«ខ្ញុំនឹងប្តឹងលោក ហ៊ុន សែនម្តងទៀត និងបក្សពួករបស់គាត់ នូវអំពើល្មើសច្បាប់ ដែលកំពុង​ប្រព្រឹត្ត​នៅកម្ពុជាសព្វថ្ងៃ ពាក់ព័ន្ធនឹងបាតដៃទីបី ឬការប្រើប្រាស់មនុស្សខុសយុត្តាធិការ ឬមនុស្សគ្មានសមត្ថកិច្ចនឹងអនុវត្ត។ (...) ខ្ញុំនឹងប្តឹងរក​ខុសរកត្រូវ។ បើទោះបីជាតុលាការមិនព្រមដោះស្រាយ ហើយដំកល់រឿងនោះ​ទុកមិន​ចាត់ការ​ក៏​ដោយ តែ(វា)ជាសារ​មួយដល់យុវជន ឲ្យចេះងើបប្តឹងទាំងអស់គ្នា។» នេះជាការបញ្ជាក់ របស់ប្រធានសម្ព័ន្ធកូនខ្មែរ​អ្នកស្នេហាជាតិ​លោក សួង សោភ័ណ្ឌ ក្នុងកិច្ចសម្ភាសមួយ ជាមួយទស្សនាវដ្តីមនោរម្យ.អាំងហ្វូ។

លោក សួង សោភ័ណ្ឌ ប្រធានចលនាយុវជនរបស់គណបក្សសង្គ្រោះជាតិ។ (រូបថត MONOROOM.info/ S. Tith)

ប្រព័ន្ធយុត្តិធម៌ - ប្រធានចលនាយុវជនគណបក្សសង្គ្រោះជាតិលោក សួង សោភ័ណ្ឌ បានប្រកាសជាថ្មីថា លោកនឹង​ប្តឹងលោកនាយករដ្ឋមន្រ្តី ហ៊ុន សែន ព្រមទាំងបក្សពួក នាពេលខាងមុខនេះ ពាក់ព័ន្ធនឹងការប្រើប្រាស់​នូវ​«ក្រុម​ជន​ទី​បីឬក្រុមបាតដៃទីបី»។

ប្រធានក្រុមយុវជនរូបនេះ បានធ្វើការរំលឹកឡើងវិញជាថ្មី នូវសម្តីរបស់លោកនាយករដ្ឋមន្រ្តី ក្នុងពេលកន្លងមកថា សូមប្រយ័ត្នបាតដៃទីបី ដែលក្នុងន័យនេះបានពន្យល់ថា «គាត់(ហ៊ុន សែន)នឹងប្រើបាតដៃទីបី»។ លោកបាន​បញ្ជាក់​ទៀតថា ជាក់ស្តែងក្នុងពេលកន្លងមក តែងមានមនុស្សមួយក្រុមក្នុងឯកសណ្ឋាន«ឈុតខៀវ និងពាក់មួយឃ្លុប» និង​មានមនុស្សមួយក្រុមផ្សេងទៀត ស្ថិតក្នុងសំលៀកបំពាក់«ស៊ីវិលពាក់មួយឃ្លុប»ដូចគ្មាដែរ។ លោកបានធ្វើការ​ចោទ​ជាសំនួរថា តើក្រុមទាំងនោះ ជាក្រុមបាតដៃទីបី? អ្នកណាមានលទ្ធភាពបង្កើតឡើង នូវក្រុមសន្តិខុស សណ្តាប់ធ្នាប់ ឬគេហៅម្យ៉ាងទៀតថា«ក្រុមបញ្ជាការពារភូមិ»ទាំងនេះ?

» សូមអានអត្ថបទនេះឡើងវិញ។

សូមរម្លឹកដែរថា ឲ្យតែមានការជួបជុំធ្វើបាតុកម្មរបស់យុវជន ប្រជាពលរដ្ឋ រាប់ចាប់តាំងពីដើមខែមករាមក តែងតែ​មាន​ការប៉ះទង្គិច កើតឡើងវាងក្រុមសន្តិសុខថែរក្សាសណ្តាប់ធ្នាប់ និងបាតុករ។ ហើយរាល់ការប៉ះទង្គិចគ្នាទាំងនោះ ត្រូវ​បានប្រជាពលរដ្ឋរងគ្រោះទាំងនោះលើកឡើងថា ជាក្រុមជនបាតដៃទីបីជាអ្នកបង្កឡើង។

» សូមអានអត្ថបទនេះឡើងវិញ។

លោក សួង សោភ័ណ្ឌ បានបន្តថា ក្រុមទាំងនោះមិនមែនជាសមត្ថកិច្ច មិនមែនជាមនុស្សដែលមានយុត្តាធិការ ឬមិន​មែនជាអ្នកអនុវត្តច្បាប់។ «ខ្ញុំនឹងមានចំណាត់ការនាពេលខាងមុខហ្នឹង រាល់អំពើទាំងឡាយណាដែលគាត់ (ហ៊ុន សែន) ប្រើ"ជនទីបី"ទៅ ហើយដែលមានសមត្ថកិច្ចនៅពីក្រោយខ្នង។»

