាននីតិវិធីរបស់គេ នឹងត្រូវហៅគាត់ទៅបំភ្លឺយ៉ាងម៉េចៗខ្ញុំមិនដឹងទេ។ ដឹងត្រឹមថា ថ្ងៃតវ៉ានោះបានឲ្យគាត់មក បង្ខំឲ្យគាត់ទទួលយក។ (...) នីតិវិធីនៃការលប់ហ្នឹង វាដំណើរការ ហាក់បីដូចជាមិនឯកភាព ទៅតាមគាត់និយាយមែន ព្រោះគាត់និយាយស្បថអញ្ចឹង ខ្ញុំក៏មិនដឹងថាម៉េចដែរ។ (...) ខ្ញុំក៏មិនហ៊ានបង្ខំថារឿងនេះត្រូវតែទទួលយក ឬយ៉ាងណាទេ ព្រោះប្រហែលជាគាត់មិនបានធ្វើការលាលែងមែន។»
តំណាងអង្គការអាតហុក ប្រចាំខេត្តបន្ទាយមានជ័យលោក ស៊ុំ ចាន់គា បានបញ្ចាក់ប្រាប់ទស្សនាវដ្តីមនោរម្យ.អាំងហ្វូ ថាដំណើការនៃរឿងនេះតាំងពីដើមដល់ចប់ រហូតដល់មានការបល់ឈ្មោះចេញពីក្រសួងរបស់លោកគ្រូ ផា សុនឿត មានពាក់ព័ន្ធនឹងបញ្ហានយោបាយនៅក្នុងនោះ។ លោកបានពន្យល់ថា ព្រោះលោកគ្រូរូបនេះ បានព្យូរការងារពីគ្រូបង្រៀនទៅធ្វើជាក្រុមប្រឹក្សាឃុំ របស់គណបក្សសង្គ្រោះជាតិ។
កូនចៅផ្សំគ្រឿងពីក្រោម មេចេះតែស្លរ...
មន្រ្តីអាដហុករូបនេះ បានលើកជាចម្ងល់ថា ពាក្យលាឈប់របស់លោកគ្រូរូបនេះ មិនបានសរសេរទេ ហេតុដូចម្តេចបានជាមន្រ្តីដូចជានាយកសាលា ខាងគណបក្សផ្សេងមិនដឹងជាធ្វើយ៉ាងម៉េច បានជាខាងក្រសួងចេញលិខិតមួយបញ្ជាក់ពីការលាឈប់របស់គាត់? លោកថ្លែងឲ្យដឹងទៀតថា «តើចេតនាទុច្ចរិត ជនណាអ្នកប្រព្រឹត្តិ ឬក៏ជាស្ថាប័នរបស់រដ្ឋ? មន្ទីរអប់រំខេត្តបន្ទាយមានជ័យមួយទាំងមូល ឬនៅតាមស្រុកដែលប្រព្រឹត្តនូវការក្លែងលិខិត ដើម្បីឲ្យជនម្នាក់អស់នូវតួនាទី ដោយមិនបានដឹងរឿង ដឹងហេតុនោះទេ។ (…) ក្រសួងអប់រំត្រូវតែធ្វើការពិចារណា ពិនិត្យមើល កុំឲ្យចេះតែហៃអើ! កូនចៅផ្សំគ្រឿងពីក្រោម មេចេះតែស្លរ ដែលធ្វើឲ្យប៉ះពាល់យ៉ាងខ្លាំងដល់អារម្មណ៍ប្រជាពលរដ្ឋ។ (…) សូមបញ្ឈប់ការលាបពណ៌ឲ្យគ្នាទៅវិញទៅមក ដូចករណីលោកគ្រូនេះ កុំលាបពណ៌ម្តងដាក់ទៅនេះ ម្តងដាក់ទៅនោះ ដែលប៉ះពាល់យ៉ាងខ្លាំងដល់ជីវភាព និងសិទ្ធិរស់រានមានជិវិតរបស់គាត់៕»
--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី០៣ មេសា ២០១៤