សម រង្ស៊ី នៅតែប្រកាន់ជំហរថា រដ្ឋាភិបាល ហ៊ុន សែន គ្មានធម្មនុញ្ញភាព
ទន្ទឹមនឹងញ្ញត្តិគាំទ្ររដ្ឋាភិបាល ដែលចេញផ្សាយបន្តបន្ទាប់គាំទ្រ សេចក្ដីថ្លែងការណ៍ថ្កោលទោស មេដឹកនាំគណបក្សសង្គ្រោះជាតិ ចេញដោយរដ្ឋាភិបាលលោក ហ៊ុន សែន លោក សម រង្ស៊ី នៅតែប្រកាន់ជំហររបស់ខ្លួន ដោយបានសរសេរបញ្ជាក់ នៅលើទំព័រហ្វេសប៊ុកជាផ្លូវការរបស់លោកថា គឺគណបក្សប្រជាជនកម្ពុជាទៅវិញទេ ដែលបានកំពុងធ្វើរដ្ឋប្រហារធម្មនុញ្ញ ដោយសារអធម្មនុញ្ញនៃការបើកសម័យប្រជុំសភាលើកដំបូង ថ្ងៃទី២៣ ខែកញ្ញា ឆ្នាំ២០១៣ ដែលជាសភាឯកបក្ស។
លោក សម រង្ស៊ី ប្រធានគណបក្សសង្គ្រោះជាតិ។ (រូបថត គណបក្ស)
នយោបាយកម្ពុជា - ដំណើររឿងភាគនៃនយោបាយក្នុងប្រទេសកម្ពុជា អាចនឹងមាន«តភាគ»វែងឆ្ងាយតទៅទៀត។ វែងឆ្ងាយ ព្រោះការឆ្លើយឆ្លងសំបុត្រ ឬសេចក្ដីថ្លែងការណ៍ ឬការចេញញ្ញត្តិគាំទ្របានកើតមានជាហូរហែរ និងព្រោងព្រាតនៅចុងសប្ដាហ៍នេះ ដែលធ្វើឲ្យគេគិតថា នោះគឺជាចម្រៀងដដែលៗ ដែលក្រុមអ្នកនយោបាយ តែងនាំគ្នាច្រៀងមិនចេះនឿយណាយ។
នៅយប់ថ្ងៃសៅរ៍ទី៥ ខែមេសា លោក សម រង្ស៊ី នៅលើទំព័រហ្វេសប៊ុកជាផ្លូវការរបស់លោក នៅតែប្រកាន់ជំហរថា គឺគណបក្សប្រជាជនកម្ពុជាទៅវិញទេ ដែលបានកំពុងធ្វើរដ្ឋប្រហារធម្មនុញ្ញ ដោយសារ«អធម្មនុញ្ញ»នៃការបើកសម័យប្រជុំសភាលើកដំបូង ថ្ងៃទី២៣ ខែកញ្ញា ឆ្នាំ២០១៣ ដែលជាសភាឯកបក្ស។ ប្រធានគណបក្សសង្គ្រោះជាតិ បានបញ្ជាក់ទៀតថា សភាអធម្មនុញ្ញ ដែលបង្កើតដោយគណបក្សប្រជាជនកម្ពុជា «តែមួយ» អាចបង្កើតជារដ្ឋាភិបាល មិនស្របរដ្ឋធម្មនុញ្ញ និងមិនស្របច្បាប់។
ការលើកឡើងនៅលើទំព័ររបស់លោក សម រង្ស៊ី បានធ្វើឡើងបន្ទាប់ពីសេចក្ដីថ្លែងការណ៍មួយ របស់រដ្ឋាភិបាល លោក ហ៊ុន សែន ចុះថ្ងៃទី៥ ខែមេសាដដែលនេះ ហៅលិខិតរបស់លោក សម រង្ស៊ី ផ្ញើរថ្វាយព្រះមហាក្សត្រ ជាការ«ញុះញង់ និងជំរុញឲ្យព្រះមហាក្សត្រ អនុវត្តផ្ទុយពីរដ្ឋធម្មនុញ្ញ ដែលទង្វើនេះ មានតម្លៃស្មើនឹងការធ្វើរដ្ឋប្រហាររដ្ឋធម្មនុញ្ញ»។ សេចក្ដីថ្លែងការណ៍ ដែលបានចេញផ្សាយនៅពេលល្ងាច បានចោទប្រកាន់ធ្ងន់ៗ ទៅលើមេដឹកនាំគណបក្សសង្គ្រោះជាតិ ថា«ពិតជាបានរំលោភបំពានទាំងកំរោល ទៅលើអង្គព្រះមហាក្សត្រ ហើយក៏ជាការជាន់ឈ្លី នូវគោលការណ៍និតិរដ្ឋនៅកម្ពុជា»។ សេចក្ដីថ្លែងការណ៍ បានសរសេរទៀតថា នឹងពិចារណានូវវិធានការដ៏«ម៉ឺងម៉ាត់»ចំពោះបុគ្គល សម រង្ស៊ី» ដើម្បីរក្សា ការពារ ទោះក្នុង«តម្លៃណាក៏ដោយ» នូវបាវចនា ជាតិ សាសនា ព្រះមហាក្សត្រ និង«សេចក្ដីថ្លៃថ្នូរ»របស់សង្គមជាតិ។
ប្រតិកម្មខ្លាំងៗរបស់រដ្ឋាភិបាលលោក ហ៊ុន សែន បានធ្វើឡើងតែមួយថ្ងៃក្រោយលិខិតមួយរបស់លោក សម រង្ស៊ី ផ្ញើរថ្វាយព្រះមហាកក្សត្រ ព្រះបាទ នរោត្ដម សីហមុនី ដែលបានលើកឡើងពីអធម្មនុញ្ញភាព នៃស្ថាប័ននិតិបញ្ញត្តិនីតិកាលទីប្រាំនេះ។ លិខិតដែលលោក សម រង្ស៊ី បាននិយាយថាមានលក្ខណៈឯកជន ផ្ញើរថ្វាយព្រះមហាក្សត្រនេះ ត្រូវបានដាកផ្សាយជាសាធារណៈ នៅលើហ្វេសប៊ុកជាផ្លូវការ របស់មេដឹកនាំគណបក្សប្រឆាំង ហើយបន្ទាប់មក ប្រព័ន្ធផ្សព្វផ្សាយក៏បានយកទៅផ្សាយ ជាបន្តយ៉ាងព្រោងព្រាត។
លិខិតនោះសរសេរថា៖ «រដ្ឋសភាបច្ចុប្បន្នគឺមិនបានឆ្លុះបញ្ចាំង ពីឆន្ទៈពិតប្រាកដរបស់ប្រជាពលរដ្ឋខ្មែរឡើយ ហើយក៏ពុំអាចធ្វើជាតំណាង ឲ្យពលរដ្ឋខ្មែរទាំងមូលបានដែរ ដោយសារពុំមានតំណាងរាស្រ្តគ្រប់ចំនួន១២០រូប ចូលរួមសម័យប្រជុំដំបូង នៃរដ្ឋសភា ដូចដែលតម្រូវដោយមាត្រ៧៦ នៃរដ្ឋធម្មនុញ្ញ នៃព្រះរាជាណាចក្រកម្ពុជា»។
ជុំវិញប្រតិកម្មរបស់រដ្ឋាភិបាល ដែលព្រមានចាត់វិធានការ ប្រឆាំងរូបលោកនោះ លោក សម រង្ស៊ី បានសរសេរនៅយប់ថ្ងៃសៅរ៍ទៀតថា «នោះជាគម្រោងថ្មីមួយទៀត ក្នុងការប្រើប្រាស់ តុលាការឆាកល្ខោន របស់ពួកគេ ដើម្បីបំបិតសម្លេងរបស់ក្រុមប្រឆាំង»។ លោកបានចាត់ទុកថា ប្រតិកម្មរបស់រដ្ឋាភិបាល លោក ហ៊ុន សែន ហាក់ដូចជាមិនទាន់ត្រឹមត្រូវឡើយ ខណៈពេលមិនទាន់មានការឆ្លើយតប ពីព្រះមហាក្សត្រផងនេះ។ លោក សម រង្ស៊ី បានសរសេរថា៖ «យើងទាំងអស់គ្នា គប្បីរង់ចាំ រាជបន្ទូលឆ្លើយតបរបស់ព្រះមហាក្សត្រជាមុនសិន»៕
-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី៦ មេសា ២០១៤