នៅក្នុងរយៈពេលតែមួយយប់ប៉ុណ្ណោះ គេហទំព័ររបស់រដ្ឋាភិបាលចំនួនពីរ បានរងការវាយប្រហារពីក្រុមហេកឃើ អនាមិក (Anonymous) បន្ទាប់ពីក្រុមនេះបានប្រកាសសង្គ្រាមវាយប្រហារសងសឹក ប្រឆាំងរដ្ឋាភិបាលដែលបាន​ចាប់ខ្លួន​យុវនិស្សិត​ពីររូប។ ទំព័រហ្វេសប៊ុកមួយដាក់ឈ្មោះក្រុមហេកឃើ អនាមិកកម្ពុជា (Anonymous Cambodia)បានចាត់ទុកជន​សង្ស័យ​ទាំងពីរ ថាជាសមាជិក​របស់ពួកគេ ហើយថានឹងធ្វើសកម្មភាពឲ្យបានខ្លាំងជាងមុន ប្រឆាំង​រដ្ឋាភិបាល​កម្ពុជា។

រូបផ្ដិតពីអេក្រង់របស់គេហទំព័រ ដែលត្រូវបានប្ដូរទិន្នន័យដោយក្រុមហេកឃើរអនាមិក។

បច្ចេកវិទ្យា - គេហទំព័ររដ្ឋាភិបាលដំបូងគេ ដែលត្រូវបានក្រុមអនាមិកធ្វើការវាយប្រហារ មានគេហទំព័រ​របស់​សាលាខេត្តសៀមរាប (ចាប់ពីម៉ោង១០យប់ថ្ងៃទី២៤ ខែមេសា) និងគេហទំព័រកម្មវិធីកំណែទម្រង់ ការគ្រប់គ្រង​ហិរញ្ញវត្ថុសាធារណៈ (ចាប់ពីម៉ោង១១កន្លះយប់ថ្ងៃទី២៤ ខែមេសា)។ គេហទំព័រក្មេងវ័យទាំងពីរ ដែលមិនសូវជា​មានការចាប់អារម្មណ៍ប៉ុន្មាន ពីអ្នកប្រើប្រាស់បណ្ដាញអ៊ីនធើណែតនោះ ត្រូវបានក្រុមហេកឃើអនាមិក ផ្លាស់ប្ដូរ​ទិដ្ឋភាពដើមរបស់គេហទំព័រ ឬក៏បើកលែងឃើញតែម្ដង ដូចជាករណីរបស់គេហទំព័រកម្មវិធីកែទម្រង់ ការគ្រប់គ្រង​ហិរញ្ញវត្ថុសាធារណៈជាដើម។

នៅក្នុងហេតុការណ៍មួយទៀត និងបន្ទាប់ពីបានគម្រាមនៅរសៀលថ្ងៃទី២៤ ខែមេសាថា គេហទំព័រអគ្គស្នងការ​នគរបាលជាតិ នឹងត្រូវក្លាយជាទិសដៅវាយប្រហាររបស់ក្រុមអនាមិកដែរនោះ នៅយប់វេលាម៉ោង៧ថ្ងៃដដែល គេហទំព័រនេះ បានជួបការរអាក់រអួលក្នុងមួយរយៈពេលខ្លី ដោយបណ្ដាអ្នកចូលទៅទស្សនាបើកគេហទំព័រ ឃើញ​ចេញអេក្រង់សទទេស្អាតមួយ។ ប៉ុន្តែក្រុមអនាមិក បានប្រកាសនៅលើទំព័រហ្វេសប៊ុកដែលទើបនឹងបើកថ្មីរបស់​ពួកគេថា គេហទំព័រអគ្គស្នងការនគរបាលជាតិ ជាទិសដៅក្នុងពេលអនាគត តែសម្រាប់​ពេលនេះ ការលើកឡើងនេះ​ គ្រាន់​តែជាការព្រមានបង្វែងដានមួយប៉ុណ្ណោះ។

ក្រុមហេកឃើអនាមិក ជាក្រុមវាយប្រហារប្រព័ន្ធបច្ចេកវិទ្យាមួយ ដែលលាក់មុខនៅពីក្រោយម៉ាស៊ីនកំព្យូទ័រ។ ក្រុម​ដែលតែងប្រកាសពីបុព្វហេតុរបស់ពួកគេនេះ សុទ្ធសឹងតែមានជំនាញខាងវាយប្រហារខាងបច្ចេកវិទ្យា សព្វគ្រប់​បែបយ៉ាង  មិនរាប់ត្រឹម​តែជាជំនាញ«ហេក»គេហទំព័រនោះទេ ហើយពួកគេមានបណ្ដាញសឹងតែនៅគ្រប់ប្រទេស ក្នុង​ពិភពលោកទាំងមូល។ រីឯក្រុមអនាមិក​នៅកម្ពុជាត្រូវបានគេដឹងថា ទើបនឹងចាប់ផ្ដើមមានរូបរាង នៅមុនការ​បោះ​ឆ្នោតឆ្នាំ២០១៣កន្លងទៅបន្តិច។ ក្រុមនេះ បានប្រកាសថា បុព្វហេតុរបស់ពួកគេគឺប្រឆាំងនឹងរដ្ឋាភិបាលពុករលួយ ដើម្បីលទ្ធិប្រជាធិបតិយ្យជួនប្រជាជនខ្មែរ​គ្រប់រូប។

