សិទ្ធិ - លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌសិទ្ធិមនុស្សកម្ពុជា បានពន្យល់ប្រាប់ទស្សនាវដ្តី​មនោរម្យ.អាំងហ្វូ នៅថ្ងៃទី១១ មេសា នេះថា មុននឹងកម្ពុជាចុះកិច្ចព្រមព្រៀងទទួលយកជនភៀសខ្លួន ប្រទេស​កម្ពុជាត្រូវធ្វើឲ្យប្រាកដថា អាចធានាបានពីសុវត្ថិភាពរបស់ជនភៀសខ្លួន ហើយមិនបញ្ជូនជនភៀសខ្លួនទាំងនោះ ទៅកាន់ទីកន្លែងដែលពួកគេត្រូវបានរំលោភបំពាន ឬកន្លែងគ្មានសុវត្ថិភាព។

គួរកត់សម្គាល់ថា មានជនភៀសខ្លួនច្រើនរយនាក់ មកពីប្រទេសេរីលង្កា បង់ក្លាដេស នេប៉ាល់ជាដើម បានធ្វើដំណើរ​តាមគ្រប់រូបភាព ដើម្បីសុំសិទ្ធិជ្រកកោន រស់នៅក្នុងប្រទេសអូស្រ្តាលី។ តែប្រទេសអូស្រ្តាលី ត្រូវបានគេដឹងថា មិន​ចង់ទទួលយកជនភៀសខ្លួនទាំងនោះ ឲ្យរស់នៅជាអចិន្រ្តៃយ៍នោះទេ ព្រោះត្រូវបានគេដឹងថា នេះជាបន្ទុកយ៉ាង​ធ្ងន់ធ្ងរ ដល់អនាគតសេដ្ឋកិច្ច សង្គម របស់អូស្រ្តាលី ខណៈជនចំណាកស្រុកដែលមានវិបត្តិទាំងនោះ ភាគច្រើន​មានបញ្ហាសុខភាពផ្លូវកាយ ចិត្ត និងកម្រិតវប្បធម៌ទាបជាដើម។

ហេតុដូច្នេះ ទើបកាលពីដើមឆ្នាំ២០១៤ ប្រទេសអូស្រ្តាលីបានបញ្ជូនមន្រ្តីការទូតរបស់ខ្លួន មកបញ្ចុះបញ្ចូល​ប្រទេស​កម្ពុជា ឲ្យទទួលយកជនភៀសខ្លួនទាំងនោះ ឲ្យរស់នៅជាអចិន្រ្តៃយ៍នៅកម្ពុជា ហើយប្រទេសអូស្រ្តាលីអាចផ្តល់​ជា​ទឹកប្រាក់ច្រើនលានដុល្លារដល់កម្ពុជា ជាថ្នូរ។ គោលជំហរនេះត្រូវបានអង្គការសិទ្ធិមនុស្សជាតិ និងអន្តរជាតិ រិះគន់​ជាបន្តបន្ទាប់ ហើយបានស្នើដល់ប្រទេសកម្ពុជា គម្បីបដិសេធការស្នើសុំរបស់ប្រទេសអូស្រ្តាលី ខណៈភាគីកម្ពុជា​កំពុង​ពិចារណា លើការស្នើសុំរបស់ប្រទេសអូស្រ្តាលី។

អ្នកតាមដានស្ថានការណ៍សង្គមកម្ពុជាបានពន្យល់ថា សូម្បីតែប្រជាពលរដ្ឋកម្ពុជា ជាង១៤លាននាក់ ក៏រដ្ឋាភិបាល​កម្ពុជា គ្រប់គ្រងមិនទាន់បានល្អផង ដោយមានពលរដ្ឋកម្ពុជា កំពុងនិរទេសខ្លួន ធ្វើកម្មករទាំងស្របច្បាប់ និងមិន​ស្របច្បាប់ច្រើនសែននាក់ នៅក្រៅប្រទេស។ ដូច្នេះមិនមានហេតុផលថា ប្រទេសកម្ពុជាអាច​គ្រប់គ្រងជនភៀសខ្លួន​ទាំងនោះបានល្អនោះទេ តែវាអាចជាបន្ទុកធ្ងន់ធ្ងរសម្រាប់ប្រទេសកម្ពុជា ក្នុងពេលអនាគត និងការំលោភសិទ្ធិ​ជន​ភៀស​ខ្លួន​ទាំងនោះ តាមរយៈការមិនផ្តល់អនាគតល្អដល់ពួកគេ ខណៈពួកគេគ្នានបំណងសាងជីវិតថ្មី​លើទឹកដី​កម្ពុជា។

ចំណោះករណីនេះលោកស្រី ចក់ សុភាព បានអត្ថាធិប្បាយថា ៖ «អូស្រ្តាលីមិនគួរពិចារណាយកប្រទេសកម្ពុជា ជា​គោលដៅជនភៀសខ្លួននោះទេ។ បើមើលបទពិសោធន៍ និងស្ថានភាពសិទ្ធិមនុស្ស អូស្រ្តាលីល្អជាងកម្ពុជា ហើយនៅ​ពេលដែលមានជនភៀសខ្លួនឆ្លងកាត់ប្រទេសកម្ពុជា ដើម្បីទៅរកប្រទេសទីបី រដ្ឋាភិបាលកម្ពុជាតែងតែបញ្ជូន​ពួកគេ​ទៅវិញ ដោយមិនគោរពសិទ្ធិពួកគេ។ មានដូចជនជាតិម៉ុងតាញ្ញ៉ាទៅវៀតណាម និងអុយហ្គើរបញ្ជូនត្រលប់ទៅចិន ហើយរបៀបជាថ្នូរត្រលប់មកវិញ។»៕