រដ្ឋាភិបាល៖ ការ​ឡើង​ថ្លៃ​សំបុត្រ​ឡាន​ក្រុង ជា​សេរីភាព​នៃ​អ្នក​ធ្វើ​អាជីវកម្ម

មកដល់រដូវបុណ្យទានម្តងៗពិសេសបុណ្យភ្ជុំបិណ្ឌ និងបុណ្យចូលឆ្នាំថ្មី ប្រជាពលរដ្ឋតែងតែទៅជួបជុំបងប្អូន នៅ​តាម​បណ្តាស្រុកំណើតរៀងៗខ្លួនទីទៃៗ។ ឆ្លៀតក្នុងឱកាសនោះ បណ្តារឡានឈ្នួល ពិសេសឡានក្រុង តែងតែតំឡើង​ថ្លៃ​សំបុត្រទៅតាមតែចិត្តចង់ ហាក់មិនមានការខ្លាចរអារ ឬគោរព និងស្តាប់ការអំពាវនាវ​របស់នាយករដ្ឋមន្រ្តី សុំឲ្យ​មាន​ការរក្សានូវតំលៃសំបុត្រដូចដើមក៏ដោយ។
Loading...
  • ដោយ: អ៊ុម វ៉ារី
  • កែប្រែចុងក្រោយ: April 17, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

មកដល់រដូវបុណ្យទានម្តងៗពិសេសបុណ្យភ្ជុំបិណ្ឌ និងបុណ្យចូលឆ្នាំថ្មី ប្រជាពលរដ្ឋតែងតែទៅជួបជុំបងប្អូន នៅ​តាម​បណ្តាស្រុកំណើតរៀងៗខ្លួនទីទៃៗ។ ឆ្លៀតក្នុងឱកាសនោះ បណ្តារឡានឈ្នួល ពិសេសឡានក្រុង តែងតែតំឡើង​ថ្លៃ​សំបុត្រទៅតាមតែចិត្តចង់ ហាក់មិនមានការខ្លាចរអារ ឬគោរព និងស្តាប់ការអំពាវនាវ​របស់នាយករដ្ឋមន្រ្តី សុំឲ្យ​មាន​ការរក្សានូវតំលៃសំបុត្រដូចដើមក៏ដោយ។


រូបថតអ្នកដំណើរនៅលើរថយន្ដក្រុង។ (រូបថត MONOROOM.info/ D.KEO

សំបុត្រឡើងថ្លៃ - មិនថាចំពោះតែខេត្តណាមួយឡើយ ទាំង២៥ខេត្តក្រុងកម្ពុជា រថយន្តក្រុងបានតំឡើងថ្លៃសំបុត្រ ទៅតាមអ្វីដែលគេ (ថៅកែ) ចង់បាន។ លោកនាយករដ្ឋមន្ត្រី ហ៊ុន សែន  ធ្លាប់​បាន​ថ្លែងអំពាវនាវកុំឲ្យមានការតម្លើងថ្លៃ កាលពីពេលថ្មីៗនេះ តែការថ្លែងរបស់លោក ហាក់ដូចជាការអំពាវនាវមួយ ស្រែកទៅកាន់ខ្យល់​យ៉ាង​ដូច្នេះ។

បកស្រាយទៅនឹងបញ្ហាខាងលើនេះ អ្នកនាំពាក្យរដ្ឋាភិបាល លោក ផៃ ស៊ីផាន ក្នុងកិច្ច​សម្ភាស​ជាមួយទស្សនាវដ្តី​មនោរម្យ.អាំងហ្វូ ក្នុងថ្ងៃទី១៧ ខែមេសានេះ បានលើកឡើងថា «សំដី»លោកនាយករដ្ឋមន្ត្រី «គ្រាន់តែ»ជាការ​អំពាវនាវ «មិនមែន»ជាច្បាប់នោះទេ។ លោកបន្តថា នាយករដ្ឋមន្រ្តីលើកឡើងនេះ ព្រោះតែលោក (ហ៊ុន សែន) គោរពនូវសេចក្តីសម្រេចរបស់ឯកជន ដែលជាសិទ្ធិអត្តនោម័តរបស់គេ ដើម្បីឲ្យមានការប្រគួតប្រជែង។ «លោក​អំពាវនាវទៅដល់អ្នកធ្វើអាជីវកម្ម។ (...) យើងសង្ឃឹកថាគេ (ក្រុមហ៊ុន) នឹងយល់នៅពេលក្រោយ ដល់ពេលបុណ្យ​ប្រពៃណីជាតិគួរតែមានការលើកលែង»។