លោកនាយករដ្ឋមន្រ្តី ហ៊ុន សែន។

លោកបានបញ្ជាក់ទៀតថា នឹងប្រឆាំងនូវរាល់ទង្វើរបស់លោកនាយករដ្ឋមន្រ្តី ហ៊ុន សែន ដែលកំពុងតែ​អនុវត្តល្មើស​ច្បាប់ ហើយបាន​ប្រើ​ប្រាស់នូវក្រុមមនុស្សដែលគ្មានយុត្តាធិការ ទៅធ្វើបានប្រជាពលរដ្ឋស្លូតត្រង់ ដោយបានចាត់ទុក ក្រុមទាំងអស់នោះ (ក្រុមពាក់ពួកឃ្លុបចូលវាយប្រជាពលរដ្ឋ) ជាក្រុមគ្មានតួនាទី គ្មានក្របខ័ណ្ឌ និងគ្មានការ​តែង​តាំង​អ្វីទាំងអស់។ ការប្រើប្រាស់កម្លាំងស៊ីវិល មកវាយកម្ទេចសម្ភារៈផ្សេងៗរបស់ ប្រជាពលរដ្ឋដទៃ​ផ្សេងទៀត ជាការ​បំផ្លិច​បំផ្លាញទ្រព្យសម្បត្តិឯកជននោះជា«បទល្មើសព្រហ្មទណ្ឌ»។ «នៅកម្ពុជាមានច្បាប់ហើយ មិនព្រមអនុវត្តច្បាប់ អ្នក​អនុវត្តច្បាប់បង្កើតតែបញ្ហា។ (...) ដូច្នេះអ្នកដែល​នាំ​ឲ្យមានការអនុវត្តច្បា់មុនគេគឺ ជា"យុវជន"។»

» សូមអានអត្ថបទនេះឡើង​វិញ។

ដូច្នេះការប្រើក្រុមទាំងនេះមកវាយប្រជាពលរដ្ឋជាករណី«រំលោភ»ច្បាប់ទាំងស្រុង ដែលត្រូវមានទោសព្រហ្មទណ្ឌ។ ទាំងអស់នេះហើយ ដែលជាភស្តុតាងសម្រាប់រូបលោក ក្នុងការប្តឹងលោកនាយករដ្ឋមន្រ្តីសារជាថ្មីនោះ។ លោកបាន​ចាត់ទុកថា ការលើកឡើងរបស់លោក ហ៊ុន សែន នោះ មានន័យថា ជាការបើកផ្លូវឲ្យរចនាសម្ព័ន្ធ ឬក្រុមសមត្ថកិច្ច​ទាំងអស់នោះធ្វើរឿងនេះ (ក្រុមបាតដៃទីបី)។ ការលើកឡើងរបស់លោកនាយករដ្ឋមន្រ្តី ទាក់ទងនឹងជនបាតដៃទីបី ថាជា​«អ្នកផ្តួចផ្តើមគំនិត»ឲ្យមានក្រុមនេះឡើង។

ក្នងពេលកន្លងមក ប្រភពច្បាស់ការមួយធ្លាប់បានអះអាងប្រាប់ទស្សនាវដ្ដីថា ក្រុមសន្តិខុសទាំងនោះ បានបន្លំខ្លួន​ចូលធ្វើជា«អ្នកតវ៉ា» ហើយ​​បានបង្កឲ្យមានហិង្សាជាមួយនិងសន្តិសុខគ្នាឯង ដើម្បីបានជាលេសមួយ បើកឱកាសឲ្យ​មានការបង្ក្រាប​មក​លើ​ពលរដ្ឋអ្នកតវ៉ាដោយអហិង្សាពិតប្រាកដវិញ។

» សូមអានអត្ថបទនេះឡើងវិញ។

ឯក្រុមសង្គមស៊ីវិលជំនាញ ក្នុងការឃ្លាំមើលការអនុវត្តសិទ្ធិមនុស្ស និងច្បាប់​​ បានសម្ដែងនូវប្រតិកម្មជារឿយៗ ទល់​នឹងរាល់​សកម្មភាពរបស់រដ្ឋាភិបាលកម្ពុជា ដែលបាននឹងកំពុង«បិទសិទ្ធិសេរីភាពប្រជាពលរដ្ឋ»ជាមួយនឹងការ«ប្រើ​កងកម្លាំង​ខុសច្បាប់» មកបង្ក្រាបលើការតវ៉ារបស់ពលរដ្ឋ ដែលត្រូវបានធានាដោយរដ្ឋធម្មនុញ្ញ។

» សូមអានអត្ថបទនេះឡើងវិញ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីមន្រ្តីជាន់ខ្ពស់នៃក្រសូងមហាផ្ទៃបានទេ ក្នុងថ្ងៃសៅរ៍នេះ។ តែ​កន្លងមកក្រសួងមហាផ្ទៃ មិនបានទទួលស្គាល់ក្រុមជនបិទមុខទាំងនោះទេ ហើយក៏ធ្លាប់បានស្នើទៅ​សាលារាជធានី​ភ្នំពេញឲ្យបញ្ឈប់នូវការជួល និងប្រើប្រាស់​កម្លាំងក្រុមហ៊ុន​ឯកជន ឬកម្លាំងគ្មានសមត្ថកិច្ចទាំងនោះ ដើម្បីយកមក​វាយ និងបង្ក្រាបក្រុមបាតុករដែរ។

សូមបញ្ជាក់ថា មកទល់នឹងពេលនេះមានយុវជនពីររូបហើយ ដែលចេញមុខប្តឹងលោកនាយករដ្ឋមន្រ្តី ហ៊ុន សែន ជាបុរសខ្លាំង មានឥទ្ធិពល និងអំណាចនៅកម្ពុជានោះ តែនៅរាល់ពាក្យបណ្ដឹងរបស់ពួកគេ សុទ្ធតែត្រូវ​បាន​សាលា​ដំបូងរាជធានីភ្នំពេញច្រានចោល ដោយដំកល់រឿងទុកមិនចាត់ការជាបន្តបន្ទាប់៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៩ មេសា ២០១៤