មិនមែនជាពួកគេទេ តែជាស្រមោលមួយ ឬជាខ្មោច ឬជាព្រលឹង ឬជារូបអ្វីម្យ៉ាង ដែលលងពួកគេនៅក្នុងផ្ទះ ហើយ​តាមរករឿងទារករបស់ពួកគេ ដែលទើបនឹងមានអាយុ១១ខែ រហូតមានរបួសជាទម្ងន់។ ទារកដែលរងគ្រោះ ដែល​ត្រូវបានដឹកទៅសង្គ្រោះជាបន្ទាន់ ទៅកាន់មន្ទីរពេទ្យកាលពីថ្ងៃទី២៣ ខែធ្នូ ឆ្នាំ២០១០កន្លងទៅ ជាមួយនឹងសភាព​របួសយ៉ាងធ្ងន់ធ្ងរ៖ បាក់ឆ្អឺងពីរ ហើមភ្នែក និងបែកមាត់ ...

រូបថតបង្ហាញពីបន្ទប់របស់ទារក ដែលប្ដីប្រពន្ធនិយាយថា មានខ្មោចលង។

ខ្មោចលង - កាលពីថ្ងៃទី១៦ ខែមេសា ម្ដាយនិងឪពុកចុង របស់ទារករងគ្រោះ ត្រូវបានកាត់ទោសដោយតុលាការ អាវីញ៉ុង (Avignon) ផ្នែកខាងត្បូងនៃប្រទេសបារាំង ពីបទប្រើហិង្សាវាយតប់លើកុមារ។ ប៉ុន្តែប្ដីប្រពន្ធមួយគូរនេះ មិន​បានទទួល​ខ្លួនថា បានប្រព្រឹត្តការវាយតប់ទៅលើទារកនោះទេ ប៉ុន្តែជនប្រព្រឹត្តិអំពើល្មើសនេះ ជា«ខ្មោច»ដែលលង​នៅក្នុង​ផ្ទះ​របស់ពួកគេ។ បុរសជាប្ដី បានថែមទាំងបញ្ជាក់ថា ខ្លួនធ្លាប់បានទៅជួបអាចារ្យមួយរូបកាលពី៣សប្ដាហ៍មុន ដើម្បីសុំឲ្យ​អាចារ្យរូបនោះ មកបណ្ដេញព្រលឹង«អសុរកាយ»ចេញពីផ្ទះ។

តែប្រព័ន្ធយុត្តិធម៌សាធារណៈរបស់ប្រទេសបារាំង មិនបានជឿសូម្បីបន្តិចឡើយ ពីការលើកឡើងរបស់ប្ដីប្រពន្ធនេះ ដែលថាខ្មោចជា«ជនដៃដល់»។ ប្ដីត្រូវបានកាត់ទោសឲ្យជាប់ពន្ធនាគារ ៥ឆ្នាំ ខណៈប្រពន្ធជាប់ពន្ធនាគារ ២ឆ្នាំ ដោយ​ឲ្យព្យួរទោសមួយឆ្នាំ។ មន្ទីរពេទ្យ បានរាយការណ៍ពីហេតុការណ៍នេះ ទៅប្រាប់នគរបាល បន្ទាប់ពីទារកត្រូវបាន​ក្រុម​គ្រូពេទ្យទទួលពិនិត្យ កាលពីថ្ងៃទី២៣ ខែធ្នូ ឆ្នាំ២០១០កន្លងទៅ។ នៅក្នុងការស៊ើបអង្កេតនៅក្នុងសំនុំរឿងនេះ ក្រុម​នគរបាលបាន​ទទួលនូវរបាយការណ៍ ទាក់​ទង​នឹងនឹង​របួសនៅលើខ្លួនទារកយ៉ាងរន្ធត់ជាច្រើន។

អ្នកជំនាញខាងចិត្តសាស្ត្រពីរនាក់ ដែលបានសិក្សាករណីនេះ ម្នាក់បានលើកឡើងពីការបង្កើតរឿងផ្ដេសផ្ដាស ហើយ​ថាបុរសនេះ បានចាប់ផ្ដើមជឿទៅលើអបិយជំនឿ ខ្មោចព្រាយបីសាច។ តែអ្នកជំនាញម្នាក់ទៀត បាននិយាយ​ច្បាស់ៗ​ថា បុរសនេះគ្មានបញ្ហាអ្វីខាងផ្លូវចិត្តទេ តែបង្កើតរឿងនេះមក ដើម្បីបញ្ជៀសការទទួលខុសត្រូវ ក្នុងការដែល​ខ្លួនវាយទៅលើទារក។

នៅចំពោះរបាយការណ៍របស់ក្រុមអ្នកស៊ើបអង្កេត មេធាវីការពារក្ដីឲ្យបុរសនេះ ក៏បានថ្លែងនៅពីមុខចៅក្រមដែរថា​ «បើបុរសនេះ ឈានទៅដល់ដំណាក់កាលវាយទារក នោះគឺដើម្បីចង់ឲ្យប្រពន្ធរបស់ខ្លួន មានពេលទំនេរបន្ដិចតែ​ប៉ុណ្ណោះ»។ ទារកនោះ មកដល់ថ្ងៃនេះ មានអាយុ៤ឆ្នាំ ហើយត្រូវបានទទួលយកទៅចិញ្ចឹមដោយគ្រួសារមួយ ក្រោម​ការឧបត្ថម្ភពីរដ្ឋ។ ប៉ុន្តែការខាតបង់ដែលរដ្ឋ និងគ្រួសារនោះបានចំណាយទៅលើទារក នឹងត្រូវយកមកគិតគូរពី​ម្ដាយ​បង្កើត និងឪពុកចុងរបស់ក្មេងនេះ នៅក្នុងសវនាការលើកក្រោយទៀត៕

-----------------------------------------------
ដោយ ឈូករ័ត្ន (ទំនាក់ទំនង៖ [email protected]) - ប៉ារីស ថ្ងៃទី១៧ ខែមេសា ឆ្នាំ២០១៤