ចំពោះការអត្ថាធិប្បាយខាងលើ មន្រ្តីជាន់ខ្ពស់របស់គណបក្សសង្គ្រោះជាតិលោក រស់ សួរ បានលើកឡើងថា នេះ​ជា​ការគេចវេសមិនទទួលខុសត្រូវរបស់រដ្ឋាភិបាល។ រដ្ឋាភិបាលគ្មាន«សម្មត្ថភាពក្នុងការគ្រប់គ្រងសេដ្ឋកិច្ចទីផ្សារសេរី ក្នុងដែលសមត្ថកិច្ចរបស់ខ្លួន។ ពិសេសចំពោះករណីដ៏តូចតាចមួយនេះ ក៏មិនអាចគ្រប់គ្រងឲ្យមានតម្លៃ​ជា​ស្ថេរភាព បានដែរ។ «សេដ្ឋកិច្ចទីផ្សារសេរី ក៏ស្ថិតក្នុងច្បាប់ដែរ (វា)មិនមែនអត់ច្បាប់ចេះតែសេរី អ្នកណាចង់លក់ប៉ុន្មានក៏បាន​នោះទេ។ (...) បញ្ហាអ្នកស្លាប់គឺអ្នកក្រនោះទេ។»

យ៉ាងណាក៏ដោយ លោក ផៃ ស៊ីផាន បានច្រានបន្ទុកនៃការទទួលខុសត្រូវនេះ ទៅឲ្យសាលារាជធានីភ្នំពេញ ឬខាង​ក្រសួងដឹកជញ្ជូនដែលមានភារកិច្ច។ តែក្នុងកិច្ចសម្ភាសរបស់ទស្សនាវដ្តីមនោរម្យ.អាំងហ្វូ ក្នុងថ្ងៃទី១៧ ខែមេសានេះ លោក ឡូង ឌីម៉ង់ អ្នកនាំពាក្យសាលារាជធានីភ្នំពេញ ក៏បានបដិសេធថាមិនមែនជាសមត្ថកិច្ចរបស់ សាលារាជធានី​ភ្នំពេញទេ។ ក្នុងសភាពស្ទាក់ស្ទើរ លោក ឌីម៉ង់ បានដាក់បន្ទុកក្នុងការស្វែងរកអ្នកទទួលខុសត្រូវថា អាចជាសមត្ថកិច្ច​របស់​ក្រសួងសេដ្ឋកិច្ចនិងហិរញ្ញវត្ថុ ឬក៏រដ្ឋាភិបានជាអ្នកគ្រប់គ្រង។ «មែនការពិត យើង​អាចអំពាវនាវកុំ​ឲ្យ​ឡើង​ថ្លៃ​អញ្ចឹង។ តែបើគេឡើងថ្លៃ ខ្ញុំមិនដឹងថាម៉េចនោះទេ។ (...) និយាយឲ្យចំ (វា) មិនមែនជាសមត្ថកិច្ច​របស់​សាលា​រាជធានី​ភ្នំពេញទេ។»

បន្ទាប់មកទៀត លោក ផៃ ស៊ីផាន ក៏បានច្រានដាក់បន្ទុកនេះជាថ្មី ទៅលើអ្នក«នយោបាយ»។ លោកបានបន្តថា ករណីនេះទុកឲ្យអ្នក«នយោបាយ»ជាអ្នកមានសិទ្ធិដាក់កំរិត ច្រើនជាងរដ្ឋាភិបាល។ លោកបានបញ្ជាក់ថា រដ្ឋាភិបាល​គ្មានអំណាចអ្វីលើសពីនេះនោះទេ។

ឆ្លើយតបទៅនឹងការទម្លាក់កំហុសនេះ លើអ្នកនយោបាយ មន្រ្តីច្បាប់ជាន់ខ្ពស់គណបក្សសង្គ្រោះជាតិ លោក រស់ សួរ បានប្រតិកម្មវិញទៀតថា «តើគណបក្សនយោបាយ មានអំណាច និងដាវអាជ្ញាសិកឯណា មកគ្រប់គ្រង​ប្រទេស​នោះ (វា)មានតែរដ្ឋាភិបាលហ្នឹង ដែលមានភារកិច្ចគ្រប់គ្រងប្រទេសនោះ៕»

-------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៧ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...