អនុប្រធានគណបក្សសង្រ្គោះជាតិ ដែលជាគណបក្សជំទាស់លោកកឹម សុខា បានលើកឡើងថា រដ្ឋាភិបាល​គណបក្ស​ប្រជាជនកម្ពុជា កំពុងបង្ហាញភាពខ្សោយរបស់ខ្លួន តាមរយៈការដាក់«គុក»ទីលានប្រជាធិបតេយ្យ និងគំរាម​កំហែង​អ្នកហ៊ានរិះគន់ និងតវ៉ា។

ច្រកចេញចូលទីលានប្រជាធិបតេយ្យ គ្រប់ច្រកល្ហកទាំងអស់ ត្រូវបានហ៊ុំព័ន្ធដោយបន្លាលួស។ (រូបថត MONOROOM.info/ C. Nita)

នយោបាយ - «ទីលានប្រជាធិបតេយ្យជាប់គុកទៅហើយ។ គឺរបងលួសព័ទ្ធជុំវិញទៅហើយ។ វាទៅជាគុកទៅហើយ វាមិនមែនទីលានប្រជាធិបតេយ្យទៀតទេ។ គណបក្សប្រជាជន បានប្រែក្លាយទីលានប្រជាធិបតេយ្យទៅជាគុក។ ដូច្នេះកន្លែងហ្នឹងទៅជាគុកហើយ»។ នេះជាការបញ្ជាក់របស់លោកកឹម សុខា អនុប្រធានគណបក្សសង្រ្គោះជាតិ ក្នុង​សន្និសីទសារព័ត៌មាន នៅទីស្នាក់ការកណ្តលរបស់គណបក្ស ថ្ងៃទី០១ ខែឧសភា ឆ្នាំ២០១៤។

ភ្លាមៗទស្សនាវដ្តីមនោរម្យ.អាំងហ្វូ មិនទាន់អាចទាក់ទង មន្រ្តីរដ្ឋាភិបាល មន្រ្តីគណបក្សប្រជាជនកម្ពុជា និងមន្រ្តី​ពាក់ព័ន្ធផ្សេងទៀតដើម្បីធ្វើការអត្ថាធិប្បាយ បាននៅឡើយទេ។ តែលោកអភិបាលរាជធានីភ្នំពេញ ប៉ា សុជាតិវង្ស កាលពីថ្ងៃទី១២ មីនា ឆ្នាំ២០១៤ បានប្រកាស ថា ទីតំាងទីលានប្រជាធិបតេយ្យ នឹងត្រូវបិទមិនឲ្យមានការ​ប្រមូលផ្តុំ​ជួបជុំគ្នា ធ្វើបាតុកម្ម ឬបង្ហាញសិទ្ធិអ្វីទាំងអស់ រហូតដល់ការស៊ើបអង្កេតករណី អំពើហិង្សានៅផ្លូវវ៉េងស្រេង ត្រូវបាន​បិទបញ្ចប់។

ជាមួយគ្នានេះ គណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោតបានចេញផ្សាយសេចក្តីថ្លែងការណ៍របស់ខ្លួន ចុះថ្ងៃទី៣០ ខែមេសា ឆ្នាំ២០១៤ ដោយអំពាវនាវដល់ប្រជាពលរដ្ឋទូទៅ ត្រូវរក្សាភាពស្ងប់ស្ងាត់ ខណៈអាជ្ញាធរកត់​សម្គាល់ឃើញថា មានគណបក្សនយោបាយមួយ បានបង្ហាញបំណងចង់យកសកម្មភាពឃោសនាបោះឆ្នោត ជ្រើស​រើសសមាជិកក្រុមប្រឹក្សារាជធានី-ខេត្ត ស្រុក-ខណ្ឌ ធ្វើជាការប្រមូលផ្តុំ បាតុកម្ម ទាមទារផ្នែកនយោបាយទៅវិញ។

ក្នុងថ្ងៃការប្រារព្ធទិវាពលកម្មអន្តរជាតិទី០១ ខែឧសភា ឆ្នាំ២០១៤ នេះលោកសម រង្ស៊ី និងលោកកឹម សុខា ជាថ្នាក់​ដឹកនាំគណបក្សសង្រ្គោះជាតិ បានដឹកនាំអ្នកគាំទ្រ និងកម្មករច្រើនរយនាក់ ប្រមូលផ្តុំលើស្ពាននាគ ក្បែរទីលាន​ប្រជា​ធិបតេយ្យដើម្បីសម្តែងពីសិទ្ធិ និងលើកឡើងពីកង្វល់ផ្សេងៗ ខណៈទីលានប្រជាធិបតេយ្យហុំព័ទ្ធដោយបន្លាលួស។ ក្រោយបញ្ចប់ការប្រមូលផ្តុំនោះ យ៉ាងហោចណាស់មានអ្នកគាំទ្រគណបក្សសង្រ្គោះជាតិ និងកម្មករចំនួនប្រាំនាក់ ត្រូវបានក្រុមសន្តិសុខសាលារាជធានីភ្នំពេញ វាយឲ្យរងរបួស។

លោកកឹម សុខា អនុប្រធានគណបក្សសង្រ្គោះជាតិ បានអះអាង ក្នុងសន្និសីទសារព័ត៌មាន ថា នៅពេលដែល​គណបក្សប្រជាជនកម្ពុជា បានប្រែក្លាយទីលានប្រជាធិបតេយ្យ ទៅជាទីលានជាប់គុក វាបានជំរុញឲ្យគណបក្ស​សង្រ្គោះជាតិ គ្មានជម្រើសអ្វីផ្សេង ក្រៅពីការបង្កើតទីលានប្រជាធិបតេយ្យថ្មី ក្បែរទីលានប្រជាធិបតេយ្យចាស់។ អនុប្រធានគណបក្សជំទាស់ រូបនេះសង្កត់ធ្ងន់ថា៖ «គណបក្សសង្រ្គោះជាតិ យកច្បាប់ជាមូលដ្ឋាន។ អត់មាន​មក​ស្តាប់បញ្ជា អាជ្ញាធរឲ្យធ្វើ មិនឲ្យធ្វើទេ គឺយកច្បាប់បោះឆ្នោតជាមូលដ្ឋាន៕»

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០១ ឧសភា ២០១៤