នៅរាល់កិច្ចការរបស់ក្រុមអនាមិក ពួកគេតែងនិយាយភ្ជាប់មកជាមួយ នូវឃ្លាដូចនេះថា «យើង​ជាក្រុមជន​អនាមិក យើង​មិនអភ័យទោស យើងមិនបំភ្លេចចោល សូមរំពឹងនូវការមកដល់របស់យើង»។ តែសម្រាប់​ក្រុមអនាមិក​កម្ពុជា​វិញ បានសរសេរនូវឃ្លារបស់ខ្លួន ពី​រៀងរាល់សកម្មរបស់ពួកគេ នៅលើទំព័រហ្វេសប៊ុករបស់គេ យ៉ាងដូច្នេះថា៖

«We are Anonymous.
ពួកពុករលួយខ្លាចយើង
ពួកស្មោះត្រង់គាំទ្រយើង
ពួកអ្នកតស៊ូចូលរួមជាមួយយើង
ពួកយើងមិនអភ័យទោស
ពួកយើងមិនបំភ្លេចចោល
អ្នកគួរតែរំពឹងនូវការមកដល់របស់ពួកយើង»។

ក្រុមនេះបានប្រកាសបើកការវាយប្រហាររបស់ពួកគេ ទៅលើបណ្ដាញបច្ចេកវិទ្យារបស់រដ្ឋាភិបាល បន្ទាប់ពីអាជ្ញាធរ គ្រប់គ្រងដោយរដ្ឋាភិបាលកាលពីដើមខែមេសានេះ បានឃាត់ខ្លួនយុវនិស្សិតពីរនាក់ ដែលត្រូវបានក្រុមដដែលនេះ អះអាងថាសមាជិកជនអនាមិករបស់ពួកគេ។ ពួកគេសរសេរនៅលើទំព័រហ្វេសប៊ុកនោះថា «អ្នកចាប់ពួកយើង​ត្រឹម​២នាក់ ប៉ុន្តែពួកយើងនៅតែអាចបន្តការងាររបស់យើង ហើយនឹងចាប់ផ្តើមឲ្យខ្លាំងជាងមុន ១០ ដង ១០០០ ដង ១០០០០០ ដង គ្មានទីបញ្ចប់ចាប់ពីពេលនេះទៅ»។

មិនអាចទាក់ទងមន្ត្រីអ្នកទទួលខុសត្រូវរបស់ក្រសួងមហាផ្ទៃកម្ពុជា ដើម្បីធ្វើអត្ថាធិប្បាយក្នុងយប់នេះបានទេ។ ប៉ុន្តែ​អ្នកដែលតាមដាននឹងករណីនេះ ដែលនិយាយក្នុងលក្ខខណ្ឌមិនបញ្ចេញឈ្មោះ បានថ្លែងយ៉ាងប្រយ័ត្នប្រយែងថា នេះអាចជាកលល្បិចមួយ ដើម្បីឈានទៅដាក់ទោសជនសង្ស័យ​ទាំងពីរនាក់ និងជាលេសដើម្បីឲ្យរដ្ឋាភិបាល បង្កើត​បានដោយរលូន នូវច្បាប់ដាក់កំហិតទៅលើ​ការប្រើប្រាសបណ្ដាញ​អ៊ិនធើណែត។ តែទោះជាមានច្បាប់​គ្រប់​គ្រង់​បណ្ដាញអាំងធើណែត តឹងតែងយ៉ាងណា តែមិនប្រាកដថាគេអាចគ្រប់គ្រងបណ្ដាញ ជនហេកឃើ​អនាមិកទាំង​នោះ​បានឡើយ រាប់ទាំងប្រទេសធំៗ ដែលមានបច្ចេកវិទ្យាជឿនលឿននោះក៏ដោយ។

សូមរំលឹកដែរថា គេហទំព័របស់រដ្ឋាភិបាល និងរបស់ស្ថាប័នមួយចំនួនទៀត ត្រូវបានទទួលការវាយប្រហារម្ដងហើយ នៅក្នុងរលក​ចលនាមួយប្រឆាំងនឹងកម្ពុជា របស់ក្រុមហេកឃើអនាមិក ហ្វីលីពីន បន្ទាប់ពីកម្ពុជាទទួលធ្វើជាម្ចាស់ផ្ទះ​រៀបចំកិច្ច​ប្រជុំអាស៊ានជាមួយចិន។ នៅពេលនោះ បណ្ដាប្រទេសដែលមានជម្លោះដែនសមុទ្រ​ជាមួយនឹងចិន សម្ដែង​ការក្ដៅ​ក្រេវ​ក្រោប​​យ៉ាងខ្លាំង និងបានបន្ទោសពីអព្យាក្រិត្យភាពរបស់កម្ពុជា ដែល​ចេះតែលំអៀងទៅរកចិន ដើម្បីផល​ប្រយោជន៍​​ផ្ទាល់ខ្លួន៕

----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២៤ មេសា ២០១៤